ចិនមិនសប្បាយចិត្តនឹងវិធានការដែលប្រទេសខ្លះបានតម្រូវឲ្យអ្នកដំណើរមកពីចិនធ្វើតេស្តកូវីដ
នៅថ្ងៃអង្គារ ទី៣ មករា អ្នកនាំពាក្យក្រសួងការបរទេសចិនលោកស្រីម៉ាវ នីងបានចេញមុខរិះគន់នឹងវិធានការដែលមានប្រទេសមួយចំនួនបានតម្រូវឲ្យអ្នកដំណើរមកពីចិនធ្វើតេស្តកូវីដ១៩។ តាមលោកស្រីម៉ាវ នីង ការអនុវត្តន៍វិធានការរបៀបនេះជារឿងមិនអាចទទួលយកបានទេ ព្រោះវាមិនបានសំអាងលើមូលដ្ឋានវិទ្យាសាស្រ្ត និងថា ចិនអាចនឹងចាត់វិធានការបកវិញដោយផ្អែកលើគោលការណ៍ភាពមានទៅវិញ ទៅមក។
ចុះផ្សាយនៅថ្ងៃ៖
ស្តាប់ - ០២:២៧
រហូតមកដល់ពេលនេះ មានប្រមាណជា ១០ប្រទេសបានចាត់វិធានការខុសៗគ្នាដើម្បីត្រួតពិនិត្យលើអ្នកដំណើរមកពីប្រទេសចិន មិនថាជាជនជាតិចិន ឬជនជាតិផ្សេង។ ប្រទេសខ្លះបានតម្រូវឲ្យអ្នកដំណើរមកពីចិនត្រូវមានក្នុងដៃនូវលទ្ធផលតេស្ត PCR អវិជ្ជមានកូវីដ ប័ណ្ណចាក់វ៉ាក់សាំង ហើយត្រូវធ្វើតេស្តម្តងទៀតនៅពេលមកដល់។ ប្រទេសខ្លះទៀតបានតម្រូវឲ្យមានត្រឹមលទ្ធផលតេស្ត PCR អវិជ្ជមានកូវីដ និងប័ណ្ណចាក់វ៉ាក់សាំង។ តែមានប្រទេសដទៃ ពិសេសម៉ារ៉ុកបានបិទទ្វារទាំងស្រុងមិនឲ្យអ្នកដំណើរបរទេសចូលតែម្តង ទោះជាអ្នកដំណើរមកពីចិន ឬពីប្រទេសណាក៏ដោយ។
តែសម្រាប់ចិន អ្នកនាំពាក្យក្រសួងការបរទេសលោកស្រីម៉ាវ នីងបានថ្លែងច្បាស់ៗដោយមិនលាក់លៀមថា វិធានការទាំងអស់នេះជារឿងមិនអាចទទួលយកបានទេ និងព្រមានចាត់វិធានការបកវិញដូចគ្នានេះចំពោះអ្នកដំណើរបរទេសចូលប្រទេសចិន។ គួរបញ្ជាក់ថា ការដែលមានប្រទេសកាន់តែច្រើនបានចាត់វិធានការត្រួតពិនិត្យលើអ្នកដំណើរមកចិនដោយសារតែពេលនេះ ចិនកំពុងស្គាល់សន្ទុះកំណើនករណីឆ្លងកូវីដយ៉ាងច្រើនសម្បើម។ ក្តីបារម្ភរបស់ពិភពលោក គឺមកពីគេគ្មានព័ត៌មានច្បាស់លាស់ស្តីពីអត្តសញ្ញាណ និងប្រភេទកូវីដដែលកំពុងធ្វើចរាចរណ៍ខ្លាំងនៅចិនសព្វថ្ងៃ។
លើសពីនេះ ចិនក៏លែងប្រកាសពីតួលេខនៃចំនួនអ្នកឆ្លង និងអ្នកស្លាប់ប្រចាំថ្ងៃដោយកូវីដ១៩។ គួររម្លឹកថា សន្ទុះកំណើនករណីឆ្លងកូវីដនៅចិនបានកើតឡើងតាំងពីចិនបានលើកចេញវិញទាំងស្រុងនូវវិធានការរឹតបន្តឹងកូវីដកាលពីថ្ងៃទី៧ ធ្នូ។ ជាក់ស្តែងនៅទីក្រុងសៀងហៃ មានពលរដ្ឋ ២ភាគ៣ នៃពលរដ្ឋសរុប ២៥លាននាក់ប្រហែលបានឆ្លងកូវីដនាប៉ុន្មានសប្តាហ៍ចុងក្រោយ នេះបើតាមការប៉ាន់ប្រមាណរបស់មន្រ្តីជាន់ខ្ពស់ម្នាក់នៅក្នុងមន្ទីរពេទ្យមួយ។ ជារៀងរាល់ថ្ងៃ សេវាសង្រ្គោះបន្ទាន់នៅតាមមន្ទីរពេទ្យក្នុងក្រុងសៀងហៃបានទទួលអ្នកជំងឺយ៉ាងច្រើនសម្បើម ក្នុងនោះ អ្នកជំងឺភាគច្រើនមានវ័យជាង ៦៥ឆ្នាំ។
ក្រៅពីក្រុងសៀងហៃ ទិដ្ឋភាពដូចគ្នានេះក៏មាននៅតាមទីក្រុងធំៗផ្សេងទៀត ដូចយ៉ាងក្រុងប៉េកាំងជាដើម។ អ្វីដែលរដ្ឋអំណាចកំពុងបារម្ភខ្លាំងពេលនេះ គឺការឆ្លងរាលដាលពីទីក្រុងទៅកាន់ជនបទនៅពេលដែលពលរដ្ឋចិនធ្វើដំណើរទៅលេងស្រុកកំណើតនាពេលបុណ្យចូលឆ្នាំចិនខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ