អូស្រាលីអះអាងថាខ្លួន បានរងនូវសកម្មភាពចារកិច្ចស៊ើបការណ៍សម្ងាត់ពីបរទេស ញឹកញាប់បំផុត
ទីក្រុងកង់បេរ៉ា ប្រទេសអូស្ត្រាលី គឺជាជង្រុកលាក់ខ្លួន សំបូរទៅដោយក្រុមចារកិច្ចបរទេស។ នេះបើផ្អែកតាមការលើកឡើង របស់លោក Mike Burgess ប្រធានផ្នែកស៊ើបការណ៍សម្ងាត់ របស់អូស្ត្រាលី។ លោកម្នាក់នេះអះអាងថា ចារកិច្ចស៊ើបការណ៍សម្ងាត់បរទេស គឺជាការគំរាមមួយដ៏គ្រោះថ្នាក់ មកលើសន្តិសុខជាតិអូស្ត្រាលី។
ចុះផ្សាយនៅថ្ងៃ៖
ស្តាប់ - ០២:១៩
ជាមួយអ្នករាយការណ៍ព័ត៌មាន RFI ប្រចាំទីក្រុងស៊ីដនី លោក Grégory Plesse
អំណេះតទៅ មិនមែនអំពើភេរវកម្មទេ ដែលជាការគំរាម តែគឺសកម្មភាពចារកិច្ចស៊ើបការណ៍សម្ងាត់ ដែលជាការគំរាមដ៏ធំ និងគ្រោះថ្នាក់ មកលើសន្តិសុខជាតិអូស្ត្រាលី។ នេះគឺជាការលើកឡើង របស់លោក Mike Burgess ប្រធានការរិយាល័យស៊ើបការណ៍សម្ងាត់របស់អូស្ត្រាលី ដែលបានបង្ហាញការវាយតម្លៃប្រចាំឆ្នាំ។ លោកបានបញ្ជាក់ថា អូស្ត្រាលី មិនដែលធ្លាប់បានរងនូវការការស៊ើបការណ៍សម្ងាត់ពីបរទេស ធ្ងន់ធ្ងរដូចពេលនេះទេ។ វាគឺជាសកម្មភាពស៊ើបការណ៍ ហើយលូកដៃបន្លំ រំខាន ពីសំណាក់ចារកិច្ចបរទេស។
កម្រិតខ្លាំងឡើងនៃការគំរាមប្រភេទនេះ គឺដោយសារតែទម្ងន់កាន់តែធ្ងន់ នៃតួនាទីរបស់អូស្ត្រាលីនៅក្នុងកិច្ចភូមិសាស្ត្រនយោបាយ តំបន់ឥណ្ឌូប៉ាស៊ីហ្វិក ហើយដែលអូស្ត្រាលី គឺជាសម្ព័ន្ធមិត្តរបស់សហរដ្ឋអាមេរិក។ សកម្មភាពចារកិច្ចទាំងនោះ គឺអូស្រ្តាលីបានរងគ្រោះយ៉ាងញឹកញាប់បំផុត នាពេលកន្លងមកនេះ ដែលមានដូចជាការប៉ុនប៉ងចូលបន្លំជ្រៀតជ្រែក ឬទិញទឹកចិត្តអូសទាញមនុស្សដែលមានតួនាទីធំ ក្នុងរដ្ឋាភិបាល ដើម្បីបានទទួលនូវព័ត៌មានសម្ងាត់។
ដោយមិនចង្អុរឲ្យចំ ថាប្រទេសណាមួយ ដែលជាអ្នកធ្វើសកម្មភាពចារកិច្ចស៊ើបការណ៍សម្ងាត់មកលើអូស្ត្រាលី លោកប្រធានចារកិច្ចអូស្ត្រាលី បានលើកឡើងអំពីប្រទេសមួយចំនួនដែលជាមិត្តអូស្ត្រាលី និងប្រទេសដែលមានរបបដឹកនាំផ្តាច់ការ ហើយដែលធ្លាប់បានប៉ុនប៉ង ដាក់ឧបករណ៍ឈ្លបយកការណ៍ នៅក្នុងម៉ាស៊ីនកុំព្យូទ័ររបស់អ្នកកាសែត នៅពេលពួកគេធ្វើដំណើរទៅយកព័ត៌មាននៅក្រៅប្រទេស។ ប្រតិបត្តិការរបៀបនេះ ត្រូវបានអាជ្ញាធរអូស្ត្រាលី ទប់ស្កាត់បានជារឿយៗ ព្រមទាំងបានទាញសញ្ញាអាសន្ន ឲ្យប្រជាជនប្រទេសខ្លះ មានការប្រុងប្រយ័ត្ន។
លោក Mike Burgess បានអះអាងថា ក្រុមចារកិច្ចបរទេស បានប្រើគ្រប់មធ្យោបាយ ដើម្បីអូសទាញ ទិញទឹកចិត្ត ជនជាតិអូស្ត្រាលីខ្លះ ដែលមានលទ្ធភាព អាចទទួលបានដំណឹង ឬទិន្នន័យសម្ងាត់ផ្ទាល់ខ្លួន ដើម្បីឈានទៅដាក់សំពាធ ឬវាយប្រហារបំបិទមាត់អ្នកប្រឆាំងនឹងរបបដឹកនាំខ្លួន។ យ៉ាងណាមិញ កាលពីសប្តាហ៍កន្លងទៅនេះ ក្រសួងមហាផ្ទៃអូស្ត្រាលី បានឲ្យដឹងថា គេបានបំបែកស្ទាក់បានទាន់ពេលវេលា នូវប្រតិបត្តិការចារកិច្ចមួយ ធ្វើឡើងដោយរបបផ្តាច់ការអ៊ីរ៉ង់ ដែលប៉ុនប៉ងគំរាមសំឡុត សកម្មជននយោបាយប្រឆាំងអ៊ីរ៉ង់ ដែលស្ថិតនៅលើទឹកដីអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ