តាលីបង់ហាមមិនឱ្យស្ត្រីអាហ្វហ្កានីស្ថានជិះយន្តហោះម្នាក់ឯង
តាលីបង់បានដាក់បញ្ជាឱ្យក្រុមហ៊ុនអាកាសចរណ៍នៅអាហ្វហ្កានីស្ថាន ឱ្យទទួលអ្នកដំណើរភេទស្រី ឡើងជិះយន្តហោះ តែដរាបណាតែស្ត្រីអាហ្វហ្កានីស្ថាននោះ មានបុរសជាសមាជិកក្រុមគ្រួសារជូន។ នេះជាសេចក្តីសម្រេចរបស់តាលីបង់ ក្នុងជំនួបប្រជុំកាលពី ពាក់កណ្តាលសប្តាហ៍ និងដែលក្រុមហ៊ុនអាកាសចរណ៍ ព្រមទាំងអាជ្ញាធរអន្តោប្រវេសន៍នៅអាកាសយានដ្ឋាន ទើបជូនដំណឹងមកភ្នាក់ងារសារព័ត៌មានបារាំងនាពេលនេះ។
ចុះផ្សាយនៅថ្ងៃ៖
ស្តាប់ - ០២:០៥
“មិនអនុញ្ញាតឱ្យស្ត្រីណាម្នាក់ជិះយន្តហោះ ធ្វើដំណើរ ក្នុងស្រុក ឬទៅបរទេស ដោយគ្មានបុរសក្នុងគ្រួសារជូនទេ” នេះជាលិខិតបញ្ជារបស់តាលីបង់ដែលផ្ញើទៅឱ្យភ្នាក់ងារអាកាសចរណ៍ទាំងពីររបស់អាហ្វហ្កានីស្ថាន។ អ្នកទទួលខុសត្រូវក្រុមហ៊ុនអាកាសចរណ៍ Ariana Afghan Airlines និង Kam Air ក៏បានអះអាងបញ្ជាក់ថាពិតជាបានទទួលលិខិតបញ្ជាពី អាជ្ញាធរតាលីបង់ ហើយក៏បានបញ្ឈប់ការលក់សំបុត្រយន្តហោះឱ្យស្ត្រីដែលគ្មានបុរសជាមេគ្រួសារធ្វើដំណើរជាមួយរួចមកហើយដែរ។
អ្នកដំណើរម្នាក់ បានបញ្ជាក់បា្រប់ភ្នាក់ងារសារព័ត៌មានបារាំងថា ក្រុមហ៊ុនអាកាសចរណ៍Kam Airបានហាមឃាត់ស្រ្តីដែលគ្មានអាណាព្យាបាលភេទប្រុសជូន ជាច្រើននាក់ កាលពីថ្ងៃសុក្រទី ២៥មីនា២០២២ មិនឱ្យឡើងយន្តហោះធ្វើដំណើរពីទីក្រុងកាប៊ុល ទៅក្រុងអ៊ីស្លាម៉ាបាត ប្រទេសប៉ាគីស្ថាន។ ស្រ្តីអាហ្វហ្កានីស្ថានម្នាក់ កាន់លិខិតឆ្លងដែនអាមេរិក ក៏មិនអាចឡើងជិះយន្តហោះទៅក្រុងឌូបៃបានដែរ ព្រោះគ្មានបុរសជូន។ នេះបើតាមប្រភពមួយផ្សេងទៀត។
ក្នុងថ្ងៃអាទិត្យទី ២៧មីនានេះដែរ ក្រសួងលើកតម្កើងគុណធម៌និងការពារកុំឱ្យមានអំពើអាក្រក់តាលីបង់បានចេញច្បាប់បែងចែកមិនឱ្យស្ត្រី និងបុរស ដើរលេងក្នុងសួនឧទ្យាន ក្នុងពេលតែមួយទេ។ អំណើះតទៅ ស្ត្រីអាចទៅលំហែនៅសួនសាធារណៈ នៅរៀងរាល់ថ្ងៃអាទិត្យ ចន្ទនិងអង្គារ ចំណែកបុរសពីថ្ងៃពុធ ព្រហស្បតិ៍ ថ្ងៃសុក្រ និងដល់ថ្ងៃសៅរ៍។
សេចក្តីសម្រេច នេះធ្លាក់មកតែប៉ុន្មានថ្ងៃក្រោយពីតាលីបង់សម្រេចបិទសាលារៀនអនុវិទ្យាល័យមិនឱ្យក្មេងស្រី និងយុវតីចូលរៀន។ តាំងពីត្រលប់មកកាន់អំណាចនៅអាហ្វហ្កានីស្ថាន កាលពីខែសីហា២០២១មក តាលីបង់បានដាក់បម្រាមបំបិទសិទ្ធិស្ត្រីកាន់តែច្រើនឡើងៗ ដូចជាផាត់ចេញពីតួនាទីសាធារណៈមួយចំនួនធំ ត្រួតពិនិត្យតាំងពីរបៀបស្លៀកពាក់ និង ហាមឃាត់រួចមកហើយមិនឱ្យស្ត្រី ធ្វើដំណើរតែម្នាក់ឯងលើសពី៧២គីឡូម៉ែត្រពីផ្ទះដោយគ្មានបុរសជូន តាំងពីចុងខែធ្នូ២០២១មក។ ឥលូវស្ត្រីអាហ្វហ្កានីស្ថាន លែងអាចជិះយន្តហោះតែម្នាក់ឯងបានទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ