អឺរ៉ុប ប្រឈមនឹងការខាតបង់ច្រើនក្នុងករណីមិនរកស៊ីជាមួយ Huawei
អឺរ៉ុប នាខណៈនេះ កំពុងតែស្ថិតនៅក្នុងការពិចារណា ថាតើគួរឈប់ ឬបន្តការរកស៊ីជាមួយក្រុមហ៊ុនទូរគមនាគមន៍ដ៏ធំរបស់ចិន គឺក្រុមហ៊ុន Huawei។ ក៏ប៉ុន្តែ ប្រសិនណាបើអឺរ៉ុប ដើរតាមអាមេរិក ដោយហាមប្រាមមិនឲ្យក្រុមហ៊ុន Huawei ដំឡើងបច្ចេកវិទ្យាជំនាន់ចុងក្រោយគេ ដែលគេស្គាល់ថា 5G ទេនោះ ក្រុមហ៊ុនប្រតិបត្តិករទូរស័ព្ទចល័តរបស់អឺរ៉ុប ប្រឈមនឹងការខាតបង់ទឹកប្រាក់ប្រមាណជា ៦២ ពាន់លានដុល្លារឯណោះ។ នេះបើយោងតាម ការសិក្សាវាយតម្លៃថ្មីមួយ ដែលមើលឃើញដោយទីភ្នាក់ងារព័ត៌មានបារាំង AFP។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ប្រសិនបើអឺរ៉ុបហាមឃាត់បច្ចេកវិទ្យារបស់ Huawei និង ហាមប្រាមការផ្គត់ផ្គង់គ្រឿងបរិក្ខាររបស់ក្រុមហ៊ុនចិន ZTE ក្នុងគម្រោងរាយបណ្តាញ 5G នោះ ក្រុមហ៊ុនប្រតិបត្តិករទូរស័ព្ទចល័តរបស់អឺរ៉ុប មិនត្រឹមប្រឈមនឹងការខាត់បង់ទឹកប្រាក់ដ៏ច្រើនសន្ធឹកសន្ធាប់តែមួយមុខនោះទេ។ ក៏ប៉ុន្តែក្រុមហ៊ុន ក៏នឹងត្រូវប្រឈមនឹងភាពយឺតយ៉ាវក្នុងការទទួលបានប្រព័ន្ធ 5G ជំនាន់ចុងក្រោយគេបង្អស់ សម្រាប់អតិថិជនរបស់ខ្លួនរហូតដល់រយៈពេលរាប់ខែឯណោះ។
យោងតាមការវាយតម្លៃរបស់ GSM ដែលជាសមាគមតំណាងឱ្យប្រតិបត្តិករបណ្តាញទូរស័ព្ទចល័តនៅជុំវិញពិភពលោក ក្រុមហ៊ុនចិនទាំងពីរគឺក្រុមហ៊ុន Huawei និង ZTE តំណាងឲ្យ ៤០ ភាគរយ នៃទីផ្សារផ្គត់ផ្គង់បរិក្ខារទូរស័ព្ទនៅអឺរ៉ុប។
មួយវិញទៀត Huawei គឺជាក្រុមហ៊ុន ដែលឈានមុខគេលើវិស័យបច្ចេកវិទ្យា 5G ហេតុដូច្នោះហើយ ប្រសិនណាបើ កាត់ផ្តាច់កិច្ចសហប្រតិបត្តិការជាមួយក្រុមហ៊ុនចិន នោះទីផ្សារអឺរ៉ុបនឹងក្រឡាប់ចាក់ តាមរយៈការឡើងថ្លៃគ្រឿងបរិក្ខារទូរស័ព្ទ និងសេវាក្នុងការដាក់ដំណើរការប្រព័ន្ធ 5G។
តែទោះជាយ៉ាងណាក្តី រហូតមកទល់នឹងពេលនេះ សហភាពអឺរ៉ុប ព្រមទាំងបណ្តាប្រទេសជាសមាជិក នៅមិនទាន់សម្រេច ហាមប្រាមការរកស៊ីរបស់ Huawei នៅក្នុងទឹកដីរបស់ខ្លួន ដូចការស្នើសុំរបស់សហរដ្ឋអាមេរិក ដែលជាសម្ព័ន្ធមិត្តនៅឡើយនោះទេ។
តែទោះជាបែបនេះក្តី មានក្រុមហ៊ុនប្រតិបត្តិករមួយចំនួន នៅក្នុងប្រទេសអង់គ្លេស បានប្រកាសដកខ្លួន លែងរកស៊ីជាមួយនឹងក្រុមហ៊ុន Huawei ទៀតហើយ ក្រោយការប្រកាសទាមទាររបស់អាមេរិក។
គួររំឭកជូនដែរថា នៅមួយរយៈពេលចុងក្រោយនេះ រដ្ឋបាលអាមេរិក ដឹកនាំដោយលោកត្រាំ បានដាក់ចេញនូវទណ្ឌកម្មជាច្រើន ប្រឆាំងទៅនឹងក្រុមហ៊ុន Huawei របស់ចិន ដែលក្នុងនោះក៏មានផងដែរ នូវសេចក្តីហាមប្រាមមិនឲ្យក្រុមហ៊ុនទូរគមនាគមន៍របស់ អាមេរិកលក់បច្ចេកវិទ្យាទៅឲ្យ Huawei។
មិនតែប៉ុណ្ណោះ អាមេរិកថែមទាំងបានទាមទារឲ្យអឺរ៉ុប និងបណ្តាប្រទេសសម្ព័ន្ធមិត្តទាំងអស់របស់ខ្លួន ឈប់ប្រើប្រាស់បច្ចេកវិទ្យា 5G របស់ Huawei ពីព្រោះថា Huawei គឺជាក្រុមហ៊ុនឈ្លបយកការណ៍ និងបម្រើផលប្រយោជន៍ឲ្យរដ្ឋាភិបាលក្រុងប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ