លោកម៉ាក្រុងអះអាងថា នឹងបន្តរក្សាការសុន្ទនា ទាក់ទងជាមួយលោកពូទីន
កាលពីថ្ងៃព្រសហ្បតិ៍ទី១កញ្ញា នៅក្នុងកម្មវិធីប្រចាំឆ្នាំ ជួបជុំជាមួយអគ្គរដ្ឋទូតបារាំងទាំងអស់ ដែលត្រូវចេញទៅបំពេញការងារ នៅតាមប្រទេសរៀងៗខ្លួន លោកប្រធានាធិបតីបារាំង អេម៉ានុយអែល ម៉ាក្រុង បានថ្លែងសុន្ទរកថា ដោយបានលើកឡើងពីស្ថានភាពលំបាក ដែលពិភពលោកយើងកំពុងជួបប្រទះ ក្នុងនោះមានដូចជាវិបត្តិសេដ្ឋកិច្ច កង្វះថាមពល និងស្បៀងអាហារជាដើម។ វិបត្តិធ្ងន់ធ្ងរ ដែលបានបង្កឡើងមួយផ្នែកធំ ដោយសារតែសង្គ្រាមនៅអ៊ុយក្រែន ដែលរុស្ស៊ីបានដុតបញ្ឆេះឡើង។ តែយ៉ាងណា លោកម៉ាក្រុង បានអះអាង លោកនឹងបន្ត រក្សាការសន្ទនា ជាមួយលោកប្រធានាធិបតីពូទីនជានិច្ច ព្រោះវាជារឿងចាំបាច់ ដើម្បីកសាងសន្តិភាពទៅថ្ងៃខាងមុខ។
ចុះផ្សាយនៅថ្ងៃ៖
សម្រង់ប្រសាសន៍ របស់លោកប្រធានាធិបតីម៉ាក្រុង
"យើងត្រូវតែត្រៀមខ្លួន ប្រុងប្រៀបនឹងករណីសង្គ្រាមអូសបន្លាយយូរ។ ប្រឈមនឹងសង្គ្រាមយូរយារនេះ យើងត្រូវតែអនុវត្តវិធានការ ដើម្បីចៀសវាងការប្រឈមមុខដាក់គ្នា ហើយឈានទៅរៀបចំស្តារសន្តិភាព។ រៀបចំកសាងសន្តិភាព គឺមានន័យថាបារាំង នឹងនៅតែបន្តនិយាយជាមួយគ្រប់ភាគីទាំងអស់ ដូចដែលខ្ញុំបានធ្វើកន្លងមក តាំងពីដំបូង រហូតដល់ប៉ុន្មានថ្ងៃចុងក្រោយនេះ ទាក់ទិននឹងការរៀបចំដំណើរទៅដល់ របស់អ្នកជំនាញAIEA។ ខ្ញុំនឹងបន្តនិយាយជាមួយភាគីរុស្ស៊ី ព្រោះគ្រប់ចំណុចទាំងអស់ រុស្ស៊ីមានតួនាទីចាំបាច់ ហើយក៏ដើម្បីរៀបចំកសាងសន្តិភាពទៅថ្ងៃខាងមុខដែរ។
មានន័យថា នៅគ្រប់ពេលវេលា កំឡុងពេលជម្លោះសង្គ្រាមនេះ គឺយើងត្រូវតែចៀសវាង ការទាស់ទែង ឬការប៉ះទង្គិចគ្នា។ ជាក់ស្តែងដូចជានៅពេលយើងនិយាយអំពី ប្រព័ន្ធនុយក្លេអ៊ែរស៊ីវីល។ ហើយក៏មានន័យថា យើងត្រូវចាប់ផ្តើមត្រួសត្រាយផ្លូវ ដើម្បីឈានទៅបើកការចរចាសន្តិភាព រវាងភាគីទាំង២។ ការចរចា ដែលភាគីទាំង២ជាអ្នកសម្រេចថាធ្វើនៅពេលណា ដោយរបៀបណា ក្នុងលក្ខខណ្ឌអ្វីខ្លះ មិនមែនបារាំងឬអឺរ៉ុប ជាអ្នកចង់ ហើយដាក់កំហិតនោះទេ។ ដូច្នេះ យើងត្រូវតែធ្វើគ្រប់យ៉ាង ដើម្បីឲ្យលទ្ធភាព នៃការចូលតុចរចាសន្តិភាព រវាងភាគីរុស្ស៊ី អាចអ៊ុយក្រែន អាចក្លាយជាការពិត។"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ