អារ៉ាប៊ីសាអូឌីតបានរងការវាយប្រហារពីក្រុមហ៊ូទី
អារ៉ាប៊ីសាអូឌីត លើកឡើងថា ក្រុមឧទ្ទាមហ៊ូទីនៅយ៉េម៉េន បានបើកការវាយប្រហារជាច្រើនលើកច្រើនសារ នៅថ្ងៃទី១៩មីនាម្សិលមិញនេះដោយការប្រើយន្តហោះចម្បាំង។ ការវាយប្រហារលើកនេះ បានបង្កឱ្យកន្លែងផ្ទុកប្រេងឥន្ធនៈដ៏សំខាន់នៅភាគខាងត្បូងនៃអារ៉ាប៊ីសាអូឌីត បានរងការខូចខាតយ៉ាងដំណំ។ នេះ បើតាមសេចក្តីថ្លែងការណ៍ដោយអារ៉ាប៊ីអូឌីត។
ចុះផ្សាយនៅថ្ងៃ៖
ក្រុមឧទ្ទាមហ៊ូទី នៅថ្ងៃសៅរ៍ទី១៩មីនា បានបើកការវាយប្រហារដោយយន្តហោះចម្បាំងលើតំបន់នៅភាគខាងត្បូងអារ៉ាប៊ីសាអូឌីត ដែលរួមមានកន្លែងផ្ទុកប្រេងឥន្ធនៈដ៏សំខាន់មួយក្នុងទីក្រុង Jizan នេះបើតាមសេចក្តីថ្លែងការណ៍របស់សម្ព័ន្ធយោធាដឹកនាំដោយអារ៉ាប៊ីសាអូឌីតក្នុងកិច្ចការប្រយុទ្ធនឹងក្រុមឧទ្ទាមនៅនៅយ៉េម៉េន។ ក្រៅតែពីកន្លែងផ្ទុកប្រេងឥន្ធនៈនោះហើយ ក៏មានដែរស្ថានីយបន្សាយជាតិអំបិល ស្ថានីយផលិតថាមពលនិងឧស្ម័នហ្គាសដែលនៅតំបន់ក្បែរៗគ្នានោះ ក៏រងការវាយប្រហារពីពួកឧទ្ទាម តែការវាយប្រហារនោះមិនមានបង្កមនុស្សស្លាប់នោះទេ។
បើតាមសម្ព័ន្ធយោធាដឹកនាំដោយអារ៉ាប៊ីសាអូឌីតក្នុងកិច្ចការប្រយុទ្ធនឹងក្រុមឧទ្ទាមនៅយ៉េម៉េន យន្តហោះគ្មានមនុស្សបើក ឬ យន្តហោះចម្បាំងនោះ ត្រូវស្ទាក់ចាប់បាននិងត្រូវបំផ្លាញចោលភ្លាមៗមិនអោយបន្តប្រតិបត្តិការសម្តៅទៅតំបន់ទី៥បានទៀតនោះទេ។
ការវាយប្រហារនាពេលនេះកើតមាន នៅក្រោយរោងចក្រចម្រាញ់ប្រេងនៅរដ្ឋធានីរីយ៉ាដរបស់អារ៉ាប៊ីសាអូឌីត ត្រូវបានវាយប្រហារកាលពីថ្ងៃទី១០មីនាកន្លងទៅ ដោយត្រូវបានអះអាងថាជាស្នាដៃរបស់ក្រុមឧទ្ទាមហ៊ូទីដដែលនេះ។
កាលពីដើមសប្តាហ៍នេះ ក្រុមឧទ្ទាមហ៊ូទី បានបដិសេដមិនចូលរួមកិច្ចពិភាក្សាគ្នាជាមួយក្រុមប្រឹក្សានៃកិច្ចសហប្រតិបត្តិការឈូងសមុទ្រពែរ្ស្តី ស្តីពីជម្លោះនៅយ៉េម៉េន ដដែលនឹងប្រព្រឹត្តទៅនៅទីក្រុងរីយ៉ាដចាប់ពីថ្ងៃទី២៩មីនាខាងមុខ។
គួរជ្រាបថា ប្រទេសយ៉ែម៉េន ត្រូវបានសង្គ្រាមញ៉ាំញីចាប់តាំងពីឆ្នាំ២០១៤មក ដោយបានឆក់យកជីវិតមនុស្សជាង១៥ម៉ឺននាក់ ក្នុងនោះមានជនស៊ីវិលជាង ១៤ ៥០០នាក់ និងបណ្តាលឲ្យមនុស្សជាច្រើនលាននាក់ផ្សេងទៀតបាត់បង់ទីជម្រក។ យោងតាមអង្គការសហប្រជាជាតិនៅសប្តាហ៍មុន ប្រជាជនយ៉េម៉េនជាច្រើនលាននាក់កំពុងរស់ខ្វះខាតស្បៀងនិងការថែទាំផ្នែកសុខភាព។ និងថា ក្នុងចំណោមប្រជាជនយេម៉ែនសរុបទាំងអស់ប្រមាណ ៣១លាន ៩សែននាក់ មានជាង ២៣លាននាក់ត្រូវការជំនួយមនុស្សធម៌ ហើយក្នុងចំណោមនោះមានប្រជាជនយេម៉ែនជិត ១៣លាននាក់ កំពុងត្រូវការជំនួយជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ