របបសឹកភូមាប្រកាសកាត់ទោសប្រហារជីវិតសកម្មជនប្រឆាំងនឹងរដ្ឋប្រហារដោយការព្យួរក
របបសឹកភូមានឹងអនុវត្តទោសប្រហារ ឡើងវិញ បន្ទាប់ពីខកខាន ចាប់តាំងពីឆ្នាំ ១៩៩០។ កាលពីថ្ងៃសុក្រ ទី ៣មិថុនា អ្នកនាំពាក្យរបស់របបសឹកភូមាបានប្រកាសថា គេនឹងកាត់ទោសប្រហារជីវិតមនុស្ស៤នាក់ ដែលនៅក្នុងនោះ ១នាក់ ជាអតីតសមាជិកសភា មកពីគណបក្សសម្ព័ន្ធជាតិប្រជាធិបតេយ្យរបស់លោកស្រី អ៊ុងសាន ស៊ូជី និង១នាក់ទៀត ជាអតីតមេដឹកនាំចលនានិស្សិតដ៏ល្បីឈ្មោះ ដែលធ្លាប់ចេញមុខប្រឆាំងរបបសឹកភូមា កាលពីឆ្នាំ ១៩៨៨។
ចុះផ្សាយនៅថ្ងៃ៖ កែប្រែថ្ងៃទី៖
អាក់ខានអស់៣០ឆ្នាំ របបសឹកភូមាបានត្រលប់មកអនុវត្តទោសប្រហារជីវិតឡើងវិញ ជាមួយ អ្នកទោសនយោបាយ ដែលប្រឆាំងនឹងរដ្ឋប្រហារ។ តាមអ្នកនាំពាក្យរបស់របបសឹកភូមា លោក Zaw Min Tun មនុស្ស៤នាក់ នឹងត្រូវគេប្រហារជីវិត ដោយការព្យួរក។ អ្នកនាំពាក្យរបស់របបសឹក មិនបានបញ្ជាក់កាលបរិច្ឆេទប្រហារជីវិតអ្នកទោសទាំងបួននាក់ ប៉ុន្តែ បានបង្ហាញឈ្មោះអ្នកទោសដែលត្រូវគេប្រហារជីវិត ដូចជាលោកPhyo Zeya Thaw អតីតសមាជិកសភាមកពីគណបក្សសម្ព័ន្ធជាតិដើម្បីប្រជាធិបតេយ្យ របស់លោកស្រីអ៊ុងសាន ស៊ូជី និងលោកKyaw Min Yu អតីតមេចលនានិស្សិតដ៏ល្បីឈ្មោះម្នាក់ នៅភូមា។
ជាប់ឆ្នោតជាសមាជិកសភា កាលពីឆ្នាំ ២០១៥ លោកPhyo Zeya Thaw មកពីគណបក្សរបស់លោកស្រីអ៊ុងសាន ស៊ូជី ត្រូវបានក្រុមយោធាភូមា ឡោមព័ទ្ធចាប់ខ្លួន កាលពីចុងឆ្នាំ ២០២១។ លោកត្រូវបានតុលាការយោធាភូមាកាត់ទោសប្រហារជីវិត ក្នុងបទរៀបចំការវាយប្រហារភេរវកម្មទៅលើខ្សែរថភ្លើង ដែលបានសម្លាប់ប៉ូលិស៥នាក់ នៅទីក្រុងរ៉ង់ហ្គូន នៅក្រោយរដ្ឋប្រហារ។
ជា អតីតអ្នកចម្រៀង Hip Hop លោកPhyo Zeya Thawធ្លាប់ត្រូវបានរបបសឹកចាប់ដាក់ពន្ធនាគារម្តងហើយ កាលពីឆ្នាំ ២០០៨ ក្នុងបទចោទប្រកាន់ថា សារបទចម្រៀងរបស់លោកមានលក្ខណៈញុះញង់បង្កវិទ្ធង្សនាប្រឆាំងរបបយោធាភូមា។
តាមច្បាប់ប្រឆាំងភេរវកម្មនេះដែរ តុលាការភូមាបានកាត់ទោសប្រហារជីវិត សកម្មជនដើម្បីលទ្ធិប្រជាធិបតេយ្យ លោកKyaw Min Yu ដែលមានរហស្សនាមថា Ko Jimmy។ លោកត្រូវបានតុលាការកាត់ទោសប្រហារជីវិតក្នុងបទចោទប្រកាន់ថាបានសរសេរចុះផ្សាយ នៅលើបណ្តាញសង្គម ដើម្បី ញុះញង់ឲ្យមានចលនាបះបោរប្រឆាំងនឹងថ្នាក់ដឹកនាំ។
នៅភូមា លោកKo Jimmy ជាសកម្មជនល្បីឈ្មោះ ព្រោះលោកធ្លាប់ស្ថិតក្នុងជំនាន់និស្សិតដែលចេញមុខ ធ្វើបាតុកម្មខ្លាំងក្លា ប្រឆាំងនឹងរបបសឹកភូមា កាលពីឆ្នាំ ១៩៨៨។
បើតាមអ្នកនាំពាកុ្យរបស់របបសឹកភូមា អតីតអ្នកនយោបាយ និងសកម្មជនប្រជាធិបតេយ្យទាំងពីររូបនឹងត្រូវគេកាត់ទោសប្រហារជីវិតជាមួយបុរសពីររូបផ្សេងទៀត ដែលតុលាការចោទប្រកាន់ពីបទមនុស្សឃាតទៅលើស្រ្តីភូមា ម្នាក់ ដែលពួកគេទាំងពីរចោទថា ជាអ្នកស៊ើបការណ៍ឲ្យរបបសឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ