អ្នកជំនាញ៖ ចិនមានប្រជាជន៨០%ឆ្លងកូវីដ
នៅស្រុកចិន សន្ទុះនៃការឆ្លងរាលដាលជំងឺកូវីដ សម្រាប់ពីរបីខែទៅមុខ ទំនងជាមិនសូវខ្លាំងពេកនោះទេ។ មិនសូវច្រើនខ្លាំង និងមិនគួរឲ្យបារម្ភខ្លាំង ក៏ព្រោះតែ ប្រជាជនចិន ចំនួន ជាង ៨០% បានឆ្លងជំងឺកូវីដរួចស្រេចទៅហើយ។ នេះជាការបញ្ជាក់របស់ អ្នកជំនាញចិន Wu Zunyou នៃមជ្ឈមណ្ឌលជាតិចិន ត្រួតពិនិត្យនិងបង្ការជំងឺឆ្លង។
ចុះផ្សាយនៅថ្ងៃ៖
ស្តាប់ - ០២:៥៧
ការបញ្ជាក់របស់អ្នកជំនាញនេះ គឺទំនងជាដើម្បីឆ្លើយតបទៅ អង្គការសុខភាពពិភពលោក ដែលបានថ្លែងក្តីបារម្ភខ្លាំងថា រដូវចូលឆ្នាំចិន គឺនឹងនាំឲ្យមេរោគផ្លូវដង្ហើម ស្ទុះសន្ទុះឆ្លងរីករាលខ្លាំង នៅស្រុកចិន។
ចូលឆ្នាំចិន ឆ្នាំ២០២៣ នេះ គឺមហាប្រជាជនចិន សប្បាយចិត្តនឹងដើរហើរ ហើយអ្នកធ្វើការនៅទីក្រុងនិងតំបន់ឆ្ងាញ ក៏ញញឹមរីកមុខរីកមាត់រីកថ្លើមប្រមាត់ដែរ ព្រោះតែបានឱកាសត្រឡប់ទៅលេងស្រុកកំណើត ស្រុកដូនតារបស់ខ្លួនវិញ ដើម្បីនឹងអបអរបុណ្យចូលឆ្នាំថ្មី។ បុណ្យចូលឆ្នាំថ្មី ដែល ពលរដ្ឋចិនទាំងមូល ខកខានមិនបានប្រារព្ធធ្វើ អស់ ៣ ឆ្នាំទៅហើយ។ ពីព្រោះថា តាំងពីឆ្នាំ២០២០មក រដ្ឋចិនបានបិទប្រទេស បិទខ្ទប់ចរាចរណ៍ និងបានពង្រឹងវិធានការតឹងរឹង គឺ នយោបាយកូវីដសូន្យ។ វិធានការនេះ គឺទើបតែត្រូវ ពលរដ្ឋធ្វើបាតុកម្មតវ៉ាប្រឆាំង ហើយរដ្ឋអំណាចចិនក៏សម្រេចលុបចោលទៅវិញ នៅកៀកចុងឆ្នាំ២០២២។
ទិន្នន័យជាផ្លូការនៅប្រទេសចិន គឺ មនុស្សស្លាប់ដោយសារជំងឺកូវីដ១៩ មានចំនួនប្រមាណតែ ៦០ ០០០ ប៉ុណ្ណោះ។ នេះបើតាមព័ត៌មានផ្លូវការ ដែលអាជ្ញាធរចិន ស្រង់នៅតាមមន្ទីរពេទ្យ នាចន្លោះថ្ងៃ ទី៨ ធ្នូ ២០២២ ដល់ថ្ងៃទី១២ មករា ២០២៣។ រយៈពេលជាង១ខែនេះ គឺស្លាប់មនុស្ស៦ម៉ឺននាក់ គឺជាចំនួនមួយ ដែលអ្នកជំនាញផ្សេងទៀតក្រៅពីចិន នៅមិនទាន់ជឿទុកចិត្ត ហើយនិងគិតថា ចំនួនមនុស្សស្លាប់នៅចិនព្រោះតែជំងឺកូវីដ ច្បាស់ជាច្រើនជាងទិន្នន័យនេះឆ្ងាយណាស់។ ម្យ៉ាងទៀត ក៏ព្រោះតែ រដ្ឋអំណាចចិន មិនបានស្រង់ទិន្នន័យអ្នកស្លាប់នៅតាមផ្ទះផងទេ។
នៅទីក្រុងវូហាន ជាទីដែលគេជឿថាផ្ទុះជំងឺកូវីដ១៩ដំបូងគេ បានបើកចរាចរណ៍ និងលក់ដូរឡើងវិញ។ អ្នកលក់ផ្កាស្រស់ម្នាក់ ឈ្មោះអ្នកស្រី Zhu ប្រាប់អ្នកកាសែតនៃទីភ្នាក់ងារព័ត៌មានបារាំង AFP ថា ការបើកប្រទេសវិញឲ្យធ្វើដំណើរ និងឲ្យទៅចូលឆ្នាំនៅស្រុកកំណើត គឺល្អណាស់។ គាត់ក៏អាចលក់ផ្កាដាច់ច្រើនដែរ។ អ្នកស្រីលក់ផ្ការូបនេះ បន្តទៀតថា នៅពេលដែលមនុស្សឆ្លងកូវីដស្ទើរគ្រប់គ្នាទៅហើយ គេច្បាស់ជានឹងអាចធ្វើបុណ្យចូលឆ្នាំថ្មីដោយសប្បាយ ហើយ លែងខ្លាចឆ្លងជំងឺទៀត។ ឆ្នាំនេះ អ្នកស្រី ហ្ស៊ូ លក់ផ្កាដាច់ៗអស់ ព្រោះអ្នកទិញផ្កា ទិញច្រើន ដើម្បីយកទៅតែងលំអទទួលឆ្នាំថ្មីផង និងយកទៅបុណ្យខ្មោចផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ