ជប៉ុនប្រារព្ធខួបរងគ្រាប់បរមាណូនៅហ៊ីរ៉ូស្ហ៊ីម៉ាដោយបរិហារការគំរាមកំហែងនុយក្លេអ៊ែររុស្ស៊ី
ថ្ងៃអាទិត្យទី៦សីហានេះជាគម្រប់ខួប៧៨ឆ្នាំគត់នៃការទម្លាក់គ្រាប់បែកបរមាណូអាមេរិកលើកោះហ៊ីរ៉ូស្ហ៊ីម៉ា។ នាឱកាសនេះ លោកនាយករដ្ឋមន្ត្រីជប៉ុន ហ្វូមីអូ គីស៊ីដា បានបរិហារការគំរាមកំហែងប្រើអាវុធនុយក្លេអ៊ែររបស់រុស្ស៊ីនៅក្នុងសង្គ្រាមលើទឹកដីអ៊ុយក្រែន។
ចុះផ្សាយនៅថ្ងៃ៖
ស្តាប់ - ០១:៤៦
មហន្តរាយនុយក្លេអ៊ែរនៅហ៊ីរ៉ូស្ហ៊ីម៉ា និងណាហ្កាសាគី មិនត្រូវកើតមានឡើងជាថ្មីទេ។ ជប៉ុនជាតិសាសន៍រងគ្រោះបរមាណូតែមួយគត់ក្នុងសម័យសង្គ្រាមលោក បន្តខិតខំជួយពិភពលោករំសាយនុយក្លេអ៊ែរ។ ប៉ុន្តែដំណើរផ្លូវឆ្ពោះទៅសម្រេចកម្មវត្ថុនេះកាន់តែលំបាកឡើងៗ ដោយហេតុតែសហគមន៍អន្តរជាតិខ្វែងគំនិតគ្នាផងនិងការគំរាមកំហែងនុយក្លេអ៊ែររបស់រុស្ស៊ីផង។ នេះជាប្រសាសន៍របស់លោកនាយករដ្ឋមន្ត្រីជប៉ុន ក្នុងពិធីប្រារព្វខួប៧៨ឆ្នាំនៃការទម្លាប់គ្រាប់បែកបរមាណូលើកោះហ៊ីរ៉ូស្ហ៊ីម៉ា ដែលមានភ្ញៀវជាជនសាមញ្ញ ជាជនរងគ្រោះ ជាឥស្សរជនបរទេសមកពី១១១ប្រទេស តែដូចឆ្នាំមុនដែរគ្មានទេរុស្ស៊ីនិងបេឡារុស។
សម្រាប់លោកនាយករដ្ឋមន្ត្រី នៅចំពោះមុខស្ថានភាពគំរាមកំហែងនុយក្លេអ៊ែររុស្ស៊ីបែបនេះ គេកាន់តែចាំបាច់ត្រូវផ្តល់សន្ទុះអន្តរជាតិក្នុងការសម្រេចសាងពិភពលោកគ្មានបរមាណូ។ សហគមន៍អន្តរជាតិត្រូវតែបញ្ចេញសំឡេងរួមតែមួយប្រឆាំងនឹងការប្រើអាវុធនុយក្លេអ៊ែរ។ នេះជាសេចក្តីថ្លែងការណ៍របស់លោកអគ្គលេខាធិការអង្គការសហប្រជាជាតិ អង់តូនីញ៉ូ ហ្គូទែរក៍ ក្នុងថ្ងៃខួបនៃការទម្លាប់គ្រាប់បែកបរមាណូលើកោះហ៊ីរ៉ូស្ហ៊ីម៉ានេះដែរ ដោយបញ្ជាក់អំពីការសោកស្តាយដែលប្រទេសខ្លះយកអាវុធនុយក្លេអ៊ែរមកគ្រវីនិងគំរាមប្រល័យលោក។
សូមរំលឹកថា ការទម្លាក់គ្រាប់បែកបរមាណូលើកោះហ៊ីរ៉ូស្ហ៊ីម៉ាថ្ងៃទី ៦សីហាឆ្នាំ១៩៤៥ បានសម្លាប់មនុស្សអស់ប្រមាណ១៤ម៉ឺននាក់ និង៧៤០០០នាក់ នៅណាហ្កាសាគី បីថ្ងៃក្រោយដោយគ្រាប់នុយក្លេអ៊ែរអាមេរិកទីពីរ ដែលជាការបិទបញ្ចប់សង្គ្រាមលោកលើកទីពីរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ