អ.ស.ប.៖ ចិននិងរុស្ស៊ីបោះឆ្នោតវ៉េតូលើការស្នើបង្កើនទណ្ឌកម្មលើកូរ៉េខាងជើង
ចិន និងរុស្ស៊ី បានបោះឆ្នោត កាលពីថ្ងៃព្រហស្បតិ៍ ប្រឆាំងនឹងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ស្នើឡើងដោយសហរដ្ឋអាមេរិក ដើម្បីបង្កើនទណ្ឌកម្មលើកូរ៉េខាងជើង ក្រោយការបាញ់សាកល្បងមីស៊ីលជាច្រើនលើក។ ការមិនចុះសម្រុងគ្នានៅក្រុមប្រឹក្សាសន្តិសុខ ដែលបណ្តាប្រទេសលោកខាងលិចបារម្ភថា អាចនឹងធ្វើឲ្យកូរ៉េខាងជើងកាន់តែបានចិត្ត ហើយអាចនឹងធ្វើសកម្មភាពយោធាជាច្រើនបន្ថែមទៀត ជាពិសេស គឺការសាកល្បងអាវុធនុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០១:៥០
នៅក្នុងការបោះឆ្នោត ដែលធ្វើឡើងកាលពីថ្ងៃព្រហស្បតិ៍ សេចក្តីព្រាងសេចក្តីសម្រេចបង្កើនទណ្ឌកម្មលើកូរ៉េខាងជើងបានទទួលនូវការគាំទ្រពីសំណាក់ប្រទេសចំនួន ១៣ ពោលគឺ លើសពីសំឡេងភាគច្រើន ដែលតម្រូវឲ្យមានត្រឹមតែ ៩សំឡេងគាំទ្រ។ ក៏ប៉ុន្តែ សេចក្តីសម្រេចនេះមិនអាចចេញរួច ដោយសារតែ ចិន និងរុស្ស៊ី ដែលបោះឆ្នោតប្រឆាំង គឺជាប្រទេសសមាជិកអចិន្រ្តៃយ៍ ដែលមានសិទ្ធិវ៉េតូ។
នេះគឺជាលើកទីមួយ រាប់ចាប់តាំងពីឆ្នាំ២០០៦ ដែលសេចក្តីសម្រេចរបស់ក្រុមប្រឹក្សាសន្តិសុខត្រូវជាប់គាំងដោយវ៉េតូ ហើយអាមេរិក និងប្រទេសសម្ព័ន្ធមិត្ត ជាពិសេស កូរ៉េខាងត្បូង អង់គ្លេស និងបារាំង បាននាំគ្នាបង្ហាញនូវក្តីបារម្ភថា ភាពមិនចុះសម្រុងគ្នាដែលបង្ហាញឲ្យឃើញជាសាធារណៈ នៅក្រុមប្រឹក្សាសន្តិសុខនៅពេលនេះ អាចនឹងធ្វើឲ្យកូរ៉េខាងជើងកាន់តែបានចិត្ត ហើយបាញ់សាកល្បងគ្រឿងសព្វាវុធជាច្រើនបន្ថែមទៀត ជាពិសេស គឺអាចនឹងសាកល្បងអាវុធនុយក្លេអ៊ែរ ដែលត្រូវបានផ្អាក តាំងពីឆ្នាំ២០១៧មក។
គួរបញ្ជាក់ថា គិតចាប់តាំងពីដើមឆ្នាំ២០២២នេះមក កូរ៉េខាងជើងបានបាញ់សាកល្បងមីស៊ីល រហូតដល់ទៅ ២៣លើក ដោយនៅក្នុងនោះក៏មានដែរ ការសាកល្បងមីស៊ីលបាលីស្ទិកអន្តរទ្វីប រំលោភទៅលើសេចក្តីសម្រេចរបស់ក្រុមប្រឹក្សាសន្តិសុខ កាលពីឆ្នាំ២០១៧ ដែលកាលណោះត្រូវបានអនុម័ត ដោយសំឡេងគាំទ្រជាឯកច្ឆន្ទ ពោលគឺ មានការសំឡេងគាំទ្រពីសំណាក់ចិន និងរុស្ស៊ី។
ក៏ប៉ុន្តែ ទាំងចិន និងរុស្ស៊ី ដែលបោះឆ្នោតវ៉េតូលើការបន្ថែមទណ្ឌកម្មលើកូរ៉េខាងជើង នៅពេលនេះ បានលើកហេតុផលថា ការផ្តោតតែទៅលើការដាក់ទណ្ឌកម្មមិនមែនជាដំណោះស្រាយនោះទេ ផ្ទុយទៅវិញ វាអាចនឹងរុញវិបត្តិឲ្យកាន់តែធ្ងន់ធ្ងរ ហើយបន្ថែមពីលើនេះទៅទៀត វាអាចនឹងបង្កឲ្យមានវិបត្តិមនុស្សធម៌ ដល់ប្រជាជនកូរ៉េខាងជើងធម្មតាទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ