កូរ៉េខាងជើងបាញ់មីស៊ីលបាលីស្ទីកអន្តរទ្វីបមួយគ្រាប់ថ្មីទៀត ស្វាគមន៍ជំនួបកំពូលអាស៊ីប៉ាស៊ីហ្វិក
កូរ៉េខាងជាង បានបាញ់មីស៊ីលថ្មីមួយគ្រាប់ទៀត ជាប្រភេទមីស៊ីលបាលីស្ទីកអន្តរទ្វីប។ នេះបើតាមការបញ្ជាក់ ពីកងទ័ពកូរ៉េខាងត្បូង។ ការបាញ់សាកមីស៊ីលនេះ គឺត្រូវបានធ្វើនៅក្នុងថ្ងៃបើកជំនួបកំពូលប្រចាំឆ្នាំ នៃក្រុមប្រទេសអាស៊ីប៉ាស៊ីហ្វិក ដែលកំពុងប្រព្រឹត្តិធ្វើទៅនៅរាជធានីបាងកក។ បញ្ហាកូរ៉េខាងជើង គឺជាជំងឺដ៏រ៉ាំរ៉ៃមួយ ដែលតែងតែគំរាមស្ថិរភាព សន្តិភាពតំបន់អាស៊ីប៉ាស៊ីហ្វិកទាំងមូល។
ចុះផ្សាយនៅថ្ងៃ៖
ស្តាប់ - ០២:២១
ផ្អែកតាមអគ្គបញ្ជាការកងទ័ពកូរ៉េខាងត្បូង គឺនៅវេលាម៉ោងប្រមាណ១០ និង១៥នាទី ព្រឹកថ្ងៃទី១៨វិច្ឆិកា គឺកូរ៉េខាងជើង បានបាញ់មីស៊ីលបាលីស្ទីកចំងាយឆ្ងាយមួយគ្រាប់។ មីស៊ីលនេះ ត្រូវបានបាញ់ចេញពីតំបន់ Sunan ជាយក្រុងព្យុងយ៉ាង ហើយបានធ្លាក់ទៅក្នុងសមុទ្រជប៉ុន។
ប្រភពពីលោក Yasukazu Hamada រដ្ឋមន្ត្រីក្រសួងការពារជាតិជប៉ុន បានឲ្យដឹងថា កងទ័ពជប៉ុន មិនបានព្យាយាមបាញ់ស្ទាក់មីស៊ីលនេះទេ ដោយទុកឲ្យវារត់បានចម្ងាយប្រមាណ១០០០គីឡូម៉ែត្រ មុននឹងធ្លាក់ចូលសមុទ្រ។ លោកបានបន្ថែមថា យោងតាមការសន្និដ្ឋាន មីស៊ីលនេះជាមីស៊ីលបាលីស្ទីកអន្តរទ្វីប ICBM ព្រោះវាបានហោះឡើងទៅលើ ដល់កំពស់ប្រមាណ៦០០០គីឡូម៉ែត្រ។ លំដាប់មីស៊ីល ICBM គឺជាអាវុធខ្លាំងក្លាបំផុត របស់កងទ័ពកូរ៉េខាងជើង។ ចំណែកលោកនាយករដ្ឋមន្ត្រីជប៉ុន ហ្វូមីអូ គីស៊ីដា បានលើកឡើងថា មីស៊ីលរបស់កូរ៉េខាងជើង ទំនងជាបានធ្លាក់ចូលទៅក្នុងដែនសមុទ្រតំបន់សេដ្ឋកិច្ចផ្តាច់មុខរបស់ជប៉ុន មិនឆ្ងាយប៉ុន្មានពីកោះហុកកៃដូ។
សេតវិមានអាមេរិកបានប្រតិកម្មថា ការបាញ់មីស៊ីលរបស់កូរ៉េខាងជើងនេះ គឺជាការបំពានយ៉ាងគឃ្លើន ទៅនឹងសសេចក្តីសម្រេចចិត្ត នៃអង្គការសហប្រជាជាតិ។ អាមេរិក បានចាត់ទុកទង្វើរបស់របបផ្តាច់ការព្យុងយ៉ាងនេះ ថាជាការបង្កឲ្យមានភាពតានតឹង និងអសន្តិសុខតំបន់ ដោយឥតប្រយោជន៍ទាល់តែសោះ។
គួររំលឹកថា កាលពីថ្ងៃទី៣វិច្ឆិកា កូរ៉េខាងជើងក៏បានបាញ់សាកមីស៊ីលបាលីស្ទីកអន្តរទ្វីបមួយដែរ។ តែយោងតាមកូរ៉េខាងត្បូង និងជប៉ុន គឺការបាញ់នោះទំនងជាបានជួបបរាជ័យ។ យោងតាមសង្ស័យផ្សេងទៀតពីក្រុមអ្នកជំនាញកងទ័ពកូរ៉េខាងត្បូង និងអាមេរិក គឺកូរ៉េខាងជើង អាចនឹងបាញ់សាកល្បងគ្រាប់បែកបរមាណូថ្មីមួយគ្រាប់ទៀត ក្នុងពេលឆាប់ៗនេះ។
កាលពីថ្ងៃអាទិត្យ លោកចូ បៃដិន រួមជាមួយលោកប្រធានាធិបតីកូរ៉េខាងត្បូង និងលោកនាយករដ្ឋមន្ត្រីជប៉ុន បានអះអាងថា នឹងឆ្លើយតបទៅវិញដោយវិធានការជាក់ស្តែង នឹងធ្ងន់ធ្ងរបំផុត ប្រសិនបើកូរ៉េខាងជើងពិតជាហ៊ានសាកល្បងគ្រាប់បែកនុយក្លេអ៊ែរមែន។
នៅទីក្រុងបាងកក ថ្ងៃសុក្រទី១៨វិច្ឆិកានេះ ក្នុងឱកាសជំនួបកំពូលក្រុមប្រទេសសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក លោកស្រីកាម៉ាឡា ហារីស អនុប្រធានាធិបតីអាមេរិក បានកោះប្រជុំបន្ទាន់មួយ ជាមួយលោកនាយករដ្ឋមន្ត្រីជប៉ុន លោកនាយករដ្ឋមន្ត្រីកូរ៉េខាងត្បូង និងថ្នាក់ដឹកនាំអូស្ត្រាលី កាណាដា នូវែលហ្សេឡង់ ដើម្បីនិយាយពីបញ្ហាកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ