រដ្ឋាភិបាលកូរ៉េខាងត្បូងព្រមចរចាប្រឈមនឹងសន្ទុះបាតុកម្មរបស់អ្នកដឹកជញ្ជូន
នៅថ្ងៃអាទិត្យទី២៧វិច្ឆិកានេះ ជាគម្រប់បួនថ្ងៃជាប់គ្នាហើយដែលបុគ្គលិកក្នុងវិស័យដឹកជញ្ជូនបានធ្វើបាតុកម្ម ដើម្បីទាមទារឱ្យរដ្ឋាភិបាលពន្យារកិច្ចព្រមព្រៀងធានាផ្តល់ប្រាក់ខែអប្បបរិមា ជារហូតទៅ។ បាតុកម្មបានធ្វើឱ្យបណ្តាញផ្គត់ផ្គង់ឧស្សាហកម្មមូលដ្ឋានរងការប៉ះពាល់យ៉ាងខ្លាំង។ ប្រឈមនឹងភាពរអាក់រអួលនេះ រដ្ឋាភិបាលបានប្តូរចិត្តព្រមហៅក្រុមសហជីពមកចរចាចាប់ពីថ្ងៃចន្ទស្អែកទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ក្រុមអ្នកបើកបររថយន្តកាមីញ៉ុង ចេញធ្វើបាតុកម្មមានចំនួនមិនច្រើនទេ គឺប្រមាណតែមួយភាគបួនប៉ុណ្ណោះ ប៉ុន្តែបាតុកម្មក្នុងវិស័យដឹកជញ្ជូននេះ បានធ្វើឱ្យសេដ្ឋកិច្ចកូរ៉េខាងត្បូងមួយភាគត្រូវជាប់គាំង។ នៅចុងសប្តាហ៍នេះ កំពង់ផែក៏អាចដំណើរការបានត្រឹម៨០%នៃទម្លាប់។ វិស័យសំខាន់ៗនៃសេដ្ឋកិច្ចដែលរងផលបះពាល់ខ្លាំងជាពិសេសជាងគេ មានជាអាទិ៍វិស័យឧស្សាហកម្មរថយន្ត ដែកថែប ឬស៊ីម៉ង់។ ក្រុមហ៊ុនផលិតរថយន្តKIA បានទៅជួលបុគ្គលិកបណ្តោះអាសន្នដើម្បីធានាដឹកជញ្ជូនរថយន្តឱ្យអតិថិជនតាមបញ្ជា។ ឧស្សាហកម្មស៊ីម៉ង់បានបញ្ជាក់ថាអាចបំពេញតាមការបញ្ជាទិញបានត្រឹមតែ១០%ប៉ុណ្ណោះ។
ប្រឈមនឹងស្ថានភាពបែបនេះ រដ្ឋាភិបាលបានប្រកាសប្តូរជំហរវិញ។ បន្ទាប់ពីបានប្រកាសជំហរមិនចរចាដោយអះអាងកិច្ចព្រមព្រៀងធានារក្សាប្រាក់ខែអប្បបរិមាដែលត្រូវអស់សុពលភាពនៅដំណាច់ឆ្នាំនឹងត្រូវពន្យារបីឆ្នាំទៀត និងគំរាមប្រើច្បាប់មក រដ្ឋាភិបាលបានសម្រេចនៅថ្ងៃអាទិត្យនេះ ត្រៀមបើកកិច្ចចរចាជាមួយសហជីព នៅថ្ងៃចន្ទ ទី ២៨វិច្ឆិកាស្អែក។ ការចរចាទំនងជាមានអាចជួបភាពស្មុគស្មាញខ្លាំង ក្នុងបរិបទនៃហានិភ័យខ្វះខាតប្រេងឥន្ធនៈមានខ្ពស់ ដោយអ្នកដឹកជញ្ជូនប្រមាណ៧០%បានធ្វើកូដកម្ម។ ប៉ុន្តែរដ្ឋាភិបាលបានឆ្លៀតព្រមានជាស្រេចថា ក្នុងករណីការចរចាមិនបានសម្រេច រដ្ឋាភិបាលនឹងប្រើច្បាប់បង្ខំឱ្យបាតុករត្រលប់ចូលធ្វើការវិញ នៅថ្ងៃអង្គារ។ ប្រសិនបើមែន នេះជាការអនុវត្តច្បាប់លើកទីមួយ គិតចាប់តាំងពីថ្ងៃអនុម័តនៅឆ្នាំ២០០៤មក។
សូមបញ្ជាក់ថា ក្នុងមួយឆ្នាំ២០២២នេះ ក្រុមអ្នកដឹកជញ្ជូន បានធ្វើបាតុកម្មពីរដងហើយ។ កាលពីខែមិថុនា ជាបាតុកម្មរយៈពេល៨ថ្ងៃ និងបានធ្វើប្រទេសខាតបង់ថវិកាជាង១២០០លានដុល្លារ។ លើកនេះការខាតបង់សេដ្ឋកិច្ចមានទំហំប្រហាក់ប្រហែលគ្នា។ តែសម្រាប់បាតុករ បើគ្មានការធានាប្រាក់ខែអប្បបរិមាជានិរន្តទេ អ្នកបើកបរនឹងងាយរងគ្រោះ រងបន្ទុកការងារច្រើនមិនគោរពពេលវេលាសម្រាក និងងាយរងហានិភ័យសុវត្ថិភាពផ្សេងទៀត។ បើតាមក្រសួងការងារ នៅរវាងពីឆ្នាំ២០២០-២១ មានគ្រោះថ្នាក់ស្លាប់ក្នុងការងារជាង៤ពាន់ករណី ពោលគឺជាចំនួនដ៏ច្រើនខ្លាំងណាស់សម្រាប់ប្រទេសដែលមានប្រជាជនតែ៥២លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ