លោកលី ម្យុងបាក់ អតីតប្រធានាធិបតីកូរ៉េខាងត្បូងទទួលការលើកលែងទោស
ត្រូវតុលាការផ្តន្ទាទោសឲ្យជាប់ពន្ធនាគារ ១៧ឆ្នាំ ក្នុងបទប្រព្រឹត្តអំពើពុករលួយ និងកេងបន្លំលុយរដ្ឋ អតីតប្រធានាធិបតីកូរ៉េខាងត្បូង លោក លី ម្យុងបាក់ នឹងត្រូវដោះលែងឲ្យមានសេរីភាព នៅថ្ងៃពុធស្អែក ទៅតាមក្រឹត្យលើកលែងរបស់ប្រធានាធិបតី។ តាមការប្រកាសរបស់ក្រសួងយុត្តិធម៌ កូរ៉េខាងត្បូង នៅថ្ងៃអង្គារទី ២៧ធ្នូ លោក លី ម្យុងបាក់ ដែលធ្លាប់ដឹកនាំកូរ៉េខាងត្បូងពីឆ្នាំ ២០០៨ ដល់ឆ្នាំ ២០១៣ ស្ថិតក្នុងចំណោមអ្នកទោស ១៣០០នាក់ ដែលបានទទួលការលើកលែងពីប្រធានាធិបតី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
នៅកូរ៉េខាងត្បូង អស់មានអតីតប្រធានាធិបតី ជាប់ក្នុងពន្ធនាគារ។ បន្ទាប់ពី អតីតប្រធានាធិបតី លោកស្រីប៉ាក់ គុនហេ លោកលី ម្យុងបាក់ អតីតប្រធានាធិបតី កូរ៉េខាងត្បូងដែលត្រូវតុលាការសេអ៊ូល កាត់ទោស កាលពីឆ្នាំ ២០២០ ឲ្យជាប់ពន្ធនាគារ ១៧ឆ្នាំ ជាអតីតប្រធានាធិបតីចុងក្រោយគេ ដែលត្រូវដោះលែងឲ្យមានសេរីភាព ទៅតាមក្រឹត្យលើកលែងរបស់ប្រធានាធិបតី។
តាមក្រឹត្យលើកលែងរបស់ប្រធានាធិបតីដែលត្រូវបាន ប្រកាសនៅថ្ងៃអង្គារនេះ នៅក្រោយកិច្ចប្រជុំគណៈរដ្ឋមន្រ្តីជាមួយលោកប្រធានាធិបតី យុន សុខយោល លោកលី ម្យុងបាក់ ស្ថិតក្នុងបញ្ជីអ្នកទោស ជាង ១៣០០នាក់ ដែលទទួលការលើកលែងទោសពីប្រធានាធិបតី ក្នុងក្របខ័ណ្ឌនៃការបង្រួបបង្រួមជាតិ តាមរយៈការផ្សះផ្សារ ការអត់ឱន និងការគោរព។តាមរដ្ឋមន្រ្តី ក្រសួងយុត្តិធម៌កូរ៉េខាងត្បូង លោក Han Dong Hoon លោកលី ម្យុងបាក់ នឹងត្រូវដោះលែងឲ្យមានសេរីភាព ចាប់ពីថ្ងៃពុធស្អែក។
អាយុ ៨១ឆ្នាំ អតីតមេដឹកនាំកូរ៉េខាងត្បូងបានជាប់ក្នុងពន្ធនាគារតែ២ឆ្នាំ ប៉ុណ្ណោះ មុននឹងត្រូវដាក់ឲ្យនៅក្រៅឃុំបណ្តោះអាសន្ន តាំងពីខែមិថុនា ដោយសារហេតុផលវ័យចំណាស់ និងបញ្ហាសុខភាព។
ធ្លាប់ដឹកនាំកូរ៉េខាងត្បូង ពីឆ្នាំ ២០០៨ ដល់ឆ្នាំ ២០១៣ លោកលី ម្យុងបាក់ ត្រូវបានតុលាការផ្តន្ទាទោស កាលពីឆ្នាំ ២០២០ ឲ្យជាប់ពន្ធនាគារ ១៧ឆ្នាំ ក្នុងបទកេងបន្លំលុយរដ្ឋ និងទទួលសំណូកសូកប៉ាន់ពីក្រុមហ៊ុនសាំស៊ុងជាថ្នូរនឹង ការប្រកាសលើកលែងរបស់ប្រធានាធិបតី សម្រាប់អគ្គនាយកក្រុមហ៊ុនសាំស៊ុង ដែលកាលណោះត្រូវបានតុលាការកាត់ទោស ពីបទបន្លំគេចមិនបង់ពន្ធរដ្ឋ។
ការលើកលែងទោសរបស់ប្រធានាធិបតី នៅថ្ងៃអង្គារនេះ មិនត្រឹមតែលុបចោលទោសជាប់ពន្ធនាគារ ១៥ឆ្នាំរបស់លោកលី ម្យុងបាក់ ដែលនៅសល់តែប៉ុណ្ណោះទេ ប៉ុន្តែ វារំលាយចោលផងដែរ ការផាកពិន័យ១១លានដុល្លារ ដែលលោកលី ម្យុងបាក់ ត្រូវបង់សំណងជូនរដ្ឋ។ ក្រៅតែពីរួចខ្លួនពីទោសជាប់ពន្ធនាគារសឹងអស់មួយជីវិត លោក លី ម្យុងបាក់នឹងបានទទួលមកវិញ ផងដែរនូវអភ័យឯកសិទ្ធិ ក្នុងនាមអតីតប្រធានាធិបតី ដែលធ្លាប់ដឹកនាំកូរ៉េខាងត្បូង។
លោកលី ម្យុងបាក់ ជាឥស្សរជនជាន់ខ្ពស់ទី ២របស់កូរ៉េខាងត្បូង បន្ទាប់ពី លោកលី ជេយុង អ្នកស្នងតំណែងក្រុមហ៊ុន សាំស៊ុង ដែលត្រូវបានលោកប្រធានាធិបតី លោកយុន សុខយោល ចេញក្រឹត្យលើកលែងទោស។
នៅកូរ៉េខាងត្បូង វាសឹងក្លាយជាទម្លាប់ ដែលប្រធានាធិបតីផុតអាណត្តិ ត្រូវតុលាការកាត់ទោស ឲ្យជាប់ពន្ធនាគារ ពីបទប្រព្រឹត្តអំពើពុករលួយ នៅក្នុងខណៈពេលដែល គណបក្សគូប្រជែង ឈ្នះឆ្នោត ចូលកាន់អំណាច។ ប្រធានាធិបតីកូរ៉េខាងត្បូង ទាំង៤រូបដែលកំពុងមានជីវិត សុទ្ធតែត្រូវបានតុលាការថ្កោលទោសក្នុងរឿងប្រព្រឹត្តអំពើពុករលួយ។ នៅមុនលោកលី ម្យុងបាក់ លោកស្រីប៉ាក់ គុនហេ ដែលត្រូវ សភាបោះឆ្នោតទម្លាក់ចេញពីតំណែងប្រធានាធិបតីមុនអាណត្តិ ត្រូវបានតុលាការកាត់ទោសឲ្យជាប់ពន្ធនាគារ ២៥ឆ្នាំ ក្នុងបទទទួលសំណូកពីក្រុមហ៊ុន សាំស៊ុង ហើយនិងរំលោភអំណាចប្រធានាធិបតី។ ចំណែកអតីតប្រធានាធិបតីពីររូបផ្សេងទៀត ដែលត្រូវជាប់ពន្ធនាគារដោយសាររឿងពុករលួយ ហើយនិងក្បត់ជាតិ កាលពីទសវត្សរ៍ឆ្នាំ ១៩៨០ ក៏ធ្លាប់រួចទោស ដោយសារក្រឹត្យលើកលែងទោស ពីប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ