Human Rights Watch ថ្កោលទោសជំនួបរវាងអគ្គរដ្ឋទូតអូស្ត្រាលី ជាមួយមេដឹកនាំរបបសិកភូមា
ឯកអគ្គរដ្ឋទូតអូស្ត្រាលី ប្រចាំនៅភូមា ដែលត្រូវចប់អាណត្តិ បានជួបជាមួយមេដឹកនាំរបបសិក លោក មីន អ៊ុងឡាំង។ ជំនួបនេះ ត្រូវបានតំណាងអង្គការ Human Rights Watch ថ្កោលទោស រិះគន់ ថាវាហាក់ដូចជាបង្ហាញភាពស្និទ្ធស្នាល និងការទទួលស្គាល់ជាផ្លូវការនូវរបបសិកភូមា ខណៈដែលរបបនេះបានធ្វើអំពើឧក្រិដ្ឋ រំលោភសិទ្ធិមនុស្ស និងសំលាប់ប្រជាជនឯង។
ចុះផ្សាយនៅថ្ងៃ៖
ស្តាប់ - ០២:២៩
លោក Andrea Faulkner អគ្គរដ្ឋទូតអូស្ត្រាលីប្រចាំភូមា បានចូលទៅជួបលោកមីន អ៊ុងឡាំង កាលពីថ្ងៃពុធទី៦មេសា នៅក្រុងណៃពីដាវ។ យោងតាមការផ្សាយរបស់បណ្តាញព័ត៌មានរដ្ឋភូមា Global New Light of Myanmar បានឲ្យដឹងថា អ្នកទាំង២ បាននិយាយគ្នា អំពីការពង្រឹងសហប្រតិបត្តិការ ក្នុងវិស័យផ្សេងៗ។
លោកស្រី Katrina Cooper រដ្ឋមន្ត្រីការបរទេសអូស្ត្រាលី បានលើកឡើងថា ឯកអគ្គរដ្ឋទូតអូស្ត្រាលី បាននិយាយអំពាវនាវជាថ្មីម្តងទៀត ឲ្យមេដឹកនាំរបប់សិកភូមា ត្រូវបញ្ឈប់សកម្មភាពហិង្សានានា និងត្រូវដោះលែងអ្នកទោសនយោបាយទាំងអស់។
លោកស្រី Manny Maung អ្នកស្រាវជ្រាវភូមា ប្រចាំនៅអង្គការ Human Rights Watch បានលើកឡើងថា ជំនួបរវាងអគ្គរដ្ឋទូតអូស្ត្រាលី ជាមួយមេដឹកនាំរបបសិកភូមា វាគឺជារឿងមិនអាចទទួលយកបានទេ ព្រោះវាមកបំផ្លាញការប្រឹងប្រែងរបស់សហគមន៍អន្តរជាតិ ដែលព្យាយាមធ្វើឲ្យរបបផ្តាច់ការនៅឯកោ លើឆាកអន្តរជាតិ។ លោកស្រីបន្ថែមថា តាមរយៈការថតរូបញញឹមញញែម និងទទួលយកអំណោយពីមេដឹកនាំរបបសិកភូមា គឺលោកអគ្គរដ្ឋទូតអូស្ត្រាលី ហាក់លើកតម្លៃ ផ្តល់កិត្តិយសឲ្យរបបសិកភូមា ដែលបានធ្វើអំពើឧក្រិដ្ឋ សម្លាប់ប្រជាជនឯង និងចាប់មនុស្សជាច្រើនពាន់ ដាក់ឃុំដោយអយុត្តិធម៌។
ថ្លែងទៅកាន់សមាជិកសភាអូស្ត្រាលី នៅក្រុងកង់បេរ៉ា លោកស្រីរដ្ឋមន្ត្រីការបរទេសអូស្ត្រាលី បានអះអាងថា ជំនួបរវាងអគ្គរដ្ឋទូតអូស្ត្រាលី ជាមួយលោកមីន អ៊ុងឡាំង គឺមិនមែនមានន័យថា រដ្ឋាភិបាលអូស្ត្រាលី ទទួលស្គាល់របបសិកភូមាពេញសិទ្ធិនោះទេ។
យោងតាមមន្ត្រីអូស្ត្រាលី គិតចាប់ពីមានរដ្ឋប្រហារយោធា នៅខែកុម្ភៈឆ្នាំ២០២១មក តំណាងរដ្ឋាភិបាលអូស្ត្រាលីបានជួបប្រជុំដោយផ្ទាល់ ជាមួយតំណាងកងទ័ពភូមា ចំនួន៧ដង និងមានការនិយាយទូរសព័្ទជាមួយគ្នា ច្រើនលើកទៀត។ ក៏ប៉ុន្តែ អូស្ត្រាលីបានអះអាងថា គ្មានវិស័យណាមួយរបស់អូស្ត្រាលី ដែលសហការធ្វើការជាមួយរបបសិកភូមានោះទេ។ អូស្ត្រាលីថែមទាំងបានអំពាវនាវជាច្រើនលើក ឲ្យរបបសិកភូមា ដោះលែងលោក Sean Turnell ទីប្រឹក្សាសេដ្ឋកិច្ចរបស់លោកស្រីអ៊ុងសាន ស៊ូជី ដែលត្រូវបានកងទ័ពភូមាចាប់ដាក់ឃុំ ប្រមាណមួយឆ្នាំមកហើយ ថែមទៀតផង។
ទោះជាយ៉ាងនេះក្តី កាលពីថ្ងៃព្រហស្បតិ៍ ទី៧មេសា អង្គការ Human Rights Watch បានអំពាវនាវ ឲ្យរដ្ឋាភិបាលអូស្ត្រាលី ត្រូវកែតម្រូវសកម្មភាពខ្លួន ឲ្យស្របជាមួយសម្ព័ន្ធមិត្តអន្តរជាតិ ដោយចៀសវាងការជួបជាលក្ខណៈទ្វេភាគី ជាមួយថ្នាក់ដឹកនាំកំពូល នៃរបបសិកភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ