ភេរវកម្មបំផ្ទុះគ្រាប់បែក នៅអាហ្វហ្កានីស្ថាន ស្លាប់១២នាក់ ហើយ៥៨នាក់រងរបួស
ប្រទេសអាហ្វហ្កានីស្ថាន នៅថ្ងៃព្រហស្បតិ៍ទី២១មេសា មានភេរវកម្មបំផ្ទុះគ្រាប់បែក សម្លាប់មនុស្សយ៉ាងហោច១២នាក់ ហើយច្រើនសិបនាក់រងរបួស នៅវិហារអ៊ីស្លាមមួយកន្លែង។ ភ្លាមៗ ពួកអង្គការរដ្ឋអ៊ីស្លាមជីហាត ប្រកាសថា ជាស្នាដៃរបស់ក្រុមខ្លួន។ ការវាយប្រហារភេរវកម្មនេះ គឺធ្វើឡើងតែ២ថ្ងៃប៉ុណ្ណោះ បន្ទាប់ពីការវាយប្រហារទៅលើសាលារៀនមួយ នៅក្រុងកាបូល។
ចុះផ្សាយនៅថ្ងៃ៖
ស្តាប់ - ០២:៣១
រឿងហេតុអាក្រក់នេះ កើតឡើងទៅលើវិហារអ៊ីស្លាមនិកាយស៊ីអ៊ីត ក្នុងក្រុង Mazar-i-Sharif។ តាមរយៈប្រព័ន្ធតេលេក្រាម ពួកអង្គការរដ្ឋអ៊ីស្លាមជីហាត បានប្រកាសទទួលស្គាល់ថា ការវាយប្រហារបំផ្ទុះគ្រាប់បែកនេះ គឺធ្វើឡើងដោយការចុចបញ្ជាពីចម្ងាយ។ ពួកភេរវជន ជាអ៊ីស្លាមជីហាតនិកាយស៊ុននីតដ៏ជ្រុលងប់ងល់ បានឲ្យដឹងទៀតថា គ្នីគ្នារបស់គេបានយកកញ្ចប់គ្រាប់បែកផ្ទុះ ទៅដាក់ផ្លុងក្នុងវិហារអ៊ីស្លាមនិកាយស៊ីអ៊ីត ហើយចុចបំផ្ទុះឡើងនៅខណៈពេលដែលពួកស៊ីអ៊ីតជួបជុំគ្នាច្រើន។
នៅក្នុងរូបភាពវីដេអូដែលទីភ្នាក់ងារព័ត៌មានបារាំងទទួលបាន គេឃើញហ្វូងមនុស្សបានស្ទុះស្ទាជួយនាំយកអ្នករបួសទៅមន្ទីរពេទ្យ ហើយអ្នកនាំពាក្យផ្នែកសុខាភិបាលប្រចាំក្រុង បានប្រាប់អ្នកសារព័ត៌មានថាឪពុកម្តាយបងប្អូនជនរងគ្រោះជាច្រើននាក់ បានរត់ទៅជួយបរិច្ចាគឈាម។
នៅអាហ្វហ្កានីស្ថាន មិនទាន់សុវត្ថិភាពស្រួលបួលទេ។ ពីថ្ងៃព្រហស្បតិ៍ អ្នកនាំពាក្យប៉ូលីស ខេត្ត Kunduz បញ្ជាក់ថា នៅប៉ែកឥសាន ក៏មានការផ្ទុះគ្រាប់បែកមួយដែរ បណ្តាលឲ្យស្លាប់មនុស្ស៤នាក់ ហើយ១៨នាក់ទៀត រងរបួស។ រីឯនៅកណ្តាលរដ្ឋធានីកាបូលវិញ នគរបាលស្នងការក្រុងឲ្យដឹងថាមានការដាក់ឧបករណ៍ផ្ទុះ ធ្វើឲ្យក្មេងៗ២នាក់របួសដែរ។
ចំណែកកាលពីថ្ងៃអង្គារកន្លងទៅ ក៏មានការផ្ទុះគ្រាប់បែកពីរ ទៅលើសាលារៀនមួយកន្លែង ធ្វើឲ្យបាត់បង់ជីវិតមនុស្ស៦នាក់ និងរបួសជាង២០នាក់។ ហេតុការណ៍អប្រិយនេះ កើតនៅក្រុងកាបូល ក្នុងសង្កាត់ដែលមានក្រុមអ៊ីស្លាមស៊ីអ៊ីត រស់នៅច្រើន។ ពួកស៊ីអ៊ីតក្នុងប្រទេសនេះ ឧស្សាហ៍ត្រូវគេសម្លាប់ ហើយសាលារៀន មន្ទីរពេទ្យ និងវិហារសាសនា គឺច្រើនតែជាផ្ទាំងស៊ីបនៃអំពើភេវរកម្ម។
ជាក់ស្តែង ខែឧសភាឆ្នាំ២០២១ មានការបំផ្ទុះគ្រាប់បែកជាស៊េរី ទៅលើសាលារៀនរបស់ក្មេងស្រីមួយកន្លែង ធ្វើឲ្យកូនសិស្ស៨៥នាក់ស្លាប់ ភាគច្រើនជាសិស្សស្រី ហើយជាង៣០០នាក់ទៀត រងរបួស។ ខែតុលាឆ្នាំ២០២០ ឡានមួយគ្រឿងត្រូវបំផ្ទុះ នៅមជ្ឈមណ្ឌលអប់រំបណ្តុះបណ្តាលមួយ ធ្វើឲ្យផ្តាច់ជីវិតមនុស្ស២៤នាក់។ ចំណែកខែឧសភាឆ្នាំ២០២០ដែរ ពួកយោធាបានវាយប្រហារទៅលើមន្ទីរសម្ភពមួយកន្លែង សម្លាប់មនុស្ស២៥នាក់ ក្នុងនោះ១៦នាក់ជាស្រីពពោះជិតឆ្លងទន្លេ។ សហរដ្ឋអាមេរិក កាលពីគ្រានោះ បានចោទប្រកាន់ចង្អុរមុខពួកអង្គការរដ្ឋអ៊ីស្លាមជីហាត ថាជាអ្នកនៅពីក្រោយអំពើព្រៃផ្សៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ