អូតង់ និងជប៉ុនប្រកាសរឹតចំណងសម្ព័ន្ធភាព នៅចំពោះមុខការគំរាមកំហែងរបស់ចិន និងរុស្ស៊ី
ប្រមុខរដ្ឋាភិបាលជប៉ុន និងអគ្គលេខាធិការអង្គការអូតង់ ប្រកាសជំហរម៉ឺងមាត់ និងរួបរួមគ្នា នៅចំពោះមុខការគំរាមកំហែងសន្តិសុខពីសំណាក់ចិន និងរុស្ស៊ី។ នៅក្នុងជំនួបស្តីពីសន្តិសុខ កាលពីថ្ងៃអង្គារ ទី ៣១មករា នៅទីក្រុងតូក្យូ លោកនាយករដ្ឋមន្រ្តីជប៉ុន និងអគ្គលេខាធិការអង្គការអូតង់ បានប្រកាសរឹតបន្តឹងចំណងសម្ព័ន្ធភាព ជប៉ុន និងអូតង់ នៅចំពោះមុខ សង្រ្គាមរុស្ស៊ីឈ្លានពានអ៊ុយក្រែន និងការពង្រីកដែនឥទ្ធិពលយោធារបស់ចិន នៅក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
បន្ទាប់ពីធ្វើដំណើរទៅសេអ៊ូល ដើម្បី សុំជំនួយយោធា សម្រាប់អ៊ុយក្រែន ប្រមុខអង្គការអូតង់ លោកយេន ស្តុលទែនប៊ែរ បន្តដំណើរទៅប្រទេសជប៉ុន នៅក្នុងក្របខ័ណ្ឌនៃទស្សនកិច្ចពង្រឹងភាពជាដៃគូជាមួយប្រទេសសម្ព័ន្ធមិត្តអាស៊ី។
នៅក្នុង ជំនួបទ្វេភាគីជាមួយនាយករដ្ឋមន្រ្តីជប៉ុន ហ្វូមីអូ គីស៊ីដា អគ្គលេខាធិការអង្គការអូតង់បាននិយាយសរសើរជប៉ុនដែលប្រកាន់ជំហរច្បាស់លាស់ ផ្តល់ជំនួយសម្រាប់អ៊ុយក្រែន។ ផ្ទុយពីកូរ៉េខាងត្បូង ដែលមានច្បាប់ហាមឃាត់មិនឲ្យផ្តល់អាវុធ ទៅប្រទេសណាដែលកំពុងធ្វើសង្រ្គាម ជប៉ុនបានចូលរួមដាក់ទណ្ឌកម្មលើរុស្ស៊ី ក្នុងក្របខ័ណ្ឌប្រទេសហ្សេ ៧ និងបញ្ជូនសព្វាវុធសម្រាប់ការពារខ្លួន ទៅឲ្យអ៊ុយក្រែន។
តាមកាសែតក្នុងស្រុកជប៉ុន លោកនាយករដ្ឋមន្រ្តី គីស៊ីដាគ្រោងធ្វើទស្សនកិច្ចនៅទីក្រុងកៀវ នៅខែកុម្ភៈ ដើម្បីបង្ហាញជំហរគាំទ្ររបស់ជប៉ុន សម្រាប់អ៊ុយក្រែន។
ថ្លែងនៅក្នុងសន្និសីទកាសែតជាមួយនាយករដ្ឋមន្រ្តី ជប៉ុន កាលពីថ្ងៃអង្គារ អគ្គលេខាធិការអង្គការអូតង់បានព្រមានផលវិបាកនៃសង្រ្គាមរុស្ស៊ីឈ្លានពានអ៊ុយក្រែន។ សម្រាប់ប្រមុខអង្គការអូតង់ លោកយេន ស្តុលទែនប៊ែរ សង្រ្គាមអ៊ុយក្រែន មិនមែន ជាវិបត្តិរបស់អឺរ៉ុប ប៉ុន្តែ ជាការប្រឈមសម្រាប់សណ្តាប់ធ្នាប់ពិភពលោកទាំងមូល។ “អ្វីដែលកំពុងកើតឡើងនៅអឺរ៉ុប សព្វថ្ងៃនេះ អាចហៀរចូលមកដល់អាស៊ីខាងកើត នៅថ្ងៃស្អែក។ ដូច្នេះ ជប៉ុន និងអូតង់ត្រូវរួមគ្នា ដើម្បី ការពារសេរីភាព និងប្រជាធិបតេយ្យ។”
តាមលោកយេន ស្តុលទែនប៊ែរ ចិនមិនមែនជាសត្រូវរបស់អូតង់ ប៉ុន្តែ ចិន ដែលបានពង្រីកដែនឥទ្ធិពលយោធានៅអាស៊ីប៉ាស៊ីហ្វិក គំរាមកំហែង ប្រទេសជិតខាង និងតៃវ៉ាន់ កំពុងតាមដានយ៉ាងយកចិត្តទុកដាក់ ការវិវឌ្ឍនៃសង្រ្គាមរុស្ស៊ីឈ្លានពានអ៊ុយក្រែន។ សម្រាប់ប្រមុខដឹកនាំអូតង់ ចិនអាចរៀនមេរៀនជាច្រើនពីសង្រ្គាមអ៊ុយក្រែន សម្រាប់ការសម្រេចចិត្តរបស់ខ្លួននៅថ្ងៃអនាគត។
ចិន មិនទាន់ប្រតិកម្មនឹងការលើកឡើងរបស់ប្រមុខអង្គការអូតង់ នៅជប៉ុន ប៉ុន្តែ នៅថ្ងៃចន្ទ អ្នកនាំពាក្យរបស់ក្រសួងការបរទេសចិនធ្លាប់បានប្រតិកម្មហើយថា ចិនជាដៃគូ ប៉ុន្តែ មិនមែនជាគូប្រជែង ហើយក៏មិនមែនជាអ្នកគំរាមកំហែងប្រយោជន៍ ឬសន្តិសុខរបស់ប្រទេសណាដែរ។
នៅក្នុងសេចក្តីថ្លែងការណ៍រួម ជាមួយ ប្រមុខដឹកនាំអង្គការអូតង់ នាយករដ្ឋមន្រ្តីជប៉ុន លោកគីស៊ីដា សំដែងក្តីបារម្ភរ ពីការអភិវឌ្ឍអាវុធនុយក្លេអ៊ែររបស់កូរ៉េខាងជើង និងកំណើនសមយុទ្ធយោធា រវាងចិន និងរុស្ស៊ី នៅក្បែរប្រទេសជប៉ុន។
មានប្រទេសសមាជិក ចំនួន៣០ ដែលស្ថិតនៅអឺរ៉ុប និងនៅអាមេរិកខាងជើង អូតង់អញ្ជើញជាលើកទី១ មេដឹកនាំជប៉ុន និងកូរ៉េខាងត្បូងឲ្យចូលរួមក្នុងជំនួបកំពូលកាលពីខែមិថុនាឆ្នាំ២០២២។ ក្រៅពីជំរុញសហប្រតិបត្តិការជាមួយអូតង់ក្នុងវិស័យសន្តិសុខជើងទឹក និងការគ្រប់គ្រងការដឹកជញ្ជូនអាវុធ ជប៉ុនគ្រោងនឹងបង្កើតការិយាល័យតំណាងរបស់ខ្លួននៅអូតង់។
ចិនធ្លាប់បានបរិហាររិះគន់អូតង់ថា កំពុងប្រឹងប្រែងពង្រីកដែនឥទ្ធិពលយោធា ទៅក្នុងតំបន់អាស៊ី ចំណែករុស្ស៊ី ដែលបានចាត់ទុក សង្រ្គាមឈ្លានពានរបស់ខ្លួន នៅអ៊ុយក្រែន ថា ជាបេសកកម្មពិសេស ចោទថា ការពង្រីកដែនយោធារបស់អូតង់នៅអឺរ៉ុបគំរាមកំហែងសន្តិសុខរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ