អតីតយោធាអាមេរិកធ្លាប់ធ្វើការនៅចិន ចាប់ខ្លួននិងបញ្ជូនទៅតុលាការអូស្ត្រាលី
អតីតអ្នកបើកបរយន្តហោះរបស់យោធាអាមេរិក ដែលធ្លាប់បានទៅធ្វើការនៅក្នុងប្រទេសចិន ត្រូវបានចាប់ខ្លួនដោយស្ងាត់ តាមសំណើរបស់អាជ្ញាធរអាមេរិក ត្រូវបញ្ជូនទៅតុលាការក្រុងស៊ីដនី នាថ្ងៃសុក្រទី៤វិច្ឆិកាខាងមុខ។ អាជ្ញាធរអាមេរិកនិងអូស្ត្រាលី បដិសេធមិនធ្វើអត្ថាធិប្បាយអ្វីទាំងអស់ ទាក់ទងនឹងការចាប់ខ្លួននេះ។
ចុះផ្សាយនៅថ្ងៃ៖
ក្រសួងយុត្តិធម៌អូស្ត្រាលីបានត្រឹមបញ្ជាក់ថា អាជ្ញាធរពិតជាបានចាប់ខ្លួន តាមសំណើរបស់វ៉ាស៊ីនតោន អតីតអ្នកបើកបរយន្តហោះយោធាអាមេរិក Daniel Edmund Duggan កាលពីថ្ងៃទី ២១តុលា ដែលមានពេល៦០ថ្ងៃក្នុងការសុំធ្វើបច្ចាប័ន។
បើតាមឯកសារពាណិជ្ជកម្មសាធារណៈអូស្ត្រាលី បន្ទាប់ពីបានចាកចេញយោធាអាមេរិក ក្នុងនាមជាគ្រូបង្ហាត់បើកបរយន្តហោះតាកទិក លោកDuggan បានទៅធ្វើការឱ្យក្រុមហ៊ុនអាកាសចរណ៍ Top Gun Tasmania ដែលមានប្រើយន្តហោះបង្វិកចិន ពីឆ្នាំ២០០៥ដល់ឆ្នាំ២០១៤។ ក្រោយមកទៀត លោកក៏បានតាំងទីនៅក្រុងប៉េកាំង។ សៀវភៅមគ្គុទេសក៍អាហារដ្ឋានឆ្នាំ២០១៧ បានចារឈ្មោះលោកជាម្ចាស់ហាងបាក្នុងសង្កាត់ដ៏ប្រណិតមួយរបស់ប៉េកាំង។
អតីតយោធាអាមេរិកម្នាក់ ដែលជាអ្នកបើកបរយន្តហោះដែរ និងស្គាល់គ្នាតាំងពីជាងម្ភៃឆ្នាំមកហើយ បានប្រាប់មកទីភ្នាក់ងារAFPថា លោក Duggan បានធ្វើការក្រុមហ៊ុនមួយនៅចិន ក្នុងនាមជាអ្នកបំពាក់បំប៉នក្រុមអ្នកបើកបរយន្តហោះពីបច្ចេកទេសកំហុសធ្វើឡើងដោយមនុស្សនៅពេលបើកបរ។ ក្រុមហ៊ុនចិនជ្រើសរើសអតីតយោធាអាមេរិកទៅធ្វើការមិនមែនជារឿងថ្មីចម្លែកទេ ហេតុដូច្នេះហើយបានជាលោកដែលសុំមិនបញ្ចេញឈ្មោះដើម្បីសុវត្ថិភាពការងារ មិនយល់ថាហេតុអ្វីលោក Duggan បែរជាត្រូវចាប់ខ្លួនទៅវិញ។
ការចាប់ខ្លួនអតីតយោធាអាមេរិករូបនេះ ប្រព្រឹត្តទៅជួនចំពេលភ្នាក់ងារចារកិច្ចអង់គ្លេស បានចេញសេចក្តីព្រមានក៏កម្រមួយថាចិនកំពុងជ្រើសរើសអតីតអ្នកបើកបរយន្តហោះអាមេរិក។ កាលពីសប្តាហ៍មុន រដ្ឋាភិបាលអង់គ្លេស និងអូស្ត្រាលី បានសម្តែងក្តីព្រួយបារម្ភខ្លាចចិនផ្តល់ការងារឱ្យអ្នកបើកបរយន្តហោះយោធាអាមេរិកចូលនិវត្តន៍ ទៅបំពាក់បំប៉នកងកម្លាំងយោធាចិនឱ្យបានស្គាល់អំពីបច្ចេកទេសយោធារបស់ក្រុមលោកខាងលិច។
មានអតីតពីឡុតអាមេរិកជាង៣០នាក់ហើយបានព្រមទៅធ្វើការឱ្យចិន។ នេះបើតាមសារព័ត៌មានអង់គ្លេស។ តែអ្នកនាំពាក្យក្រសួងការបរទេសចិនបានបដិសេធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ