NGO៖ទប់ស្កាត់ព័ត៌មានក្លែងក្លាយ និងការមិនជឿទុកចិត្តជាកត្តាចាំបាច់ដើម្បីឲ្យវ៉ាក់សាំងបង្ការកូវីដ១៩ ទទួលបានជោគជ័យ
ប្រធានអង្គការកាកបាទក្រហម និងអឌ្ឍចន្ទក្រហមអន្តរជាតិលោកហ្រ្វង់សេស្កូ រ៉ូកាបានបញ្ជាក់នៅថ្ងៃចន្ទ ទី៣០ វិច្ឆិកាថា ដើម្បីឲ្យវ៉ាក់សាំងបង្ការកូវីដ១៩ ទទួលបានជោគជ័យ គេត្រូវប្រយុទ្ធប្រឆាំងក្នុងពេលតែមួយទល់នឹងព័ត៌មានក្លែងក្លាយ និងការមិនជឿទុកចិត្ត។ លោកហ្រ្វង់សេស្កូ រ៉ូកាបានបន្ថែមដោយព្រមានថា ការមានវ៉ាក់សាំងមួយនៅមិនទាន់គ្រប់គ្រាន់ដើម្បីទប់ស្កាត់ការរាលដាលនៃជំងឺកូវីដ១៩ ឡើយ។ ទន្ទឹមគ្នានេះ លោករ៉ូកាក៏បានលើកឡើងពីភាពមិនទទួលបានព័ត៌មានរបស់សហគមន៍ស្តីពីជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:១២
ប្រធានអង្គការកាកបាទក្រហម និងអឌ្ឍចន្ទក្រហមអន្តរជាតិលោកហ្រ្វង់សេស្កូ រ៉ូកាបានថ្លែងយ៉ាងដូចនេះនៅក្នុងកិច្ចប្រជុំកំពូលនៃថ្នាក់ដឹកនាំពិភពលោករៀបចំដោយមហាសន្និបាតអង្គការសហប្រជាជាតិកាលពីថ្ងៃព្រហស្បតិ៍ និងថ្ងៃសុក្រសប្តាហ៍កន្លងទៅ។ លោកហ្រ្វង់សេស្កូ រ៉ូកាបានសម្តែងក្តីបារម្ភពីកំណើននៃភាពមន្ទិលសង្ស័យក្នុងលោកលើអនាគតវ៉ាក់សាំងបង្ការកូវីដ១៩។ ការលើកឡើងនេះដោយលោករ៉ូកាបានសំអាងលើលទ្ធផលនៃការសិក្សាថ្មីៗរបស់ Johns Hopkins University នៅក្នុង ៦៧ប្រទេសចន្លោះខែកក្កដា និងតុលាដែលបង្ហាញថា ការទទួលយកអនាគតវ៉ាក់សាំងបង្ការកូវីដ១៩ បានធ្លាក់ចុះគួរឲ្យកត់សម្គាល់នៅក្នុងប្រទេសមួយចំនួន។ ជាក់ស្តែងនៅជប៉ុន មានការថយចុះពី ៧០% ទៅ ៥០% និងនៅបារាំងមានការថយចុះពី ៥១% ទៅ ៣៨%។
ក្រៅពីបស្ចិមលោក ភាពមន្ទិលសង្ស័យ និងការមិនជឿទុកចិត្តលើវ៉ាក់សាំងក៏មាននៅក្នុងប្រទេសអាហ្រ្វិកចំនួន ៨ប្រទេស គឺសាធារណរដ្ឋប្រជាធិបតេយ្យកុងហ្គោ កាមេរ៉ូន ហ្កាបុង ស៊ីមបាវេ ស៊ីរ៉ាឡេអូន រវ៉ាន់ដា ឡេសូតូ និងប្រទេសកេនយ៉ា នេះជាការអះអាងរបស់លោកហ្រ្វង់សេស្កូ រ៉ូកា។ តាមប្រធានអង្គការកាកបាទក្រហម និងអឌ្ឍចន្ទក្រហមអន្តរជាតិរូបនេះដដែល មានពលរដ្ឋកាន់តែច្រើននៅក្នុងប្រទេសអាហ្រ្វិកទាំងនេះយល់ឃើញថា វីរុសកូវីដ១៩ មិនអាចឆ្លងទៅយុវជន ឬប្រជាជនអាហ្រ្វិក រួមទាំងគិតថា ព័ត៌មានស្តីពីវត្តមានវីរុសកូវីដ១៩ ជារឿងមិនពិត ឬថា វីរុសនេះបានរលាយបាត់ហើយ។ ត្រង់ចំណុចនេះត្រូវបានលោករ៉ូកាយល់ថា គឺមកពីពលរដ្ឋទាំងនោះមិនបានទទួលព័ត៌មានគ្រប់គ្រាន់ និងច្បាស់លាស់ទាក់ទងនឹងជំងឺកូវីដ១៩។
ទន្ទឹមគ្នានេះ លោករ៉ូកាក៏បានលើកឡើងពីសហគមន៍មួយចំនួនក្នុងលោកដែលកំពុងបន្តមិនបានដឹងពីវត្តមានជំងឺកូវីដ១៩។ ជាក់ស្តែងនៅក្នុងប្រទេសប៉ាគីស្ថាន ប្រជាជនដែលអង្គការកាកបាទក្រហម និងអឌ្ឍចន្ទក្រហមអន្តរជាតិបានសួរ មាន ១០% បានឆ្លើយថា ពួកគេមិនបានដឹងពីមានវត្តមានជំងឺកូវីដ១៩ ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ