អ្នកវិទ្យាសាស្រ្តអូស្រ្តាលី វ័យ១០៤ឆ្នាំ ធ្វើអត្តឃាតដោយមានជំនួយពីគ្រូពេទ្យ នៅស្វីស
អ្នកវិទ្យាសាស្ត្រអូស្ត្រាលីវ័យ១០៤ឆ្នាំម្នាក់ លោក David Goodall បានធ្វើដំណើរទៅកាន់ប្រទេសស្វីស ដើម្បីធ្វើអត្តឃាតខ្លួនឯងដោយមានជំនួយពីអ្នកជំនាញផ្នែកវិជ្ជសាស្រ្ត។ បុរសរូបនេះ សង្ឃឹមថា ប្រទេសអូស្រ្តាលីដែលជាប្រទេសកំណើតរបស់លោក និងប្រទេសផ្សេងៗទៀត នឹងធ្វើការពិចារណាឡើងវិញនូវការបង្កើតច្បាប់អនុញ្ញាតអោយមានការធ្វើអត្តឃាតដោយមានជំនួយពីអ្នកជំនាញខាងវិជ្ជសាស្រ្ត។
ចុះផ្សាយនៅថ្ងៃ៖ កែប្រែថ្ងៃទី៖
កាលពីថ្ងៃព្រហស្បត្តិ៍ លោក David Goodall ដែលជាអ្នកវិទ្យាសាស្រ្តផ្នែកជីវវិទ្យាមួយរូប បានបញ្ចប់ជីវិតរបស់ខ្លួនដោយមានជំនួយពីអ្នកជំនាញផ្នែកវិជ្ជសាស្រ្ត នៅក្នុងប្រទេសស្វីស។ លោកធ្លាប់បានព្យាយាមធ្វើអត្តឃាតខ្លួនឯងម្តងរួចមកហើយកាលពីដើមឆ្នាំ២០១៨នេះ តែពុំទទួលបានជោគជ័យ ហើយត្រូវបានហាមឃាត់ពីការស្វែងរកជំនួយក្នុងការបញ្ចប់ជីវិតរបស់លោកក្នុងប្រទេសអូស្រ្តីលី។ ហេតុដូច្នេះ ទើបលោកសម្រេចចិត្តធ្វើដំណើរទៅ ប្រទេសស្វីស ដែលមានច្បាប់អនុញ្ញាតការធ្វើអត្តឃាតប្រភេទនេះ។
លោក Goodall បានទៅដល់ប្រទេសស្វីសតាមរយៈជំនួយពីអង្គការ Exit International ដែលជាអង្គការផ្តល់ការប្រឹក្សាយោបល់ចំពោះបញ្ហាបញ្ចប់ជីវិត និងការធ្វើអត្តឃាតដោយមានជំនួយពីអ្នកជំនាញ។
មួយថ្ងៃមុនការធ្វើអត្តឃាតរបស់លោក លោក Goodall បានប្រាប់ទៅកាន់អ្នកសារព័ត៌មានថា លោកពុំមានមានជំងឺអ្វីធ្ងន់ធ្ងរនោះទេ។ មូលហេតុចំបងដែលលោកចង់បញ្ចប់ជីវិតរបស់ខ្លួន គឺដោយសារគុណភាពនៃជីវិតរបស់លោកបានធ្លាក់ចុះយ៉ាងខ្លាំង ដោយសារវ័យជរារបស់លោក។
លោក Goodall បានអោយដឹងទៀតថា លោកចង់បញ្ចប់ជីវិតរបស់ខ្លួននៅក្នុងប្រទេសកំណើត ហើយលោកមានការសោកស្តាយយ៉ាងខ្លាំងដែលប្រទេសអូស្រ្តាលីពុំមានច្បាប់អនុញ្ញាតអោយមានជំនួយអត្តឃាត ដូចនៅប្រទេសស្វីស។ លោកសង្ឃឹមថា ប្រទេសអូស្រ្តាលីនិងប្រទេសផ្សេងៗទៀត នឹងធ្វើការពិចារណាឡើងវិញនូវការបង្កើតអោយមានច្បាប់ប្រភេទនេះ។
សូមបញ្ជាក់ថា នៅក្នុងប្រទេសអូស្ត្រាលី មានតែរដ្ឋ Victoria មួយប៉ុណ្ណោះដែលមានច្បាប់អនុញ្ញាតអោយមានជំនួយអត្តឃាតនេះ តែច្បាប់នេះនឹងចូលជាធរមាននៅក្នុងខែមិថុនាឆ្នាំ២០១៩ ហើយច្បាប់នេះប្រើបានតែចំពោះអ្នកជំងឺដែលមានសភាពធ្ងន់ធ្ងរ និងមិនអាចរស់បានលើសពី៦ខែ។
នាពេលបច្ចុប្បន្ន ច្បាប់នៅក្នុងប្រទេសស្វីសអនុញ្ញាតអោយបុគ្គលរូបណាដែលមានស្មារតីគ្រប់គ្រាន់ និងមានការតាំងចិត្តយ៉ាងម៉ុតមាំក្នុងការធ្វើអត្តឃាតខ្លួនឯងរយៈពេលយូរមកហើយ មានសិទ្ធិស្នើសុំការស្លាប់ដោយស្ម័គ្រចិត្តតាយរយៈជំនួយរបស់អ្នកជំនាញវិជ្ជសាស្រ្តនេះ។ តែបុគ្គលនោះត្រូវមានកាយសម្បទាគ្រប់គ្រាន់ក្នុងការធ្វើសកម្មភាពចុងក្រោយដោយខ្លួនឯង ឧទាហរណ៍ដូចជា ក្នុងករណីរបស់លោក Goodall លោកត្រូវបើកបង្ហូរថ្នាំសំលាប់ខ្លួនចូលទៅក្នុងសរសៃឈាមរបស់លោកដោយខ្លួនឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ