វៀតណាម៖ ក្រុមហ៊ុនផលិតរថយន្ត VinFast ខាត ២ ពាន់លានដុល្លារ
នៅវៀតណាម ក្រុមហ៊ុនផលិតរថយន្តអគ្គិសនីVinFast បានខាតបង់ ប្រមាណ ២ ពាន់លានដុល្លារ កាលពីឆ្នាំទៅមិញនេះ។ នេះបើយោងតាមសេចក្តីថ្លែងការណ៍របស់ក្រុមហ៊ុន ដែលចេញផ្សាយនៅក្នុងសប្តាហ៍ ដោយបញ្ជាក់ថា ការខាតបង់នេះ ក៏ព្រោះតែពុំបានសម្រេចកម្មវត្ថុលក់ ដូចការគ្រោងទុក។
ចុះផ្សាយនៅថ្ងៃ៖
ស្តាប់ - ០២:៣០
VinFast ជាក្រុមហ៊ុនបុត្រសម្ព័ន្ធរបស់ Vingroup ហើយជា ក្រុមហ៊ុនផលិតរថយន្តអគ្គិសនីឈានមុខគេទី១ នៅវៀតណាម។ ពីទីក្រុងហាណូយ ក្រុមហ៊ុន VinFast បានចេញសេចក្តីប្រកាសព័ត៌មាន ក្នុងសប្តាហ៍នេះ ដោយបញ្ជាក់ថា ខ្លួនខាតបង់ប្រាក់ប្រមាណ ២,៣៩ ពាន់លានដុល្លារ ក្នុងឆ្នាំ២០២៣។ មូលហេតុ ព្រោះតែមិនអាចលក់រថយន្ត បានសម្រេចដូចផែនការគ្រោងទុក។ ផែនការគ្រោងទុក VinFast ចង់លក់រថយន្ត ឲ្យបានចំនួន ៥០ ០០០គ្រឿងក្នុង១ឆ្នាំ ក៏ប៉ុន្តែ ទីបំផុត លក់បានត្រឹមតែ ៣៥ ០០០ គ្រឿងប៉ុណ្ណោះ ដែលវាស្មើនឹងទឹកប្រាក់ប្រហែល ១,០៩ ពាន់លានដុល្លារ។
បើទោះបីជាលក់មិនបានសម្រេចតាមផែនការ តែផ្ទុយទៅវិញ ទុនវិយោគរបស់ក្រុមហ៊ុន VinFast ចេះតែកើនឡើងជាលំដាប់។ សេចក្តីថ្លែងការណ៍របស់ក្រុមហ៊ុន ចុះថ្ងៃព្រហស្បតិ៍ ទី២២កុម្ភៈ បានឲ្យដឹងថា ទុនវិនិយោគរបស់ក្រុមហ៊ុនកាលពីឆ្នាំទៅមិញ បានកើនឡើងប្រមាណ ១,១៩ ពាន់លានដុល្លារ ពោលគឺកើតឡើងប្រមាណជា៩១% ធៀបនឹងឆ្នាំចាស់។
អាស្រ័យហេតុដូច្នេះហើយ ទើបលោក អាញ ង្វៀន ប្រធានគ្រប់គ្រងហិរញ្ញវត្ថុក្រុមហ៊ុន VinFast បានថ្លែងអំណរអំពីលទ្ធផលគួរជាទីទុកចិត្តក្នុងដំណើរការពាណិជ្ជកម្ម។ លទ្ធផលល្អស្តីពីទុនវិនិយោគ ក្នុងឆមាសទី៤ នៃឆ្នាំ២០២៣ អាចជំរុញបង្កើនប្រាក់ចំណូល និងកែសម្រួលដើម្បីទាញផលចំណេញ។ ក្នុងន័យនេះ លោក អាញ ង្វៀន ថាក្រុមហ៊ុនបន្តផ្តោតការយកចិត្តទុកដាក់លើការវិនិយោគទុនបន្ថែម, ពង្រឹងរក្សាលទ្ធផលឲ្យនៅថេរល្អ, ហើយពង្រឹងគុណភាពនិងតម្លៃ។
បង្កើតឡើងឆ្នាំ២០១៧, ក្រុមហ៊ុនរថយន្តអគ្គិសនីវៀតណាម VinFast មានគោលដៅប្រកួតប្រជែកជាមួយក្រុមហ៊ុនអាមេរិក Tesla និងក្រុមហ៊ុនចិន BYD។ ជាបន្តបន្ទាប់ ក្រុមហ៊ុន VinFast បានបើកសាខាហាងលក់ នៅប្រទេសអាល្លឺម៉ង់ បារាំង ហូឡង់ សហរដ្ឋអាមេរិក កាណាដា ជាដើម។
ចំពោះឆ្នាំ២០២៤ ក្រុមហ៊ុន VinFast បានដាក់ផែនការលក់រថយន្ត ចំនួន១០ម៉ឺនគ្រឿង ហើយបើកទូលាយទីផ្សារអន្តរជាតិ ថែមទៀត។ ដើមឆ្នាំនេះ VinFast បានបើករោងចក្រផលិតនៅប្រទេសឥណ្ឌា ដែលមានសមត្ថភាពផលិតរថយន្តអគ្គិសនី ចំនួន ១៥០ ០០០ គ្រឿងក្នុង១ឆ្នាំៗ។ ក្រុមហ៊ុនរថយន្តវៀតណាមនេះ គ្រោងនឹងវិនិយោគទុន ដើម្បីបង្កើតរោងចក្រផលិតអាគុយអគ្គិសនី នៅឥណ្ឌូណេស៊ី។ លើសពីនេះ ក្រុមហ៊ុនវៀតណាម VinFast ក៏គ្រោងនឹងវិនិយោគថែមទៀត នៅហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ