តុលាការវៀតណាមនឹងកាត់ទោសសេដ្ឋីអចលនទ្រព្យម្នាក់ពីបទគៃបន្លំលុយ ១២,៥ ពាន់លានដុល្លារ
ក្នុងយុទ្ធនាការប្រឆាំងអំពើពុករលួយរបស់វៀតណាម តុលាការនៅក្រុងហូជីមិញនឹងបើកសវនាការជម្រះក្តីកាត់ទោស មហាសេដ្ឋីអចលនទ្រព្យដ៏ល្បីល្បាញម្នាក់ អ្នកស្រី ជឿង មី ឡាន អំពីបទគៃបន្លំលុយ ១២,៥ ពាន់លានដុល្លារ។ នេះបើតាមការប្រកាសដំណឹងរបស់រដ្ឋអំណាចវៀតណាម កាលពីថ្ងៃអាទិត្យ ទី១៧ធ្នូ តែរដ្ឋាភិបាលក្រុងហាណូយ ពុំបានបញ្ជាក់ឲ្យច្បាស់អំពីថ្ងៃបើកសវនាការដំបូង ឲ្យជាក់លាក់នោះឡើយ។
ចុះផ្សាយនៅថ្ងៃ៖
ស្តាប់ - ០២:៤៩
មហាសេដ្ឋី ជឿង មី ឡាន ម្ចាស់ក្រុមហ៊ុន វ៉ាន់ ធីញ ហ្វាត់ ដែលបានបង្កើតតាំងពីឆ្នាំ១៩៩២ ដោយមានជំនួញវិនិយោគជាច្រើន រាប់ទាំងវិស័យសណ្ឋាគារ ភោជនីយដ្ឋាន សំណង់ និង អចលនទ្រព្យ ព្រមទាំងវិស័យហិរញ្ញវត្ថុធនាគារ ទៀតផង។
បើតាមគេហទំព័រផ្លូវការរបស់រដ្ឋអំណាចក្រុងហាណូយ គឺ មហាសេដ្ឋី ជឿង មី ឡាន ត្រូវរដ្ឋអាជ្ញាវៀតណាម ចោទប្រកាន់ ជាច្រើនបទល្មើស។ ក្នុងនោះ មានបទល្មើសគៃបន្លំ បទប្រព្រឹត្តអំពើពុករលួយ និង បទរំលោភច្បាប់ធនាគារ។ តាមប្រភពដដែល អ្នកស្រី ជឿង មី ឡាន ធ្លាប់បានធ្វើសំណើបន្លំខ្ចីប្រាក់ធនាគារ ពីធនាគារពាណិជ្ជកម្មសៃហ្គន ដែលក្រុមហ៊ុនរបស់អ្នកស្រី មានភាគហ៊ុនគ្រប់គ្រង ជាង ៩០%។ ចាប់ពីថ្ងៃទី៩ ខែកុម្ភៈ ឆ្នាំ២០១៨ ដល់ថ្ងៃទី ៧ ខែតុលា ឆ្នាំ២០២២ អ្នកស្រីបានបញ្ជាឲ្យធ្វើសំណើបន្លំខ្ចីប្រាក់ ចំនួន ៩១៦ លើក ដែលសរុបស្មើនឹងទំហំទឹកប្រាក់ ៣០៤ ០០០ ពាន់លានដុង (ស្មើនឹងប្រហែល ១២,៥ ពាន់លានដុល្លារ)។ ទឹកប្រាក់នេះ ស្ទើរតែស្មើនឹង ៣% នៃទំហំប្រាក់ចំណូលក្នុងស្រុកសរុប។
នេះបើតាមបទចោទប្រកាន់របស់រដ្ឋអាជ្ញា ហើយនិងបញ្ជាក់ទៀតថា ក្នុងសំណុំរឿងបទគៃបន្លំលុយនេះ មានមនុស្ស ៨៥ នាក់ផ្សេងទៀត ក៏ជាប់ក្នុងបទចោទប្រកាន់។ ក្នុងនោះ ក៏មានដែរ អតីតបុគ្គលិករដ្ឋម្នាក់ របស់ធនាគាររដ្ឋវៀតណាម ដែលបានទទួលសំណូក ៥,២ លានដុល្លារ ក៏នឹងត្រូវទទួលទោស។
ប៉ុន្មានឆ្នាំចុងក្រោយនេះ រដ្ឋអំណាចវៀតណាម បានធ្វើយុទ្ធនាការទប់ស្កាត់អំពើពុករលួយយ៉ាងច្រើន ប្រឆាំងមន្ត្រីរដ្ឋាភិបាល និង អ្នកជំនួញធំៗគ្រាក់ៗក្នុងប្រទេស។ ជាក់ស្តែង ចាប់តាំងពីឆ្នាំ២០២១ គឺមនុស្សជាង ៣ ៥០០ នាក់ត្រូវរដ្ឋអាជ្ញាចោទប្រកាន់ ហើយក្នុងនោះ មាន ១ ៣០០ នាក់ ជាប់ពាក់ព័ន្ធនឹងបទល្មើសពុករលួយ។ អ្នកដឹកនាំយុទ្ធនាការប្រឆាំងអំពើពុករលួយនេះ គឺលោក ង្វៀន ភូចុង អគ្គលេខាធិការបក្សកុម្មុយនិស្តវៀតណាម។ កាលពីខែមុន ប្រធានាធិបតីវៀតណាមរូបនេះ ក៏បានលើកឡើងថានឹងបន្ត«កម្ចាត់អំពើពុករលួយឲ្យបានលឿននិងឲ្យមានប្រសិទ្ធភាព»។
នៅខែវិច្ឆិកាកន្លងទៅ អគ្គនាយកក្រុមហ៊ុនផលិតភេសជ្ជៈ Tân Hiệp Phát ហើយនិងប្រធានក្រុមហ៊ុនអចលនទ្រព្យ Tân Hoàng Minh Group ដែលមានឈ្មួញនិវិយោគទុនជាង ៦ ៥០០នាក់ ក៏ត្រូវរងបទចោទប្រកាន់របស់រដ្ឋអាជ្ញាវៀតណាមដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ