ប្រមុខអង្គការអូតង់ផ្តើមបំពេញទស្សនកិច្ចនៅកូរ៉េខាងត្បូង និងនៅជប៉ុន
ប្រមុខអង្គការអូតង់លោកយែន ស្តុលទែនប៊ែរបានផ្តើមបំពេញទស្សនកិច្ចមួយជុំអាស៊ីនៅកូរ៉េខាងត្បូង និងជប៉ុន។ លោកស្តុលទែនប៊ែរបានទៅដល់កូរ៉េខាងត្បូងក្នុងថ្ងៃអាទិត្យ ទី២៩ មករា និងបន្តដំណើរទៅជប៉ុនក្នុងថ្ងៃចន្ទ ទី៣០ មករានេះ។ កម្មវត្ថុនៃទស្សនកិច្ចរបស់លោកស្តុលទែនប៊ែរ គឺដើម្បីពង្រឹងទំនាក់ទំនងរវាងអង្គការអូតង់ជាមួយកូរ៉េខាងត្បូង និងជប៉ុន។ ប្រទេសអាស៊ីទាំងពីរនេះកំពុងប្រឈមនឹងកំណើនឥទ្ធិពលរបស់ចិននៅក្នុងតំបន់ និងការគំរាមកំហែងដោយនុយក្លេអ៊ែរ រួមទាំងមីស៊ីលរបស់កូរ៉េខាងជើង។ កូរ៉េខាងជើងដែលបានច្រានចោលលើការចោទរបស់អាមេរិកដែលថា ខ្លួនបានផ្តល់អាវុធឲ្យរុស្ស៊ី។
ចុះផ្សាយនៅថ្ងៃ៖
ស្តាប់ - ០២:២០
ការច្រានចោលរបស់កូរ៉េខាងជើងលើការចោទរបស់អាមេរិកបានធ្វើឡើងដោយលោកវ៉ុន ជុងហ្គុន នាយកដេប៉ាតឺម៉ង់ទទួលបន្ទុកកិច្ចការអាមេរិក។ តាមលោកវ៉ុន អ្វីដែលអាមេរិកបានលើកឡើងជារឿងប្រឌិតសុទ្ធសាធ និងបានព្រមានអាមេរិកពីការទទួលផលវិបាក បើអាមេរិកនៅបន្តផ្សព្វផ្សាយរឿងមិនពិតមួយនេះ។ អ្នកតំណាងជាន់ខ្ពស់កូរ៉េខាងជើងរូបនេះដដែលបានបន្ថែមថា ការព្យាយាមធ្វើឲ្យខូចរូបភាពកូរ៉េខាងជើងដោយប្រឌិតរឿងមិនពិតជាការបង្ករឿងធ្ងន់ធ្ងរដែលកូរ៉េខាងជើងមិនអាចឈរឱបដៃនៅស្ងៀមបានទេ។ នៅមុនលោកវ៉ុន ប្រតិកម្មស្រដៀងគ្នានេះក៏មានពីនាងគីម យូជុងដែលជាប្អូនស្រីបង្កើតដ៏មានឥទ្ធិពលរបស់មេដឹកនាំកូរ៉េខាងជើងលោកគីម ជុងអ៊ុន។
នាងគីម យូជុងបានបញ្ជាក់ក្នុងថ្ងៃសុក្រ ទី២៧ មករាថា ការចោទរបស់អាមេរិកជាការបោះជំហានកាន់តែឆ្ងាយពីខ្សែបន្ទាត់ក្រហម។ គួរបញ្ជាក់ថាក្នុងសប្តាហ៍កន្លងទៅ អាមេរិកបានចោទកូរ៉េខាងជើងពីបទបានបញ្ជូនគ្រាប់រ៉ូកែត និងគ្រាប់មីស៊ីលទៅឲ្យរុស្ស៊ីដើម្បីធ្វើសង្រ្គាមនៅអ៊ុយក្រែន ពិសេសផ្តល់ឲ្យកម្លាំងប្រដាប់អាវុធ Wagner ដែលជាទ័ពស៊ីឈ្នួលរបស់រុស្ស៊ី។ ការជាប់ពាក់ព័ន្ធរបស់កូរ៉េខាងជើងនៅក្នុងសង្រ្គាមអ៊ុយក្រែនក៏ត្រូវបានប្រមុខអង្គការអូតង់លោកស្តុលទែនប៊ែរលើកយកទៅនិយាយជាមួយប្រមុខការទូតកូរ៉េខាងត្បូងលោកប៉ាក់ ជីនដែរ។ តែអ្វីដែលលោកស្តុលទែនប៊ែរបានសម្តែងក្តីបារម្ភខ្លាំងជាងគេ គឺគ្រោះថ្នាក់ដោយមីស៊ីល និងនុយក្លេអ៊ែររបស់ក្រុងព្យុងយ៉ាង។
ក្តីបារម្ភបន្ទាប់មក គឺកំណើនឥទ្ធិពលរបស់ចិននៅអាស៊ី និងនៅតំបន់ឥណ្ឌូប៉ាស៊ីហ្វិក។ « អ្វីដែលកំពុងកើតមាននៅអាស៊ី និងនៅតំបន់ឥណ្ឌូប៉ាស៊ីហ្វិកជារឿងសំខាន់សម្រាប់អឺរ៉ុប និងអូតង់។ យើងត្រូវប្រឈមទប់នឹងគ្រប់ការគំរាមកំហែង រួមទាំងបញ្ហាប្រឈមសកលផ្សេងៗ ក្នុងនោះមានចិនមួយដែរ » នេះជាសម្តីរបស់លោកស្តុលទែនប៊ែរនៅក្នុងបទសម្ភាសន៍ឲ្យកាសែតកូរ៉េខាងត្បូងមួយឈ្មោះ Yonhap ចេញផ្សាយក្នុងថ្ងៃអាទិត្យ ទី២៩ មករា។ លោកស្តុលទែនប៊ែរយល់ថា មានតែការពង្រឹងកិច្ចសហប្រតិបត្តិជាមួយប្រទេសដៃគូនៅក្នុងតំបន់ទេទើបគេអាចប្រឈមទប់នឹងគ្រប់ការគំរាមកំហែង និងបញ្ហាប្រឈមសកលផ្សេងៗបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ