កូរ៉េខាងត្បូងនិងអាមេរិកបាញ់មីស៊ីលបាលីស្ទិក៨ដើមតបកូរ៉េខាងជើង
កូរ៉េខាងត្បូង និងអាមេរិក បានបាញ់មីស៊ីលបាលីស្ទិកចំនួន ៨ដើម នៅថ្ងៃចន្ទនេះ ដើម្បីជាការឆ្លើយតបទៅនឹងការបាញ់មីស៊ីលបាលីស្ទិក ៨ដើមដូចគ្នា ពីសំណាក់កូរ៉េខាងជើង កាលពីថ្ងៃអាទិត្យ។ ការតបតទៅវិញទៅមកនេះ គឺជាវដ្តថ្មីមួយ នៅក្នុងវិបត្តិនៅឧបទ្វីបកូរ៉េ ជាពិសេស ក្រោយពីការឡើងកាន់តំណែងរបស់ប្រធានាធិបតីថ្មីរបស់កូរ៉េខាងត្បូង ដែលប្រកាន់ជំហរតឹងរ៉ឹងចំពោះកូរ៉េខាងជើង។
ចុះផ្សាយនៅថ្ងៃ៖
មីស៊ីលទាំង ៨ ដើម ដែលកូរ៉េខាងត្បូងនិងអាមេរិកបាញ់នៅថ្ងៃចន្ទនេះ គឺជាប្រភេទមីស៊ីលបាលីស្ទិករយៈចម្ងាយខ្លី ក្នុងនោះ ៧ដើម បាញ់ដោយកូរ៉េខាងត្បូង និង១ដើម បាញ់ដោយសហរដ្ឋអាមេរិក។ នេះបើយោងតាមការអះអាងរបស់សេនាធិការចម្រុះកងទ័ពកូរ៉េខាងត្បូង ដែលបានបញ្ជាក់ថា ការបាញ់មីស៊ីលទាំងនេះ គឺជាការបង្ហាញឲ្យឃើញពីសមត្ថភាព និងការប្រុងប្រៀបខ្លួនរបស់កូរ៉េខាងត្បូងនិងអាមេរិក ក្នុងការវាយប្រហារតបវិញភ្លាមៗ ទៅលើទីតាំងមីស៊ីលរបស់កូរ៉េខាងជើង។
នេះគឺជាលើកទីពីរហើយ ដែលកូរ៉េខាងត្បូង និងអាមេរិកបានបាញ់មីស៊ីលឆ្លើយតបទៅនឹងការបាញ់មីស៊ីលពីសំណាក់កូរ៉េខាងជើង ដោយកាលពីសប្តាហ៍មុន កូរ៉េខាងត្បូង និងអាមេរិក ក៏បានធ្វើសកម្មភាពប្រហាក់ប្រហែលគ្នានេះដែរ ដើម្បីឆ្លើយតបទៅនឹងការបាញ់សាកល្បងមីស៊ីលបាលីស្ទិករបស់កូរ៉េខាងជើង។
ការតបត ម៉ាំងទៅម៉ាំងមកបែបនេះ គឺជារឿងមួយដ៏កម្រឃើញ នៅក្រោមអាណត្តិលោកប្រធានាធិបតីមូន ចែអ៊ីន ក៏ប៉ុន្តែ លោកយូន ស៊ុកយោល ដែលទើបនឹងចូលកាន់តំណែងជាប្រធានាធិបតីកូរ៉េខាងត្បូង កាលពីខែមុន បានសន្យាថានឹងប្រកាន់ជំហរតឹងរ៉ឹងចំពោះរបបដឹកនាំក្រុងព្យុងយ៉ាង ហើយថា ចាប់ពីពេលនេះទៅ កូរ៉េខាងត្បូងនឹងឆ្លើយតបខ្លាំងៗ ទៅនឹងរាល់សកម្មភាពបង្ករហេតុរបស់កូរ៉េខាងជើង។
គួរបញ្ជាក់ថា កាលពីថ្ងៃអាទិត្យ កូរ៉េខាងជើងបានបាញ់សាកល្បងមីស៊ីលរយៈចម្ងាយខ្លីចំនួន ៨ដើម ដោយអះអាងថា ជាការឆ្លើយតបទៅនឹងការធ្វើសមយុទ្ធរួមគ្នា រវាងកូរ៉េខាងត្បូង និងអាមេរិក។ សមយុទ្ធរយៈពេល ៣ថ្ងៃ ហើយជាសមយុទ្ធលើកទីមួយ ក្នុងរយៈពេល ៤ឆ្នាំកន្លងទៅនេះ ដែលធ្វើឡើងដោយមានវត្តមាននាវាផ្ទុកយន្តហោះរបស់អាមេរិក។
កូរ៉េខាងជើងបាញ់មីស៊ីលថាជាការឆ្លើយតបនឹងសមយុទ្ធកូរ៉េខាងត្បូងនិងអាមេរិក ចំណែកកូរ៉េខាងត្បូងនិងអាមេរិកបាញ់មីស៊ីលថាជាការឆ្លើយតបនឹងការបាញ់មីស៊ីលរបស់កូរ៉េខាងជើង។ នេះគឺជាការបង្ហាញឲ្យឃើញ អំពីវដ្តថ្មីមួយ ដែលអាចនឹងធ្វើឲ្យវិបត្តិនៅឧបទ្វីបកូរ៉េ កាន់តែតានតឹង នៅក្នុងពេលដែលកូរ៉េខាងជើងទំនងកំពុងប្រុងប្រៀបរៀបចំសាកល្បងអាវុធនុយក្លេអ៊ែរសាជាថ្មី ក្រោយពីបានផ្អាក ចាប់តាំងពីឆ្នាំ២០១៧កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ