២០១២ ឆ្នាំវដ្តនៃការផ្ទុះជំងឺគ្រុនឈាម
ក្រុមគ្រូពេទ្យបានសម្តែងការព្រួយបារម្ភចំពោះការផ្ទុះឡើងនៃជំងឺគ្រុនឈាមដោយសារឆ្នាំ២០១២ គឺជាវដ្តនៃការផ្ទុះជំងឺដ៏គ្រោះថ្នាក់នេះ។ ១៤សប្តាហ៍ដើមឆ្នាំនេះ មានករណីគ្រុនឈាមជាង១៣០០ករណីហើយ។ ក្នុងចំណោមនោះមានករណីស្លាប់៨នាក់។ យុទ្ធនាការប្រយុទ្ធនឹងជំងឺគ្រុនឈាមត្រូវបានប្រារព្វធ្វើនៅថ្ងៃព្រហស្បតិ៍នេះ ដើម្បីបញ្ជូនសារប្រុងប្រយ័ត្នដល់ពលរដ្ឋខ្មែរទូទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
របាយការណ៍របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្របង្ហាញថា ក្នុងរយៈពេល១៤សប្តាហ៍ដើមឆ្នាំ២០១២នេះ មានកើតករណីគ្រុនឈាម១៣៩៣ករណី ដែលក្នុងចំណោមនោះមានស្លាប់៨ករណី។ ស្ថានភាពនេះក៏បានបង្ហាញអោយឃើញកំណើននៃអ្នកឈឺបើធៀបជាមួយឆ្នាំ២០១១ដែលមានតែ៣៣៩នាក់ និងស្លាប់តែ៤នាក់នោះ។
អ្វីដែលធ្វើអោយក្រុមគ្រូពេទ្យកម្ពុជាព្រួយបារម្ភខ្លាំងនោះគឺ ឆ្នាំ២០១២នេះ គឺវដ្តនៃការផ្ទុះជំងឺគ្រុនឈាម ហើយករណីផ្ទុះជំងឺគ្រុនឈាមនៅឆ្នាំនេះក៏កំពុងដើរតាមគន្លងនៃឆ្នាំ២០០៧ផងដែរ។ វដ្តនៃការផ្ទុះជំងឺគ្រុនឈាមមានរយៈពេល៥ឆ្នាំ។ ឆ្នាំ២០០៧ កាលណោះ ក្នុងរយៈពេល១៤សប្តាហ៍ដើមឆ្នាំដូចគ្នា មានករណីគ្រុនឈាមរហូតដល់១៩០៤ករណី ក្នុងនោះមានស្លាប់១៦នាក់។
សេចក្តីព្រួយបារម្ភនេះ ត្រូវបានផ្សាយអោយដឹងនៅក្នុងយុទ្ធនាការប្រឆាំងជំងឺគ្រុនឈាមនៅព្រឹកថ្ងៃទី១៩មេសានេះ ក្រោមប្រធានបទៈ “បង្កាជំងឺគ្រុនឈាម ជាកាតព្វកិច្ចរបស់យើងគ្រប់គ្នា”។
នៅក្នុងយុទ្ធនាការប្រយុទ្ធជំងឺគ្រុនឈាមដែលមានការចូលរួមពីតំណាងក្រសួងពាក់ព័ន្ធ រដ្ឋមន្ត្រីក្រសួងសុខាភិបាល រដ្ឋមន្ត្រីក្រសួងព័ត៌មាន តំណាងក្រសួងអប់រំ និងស្ថាប័នអន្តរជាតិនានាដែលធ្វើការងារដើម្បីសុខមាលភាពប្រជាពលរដ្ឋ បានបង្ហាញអំពីវិធានការទប់ស្កាត់និងបង្ការជំងឺគ្រុនឈាម តាមរយៈការដាក់ថ្នាំអាបែត សំអាតទីធ្លា សំអាតរបស់របរដែលអាចដក់ទឹកបានជាដើម។ ក្រសួងសុខាភិបាលបានត្រៀមចែកចាយថ្នាំអាបែតចំនួន២៧០តោនដល់ពលរដ្ឋដែលក្នុងសហគមន៍ដែលទទួលរងការគំរាមកំហែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ