កូរ៉េខាងត្បូង រងការវាយប្រហារតាមប្រព័ន្ធបច្ចេកវិទ្យាលើគេហទំព័រជាច្រើនរបស់ស្ថាប័នជាតិ
យ៉ាងហោច គេហទំព័រស្ថាប័នជាតិកូរ៉េខាងត្បូង ចំនួនជាង១០ ត្រូវ ពួកចោរព័ត៌មានវិទ្យា វាយប្រហារ នៅក្នុងអំលុងពេលបុណ្យចូលឆ្នាំចិន ថ្មីៗនេះ។ នេះបើតាមការអះអាងរបស់រដ្ឋបាលទីក្រុងសេអ៊ូល នៅថ្ងៃទី២៥មករា ម្សិលមិញ។ កូរ៉េខាងត្បូង បញ្ជាក់បន្ថែមថា ស្ថាប័នជាតិដែលរងការវាយប្រហារនោះ ភាគច្រើន ក្នុងវិស័យអប់រំ ហើយនិងបន្តថា ការវាយប្រហារបច្ចេកវិទ្យាពីសំណាក់ប្រទេសជិតខាង គឺពុំមែនជាលើកទីមួយឡើយ។
ចុះផ្សាយនៅថ្ងៃ៖
ស្តាប់ - ០២:១៧
នគរបាលកូរ៉េខាងត្បូង បើកការស៊ើបអង្កេត នៅថ្ងៃពុធ បន្ទាប់ពីការវាយប្រហារបច្ចេកវិទ្យាជាច្រើនករណី នៅអំលុងពេលចុងសប្តាហ៍កន្លងទៅ ជាន់ចំឱកាសបុណ្យចូលឆ្នាំប្រពៃណីចិន ដែលពលរដ្ឋកូរ៉េខាងត្បូង ក៏អបអរបុណ្យចូលឆ្នាំនេះដែរ។ អាជ្ញាធរកូរ៉េខាងត្បូង បញ្ជាក់ថា ស្ថាប័នអប់រំជាតិ ជាង១០ ត្រូវរងការវាយប្រហារពីក្រុមចោរមួយក្រុមឈ្មោះថា ចៅជីយីង ដែលគេដាក់មន្ទិសសង្ស័យថាជា របស់ចិន។
ក្រុមចោរបច្ចេកវិទ្យាមានឈ្មោះចិននេះ មានគម្រោងគោលដៅស៊ីបវាយប្រហារទៅលើគេហទំព័រចំនួន ២ ០០០ របស់អាជ្ញាធរកូរ៉េខាងត្បូង។ តាមប្រព័ន្ធផ្សព្វផ្សាយតេលេក្រាម ពួកគេអះអាងថាបានវាយប្រហារគេហទំព័រ ជិត ៨០ ហើយនិងឆ្លៀតបានរារាំងការផ្សាយព័ត៌មាននិងការប្រើប្រាស់លក្ខណៈឯកជនរបស់អ្នកធ្វើការពាក់ព័ន្ធនឹងស្ថាប័នទាំងនោះផង។ មិនតែប៉ុណ្ណោះ ក្រុមចោរបច្ចេកវិទ្យានេះ បញ្ជាក់ថានឹងមិនឈប់ត្រឹមហ្នឹងទេ ពោលគឺនឹងនៅតែបន្តឈ្លានពានប្រព័ន្ធអ៊ីនធ័រនែតកូរ៉េខាងត្បូងបន្ថែមទៀត។ នេះបើតាមសេចក្តីរាយការណ៍របស់ Nicolas Rocca អ្នកកាសែតបារាំង ឈរជើងនៅរដ្ឋធានីសេអ៊ូល។
ក្រុមចោរ ចៅជីយីង គឺបានបង្ហាញចេតនាដាច់ខាត ប្រឆាំងនឹងរដ្ឋអំណាចកូរ៉េខាងត្បូង។ ក៏ប៉ុន្តែ ពួកគេ បានបដិសេធថា ខ្លួនពុំមែនឋិតក្រោមបង្គាប់បញ្ជាផ្ទាល់ពីរដ្ឋបាលក្រុងប៉េកាំង ទេ។ ទោះម្តេចក្តី ការពាក់ព័ន្ធរវាងក្រុមចោរអ៊ីនធ័រនែតនិងរដ្ឋអំណាចចិន គឺហាក់មានភាពស្រពិចស្រពិលនៅឡើយ។ បើផ្អែកលើកទំនាក់ទំនងរវាងប្រទេសទាំងពីរ ដែលហាក់កំពុងរើបងើបឡើងនៃសញ្ញាណអរិភាពផង គឺកាន់តែនាំឲ្យគេសង្ស័យ។
សង្ស័យ ព្រោះថា កាលពីសប្តាហ៍មុន រដ្ឋាភិបាលចិន បានផ្អាកផ្តល់ទិដ្ឋាការរយៈពេលខ្លី ចំពោះពលរដ្ឋកូរ៉េខាងត្បូង។ ការផ្អាកឈប់ផ្តល់ប័ណ្ណអនុញ្ញាតឲ្យចូលស្រុកចិននេះ គឺកំហិតរហូតដល់ដាច់ខែមករា។ ចំណាត់ការរបស់អាជ្ញាធរចិន គឺជាចម្លើយតបសងសឹកចំពោះរដ្ឋបាលក្រុងសេអ៊ូល ដែលសម្រេចចិត្តមិនចេញទិដ្ឋាការឲ្យពលរដ្ឋចិន ព្រោះតែបារម្ភពីការរីករាលដាលជំងឺកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ