បារាំងនិងអាល្លឺម៉ង់ ខ្វែងគំនិតគ្នា រឿងបញ្ឈប់គម្រោងNord Stream 2 ដើម្បីដាក់សំពាធលើរុស្ស៊ី
កាលពីថ្ងៃទី១កុម្ភៈ រដ្ឋាភិបាលបារាំង និងអាល្លឺម៉ង់ បានបង្ហាញការខ្វែងគំនិត ទាក់ទិននឹងការចាត់វិធានការដាក់សំពាធ លើរដ្ឋាភិបាលរុស្ស៊ី ឲ្យដោះលែងលោកអាឡិចសី ណាវ៉ាល់នី និងសកម្មជននយោបាយផ្សេងទៀត។ បារាំង ចង់ឲ្យអាល្លឺម៉ង់ សម្រេចបញ្ឈប់គម្រោងសាងសង់បំពង់បញ្ហូឧស្ម័នក្រោមសមុទ្រ ឈ្មោះគម្រោងNord Stream 2។ តែភាគីអាល្លឺម៉ង់ អះអាងថាគម្រោងបំពង់បង្ហូរឧស្ម័នរុស្ស៊ីនេះ នឹងនៅតែបន្ត ព្រោះវាជារឿងសេដ្ឋកិច្ច មិនពាក់ព័ន្ធនឹងនយោបាយទេ។
ចុះផ្សាយនៅថ្ងៃ៖
ស្តាប់ - ០២:៣៣
លោកស្រី Martina Fietz អ្នកនាំពាក្យរដ្ឋាភិបាលអាល្លឺម៉ង់ បានបញ្ជាក់ប្រាប់អ្នកកាសែត នៅរសៀលថ្ងៃទី១កុម្ភៈថា រដ្ឋាភិបាលអាល្លឺម៉ង់ មិនផ្លាស់នូវគោលជំហរ ដែលគាំទ្រគម្រោង Nord Stream 2 ឡើយ ពោលគឺដំណើរការសាងសង់បំពង់បង្ហូរឧស្ម័នពីរុស្ស៊ី ចូលអាល្លឺម៉ង់ នឹងនៅតែបន្តដូចប្រក្រតី។
ការអះអាងនេះ គឺជាការឆ្លើយតបទៅនឹងការលើកឡើង របស់រដ្ឋលេខាធិការបារាំង ទទួលបន្ទុកកិច្ចការអឺរ៉ុប លោក Clément Beaune ដែលបាននិយាយនៅតាមវិទ្យុថា រដ្ឋាភិបាលបារាំង ចង់ឲ្យរដ្ឋាភិបាលអាល្លឺម៉ង់ ចាប់ផ្តើមពិចារណា ក្នុងការបញ្ឈប់គម្រោង Nord Stream 2 ដើម្បីដាក់សំពាធលើរដ្ឋាភិបាលរបស់លោកពូទីន ដែលបានចាប់លោក អាឡិចសី ណាវ៉ាល់នី ដាក់ឃុំ និងបានឃាត់ខ្លួនសកម្មជនបាតុកររុស្ស៊ី ជាច្រើនពាន់នាក់ផ្សេងទៀត នាប៉ុន្មានសប្តាហ៍ចុងក្រោយនេះ។
គួរបញ្ជាក់ថា គម្រោង Nord Stream 2 ដែលមានតម្លៃប្រមាណជាង៩ពាន់លានអឺរ៉ូ គឺជាគម្រោងសាងសង់បំពង់បង្ហូរឧស្ម័នពីរុស្ស៊ី ចូលមកអឺរ៉ុបខាងលិច ដោយឆ្លងកាត់សមុទ្រខាងជើង មុននឹងមកដល់អាល្លឺម៉ង់។ តាមពិតគម្រោងដ៏ចម្រូងចម្រាស់នេះ ធ្លាប់ត្រូវបានគេរិះគន់អាល្លឺម៉ង់ ជាច្រើនដងមកហើយ។ សហរដ្ឋអាមេរិក បានសម្តែងការមិនពេញចិត្ត ដោយលើកឡើងថា គម្រោងនេះ នឹងធ្វើឲ្យអឺរ៉ុបចាញ់ប្រៀប ត្រូវក្លាយជាអ្នកពឹងផ្អែកលើថាមពលរបស់រុស្ស៊ី។ តែយ៉ាងណា រដ្ឋាភិបាលអាល្លឺម៉ង់ បានអះអាងច្រើនលើកច្រើនសា ថាគម្រោងនេះគឺជាគម្រោងសេដ្ឋកិច្ច ដោយមិនអាចយកវាទៅឡូកឡំ នឹងបញ្ហានយោបាយបានទេ។
ក៏ប៉ុន្តែនៅក្រោយការចាប់ខ្លួនលោកអាឡិចសី ណាវ៉ាល់នី កាលថ្ងៃទី១៧មករា មានមតិបានលើកឡើងកាន់តែខ្លាំង ចង់ឲ្យអាល្លឺម៉ង់បោះបង់ចោលគំរោងនេះ ដើម្បីដាក់ទណ្ឌកម្មលើរុស្ស៊ី។ យ៉ាងណាមិញ លោក Steffen Seibert អ្នកនាំពាក្យលោកស្រីមែរកិល បានទទួលស្គាល់កាលពីសប្តាហ៍មុនថា មានប្រទេសអឺរ៉ុបច្រើនផ្សេងទៀត ដែលមិនពេញចិត្តគម្រោងនេះ។ ដូចគ្នាដែរ រដ្ឋលេខាធិការអាល្លឺម៉ង់ ទទួលបន្ទុកកិច្ចការបរទេស បានលើកឡើងកាលពីចុងសប្តាហ៍មុន ថារដ្ឋាភិបាលអាល្លឺម៉ង់ កំពុងតែជជែកគ្នាដោយលំបាក ជាមួយប្រទេសអឺរ៉ុបផ្សេងទៀត ទាក់ទិននឹងគម្រោងនេះ។
គួរបញ្ជាក់ផងដែរថា ប្រមាណ២សប្តាហ៍មកហើយ ដែលប្រជាជនរុស្ស៊ីរាប់ម៉ឺននាក់ បានធ្វើបាតុកម្ម ទាមទារឲ្យដោះលែងលោកអាឡិចសី ណាវ៉ាល់នី ព្រមទាំងបរិហារអំពើពុករលួយរបស់បក្សពួកលោកពូទីន។ កាលពីថ្ងៃអាទិត្យទី៣១មករា អាជ្ញាធររុស្ស៊ីបានចាប់ខ្លួនបាតុករ ប្រមាណ៥០០០នាក់។ នៅថ្ងៃទី១កុម្ភៈ រដ្ឋអាជ្ញារុស្ស៊ី បានប្រាប់ឲ្យដឹងថា គេចង់ស្នើ ឲ្យដាក់លោកអាឡិចសី ណាវ៉ាល់នី នៅក្នុងឃុំជារៀងរហូត។ លោកJosep Borrell ប្រមុខការទូតអឺរ៉ុប បានបញ្ជាក់ថា លោកនឹងស្នើសុំជួបលោកអាឡិចសី ណាវ៉ាល់នី នៅក្នុងពេលលោកបំពេញទស្សនកិច្ចនៅក្រុងម៉ូស្គូ នៅរវាងថ្ងៃទី៤ ដល់ទី៦កុម្ភៈខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ