ប៉េកាំងខឹងច្រឡោតដែលអាមេរិកចាប់ខ្លួនជនជាតិចិនក្នុងរឿងនាំចូលសារធាតុគីមីដើម្បីផលិតថ្នាំញៀនfentanyl
ពេលវេលាតានតឹងនឹងគ្នារវាងអាមេរិក និងចិន មានច្រើនជាងភាពធូរស្រាល។ បន្ទាប់ពីលោកចូ បៃដិននិយាយចាត់បញ្ចូលប្រធានាធិបតីចិន លោកស៊ី ជីនពីងទៅក្នុងបញ្ជីមេដឹកនាំផ្តាច់ការ និងសភាអាមេរិកបោះឆ្នោតពង្រឹងទំនាក់ទំនងពាណិជ្ជកម្មជាមួយតៃវ៉ាន់ វ៉ាស៊ីនតោនបានធ្វើឲ្យប៉េកាំងខឹង ក្តៅស្លឹកត្រចៀកម្តងទៀត ជាមួយការសម្រេចចិត្តចាប់ខ្លួនជនជាតិចិន ក្នុងបទចោទប្រកាន់នាំចូលសារធាតុគីមី សម្រាប់ផលិតគ្រឿងសំយោគដ៏គ្រោះថ្នាក់ Fentanylក្នុងទឹកដីអាមេរិក។
ចុះផ្សាយនៅថ្ងៃ៖
ស្តាប់ - ០២:៤៨
នៅក្នុងសេចក្តីថ្លែងការណ៍កាលពីថ្ងៃសៅរ៍ ក្រសួងការបរទេសចិនថ្កោលទោស និងចាត់ទុកការសម្រេចរបស់ក្រសួងយុត្តិធម៌អាមេរិក ថា ធ្វើឡើងដោយខុសច្បាប់ និងឯកតោភាគី។ នៅថ្ងៃសុក្រ ក្រសួងយុត្តិធម៌អាមេរិកបានសម្រេច ជាលើកទី១ មិនធ្លាប់ ចោទប្រកាន់ក្រុមហ៊ុនចិនចំនួន ៤ និងបុគ្គលិករបស់ពួកគេចំនួន ៨នាក់ ពីបទនាំចូលទៅអាមេរិក នូវសារធាតុគីមី សម្រាប់ផលិតថ្នាំញៀនសំយោគ មរណៈ ឈ្មោះ Fentanil។
តាមក្រសួងយុត្តិធម៌អាមេរិក បុគ្គលិក២រូប ក្នុងចំណោមបុគ្គលិក៨រូប របស់ក្រុមហ៊ុនចិន ទាំង៤ ដែលរងការចោទប្រកាន់ ត្រូវអាជ្ញាធរអាមេរិកចាប់ឃុំខ្លួន នៅកោះហាវ៉ៃ កាលពីថ្ងៃទី ៨មិថុនា មុននឹងត្រូវបញ្ជូនទៅកាន់តុលាការនៅទីក្រុងញូវយ៉ក។ តាមក្រសួងយុត្តិធម៌អាមេរិក ភ្នាក់ងារប្រយុទ្ធប្រឆាំង គ្រឿងញៀនបានបន្លំខ្លួនជាអតិថិជន ចរចាចង់ទិញសារធាតុគីមី ពីបុគ្គលិកចិន ទាំងពីររូបខាងលើ ដែលមានទំនាក់ទំនងជាមួយឃ្លាំងស្តុកមួយនៅទីក្រុងLos Angeles កាលពីខែឧសភាកន្លងទៅ។
ក្រុមហ៊ុនចិនទាំង៤ដែលជាប់ក្នុងសំណាញ់ច្បាប់អាមេរិកមានក្រុមហ៊ុន Amarvel Biotech Anhui Rencheng Technology Anhui Moker New Marterial Technology និងHefei GSK Trade។
បើតាមក្រសួងយុត្តិធម៌អាមេរិក ក្រុមហ៊ុន Amarvel Biotechរងការចោទប្រកាន់ថាបាននាំចូលសារធាតុគីមីជាង ២០០គីឡូក្រាមដើម្បីផលិតថ្នាំញៀនFentanil ប្រមាណ ៥០គីឡូក្រាម ដែលគ្រប់គ្រាន់ដើម្បីសម្លាប់ប្រជាជនអាមេរិកជាង ២៥លាននាក់។
សម្រាប់ក្រសួងការបរទេសចិន ការចាប់ឃុំខ្លួនជនជាតិចិន ពីសំណាក់អាជ្ញាធរអាមេរិកធ្វើឡើងដោយខុសច្បាប់ និងរំលោភសិទ្ធិជាមូលដ្ឋានរបស់ពលរដ្ឋ និងក្រុមហ៊ុនចិន។ “ចិនថ្កោលទោស និងទាមទារឲ្យអាមេរិកត្រូវតែដោះលែងជនជាតិជាបន្ទាន់” នេះបើតាមសេចក្តីថ្លែងការណ៍របស់ក្រសួងការបរទេសចិន ដែលបញ្ជាក់ដែរថា ការចោទប្រកាន់របស់អាជ្ញាធរអាមេរិកនឹងអាចទៅបំផ្លាញ សហប្រតិបត្តិការអាមេរិក ចិន ក្នុងការប្រយុទ្ធប្រឆាំងនឹងការជួញដូរគ្រឿងញៀន។
ថ្នាំញៀន fentanylដែលផលិតដោយងាយស្រួលបំផុត និងមានតម្លៃដ៏ថោក ត្រូវអាមេរិកចាត់ទុកជាដើមហេតុបង្កសោកនាដកម្មខ្លាំងបំផុត នៅអាមេរិក។ Fentanylជាថ្នាំញៀនសំយោគមរណៈ ដែលត្រូវពួកឈ្មួញជួញដូរគ្រឿងញៀននៅប្រទេសម៉ិកស៊ិកលាយផ្សំជាមួយថ្នាំញៀនផ្សេងទៀត និងសារធាតុកគីមី នាំចូលមកពីចិន ដើម្បី បង្កើនឥទ្ធិពល ធ្វើឲ្យអ្នកប្រើប្រាស់កាន់ញៀនខ្លាំង ជាងថ្នាំញៀនហេរ៉ូអ៊ីនដល់ទៅ៣០ ដង។ ជាទូទៅ សារធាតុគីមី របស់ចិន ត្រូវនាំចូលទៅម៉ិកស៊ិក ដើម្បី ផលិតថ្នាំញៀនសំយោគ Fentanylមុននឹងត្រូវពួកជួញដូរគ្រឿងញៀនម៉ិកស៊ិក នាំចូលទៅលក់ចែកចាយនៅអាមេរិក។ ប៉ុន្តែ នៅមួយរយៈចុងក្រោយនេះ អាជ្ញាធរ អាមេរិកសង្កេតឃើញ វត្តមានសារធាតុគីមីគីមី របស់ចិន ចរាចរ ក្នុងទឹកដីអាមេរិក ដោយលែងឆ្លងកាត់ម៉ិកស៊ិកដូចមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ