សមាជិកសភាគណបក្សសមរង្ស៊ី៥នាក់ស្ម័គ្រចិត្តលាចេញពីតំណែង
គណបក្សសមរង្ស៊ីមិនទទួលយកការបកស្រាយរបស់ក្រុមប្រឹក្សាធម្មនុញ្ញឡើយ ហើយកំពុងបន្តអនុវត្តយុទ្ធសាស្ត្រធ្វើឲ្យមានវិបត្តិរដ្ឋសភា។ តំណាងរាស្ត្របក្សប្រឆាំងនេះ ចំនួន៥ រូបនឹងត្រូវលាលែងពីរដ្ឋសភា ក្នុងនោះក៏មានលោកស្រី កែ សុវណ្ណរ័ត្ន អគ្គលេខាធិការគណបក្សនេះផងដែរ។ គណបក្សសម រង្ស៊ីនៅតែបកស្រាយថា តំណាងរាស្ត្រមិនគ្រប់១២០នាក់នឹងនាំឲ្យរដ្ឋសភាមិនអាចដំណើរការបានឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ទីបំផុតទៅ គណបក្សសម រង្ស៊ីបានរកឃើញ «វីរជន» របស់ខ្លួនហើយ នោះគឺ តំណាងរាស្ត្រ ៥នាក់បានស្ម័គ្រចិត្តលាលែងចេញពីតំណែង ដើម្បីអនុវត្តតាមយុទ្ធសាស្ត្រធ្វើឲ្យរដ្ឋសភាគាំងដំណើរការ ដែលប្រកាសដោយលោកសម រង្ស៊ី។ លោកស្រី កែ សុវណ្ណរ័ត្ន អគ្គលេខាធិការគណបក្សសម រង្ស៊ី បានប្រាប់វិទ្យុបារាំងអន្តរជាតិនៅថ្ងៃនេះថា លោកស្រីក៏ស្ថិតនៅក្នុងចំណោមសមាជិកសភាដែលត្រូវលាលែងចេញពីតំណែងដែរ។
លោកសមរង្ស៊ីបានប្រកាស កាលពីថ្ងៃទី១៦វិច្ឆិកា ឆ្នាំ២០១១ ដោយដាក់ចេញនូវយុទ្ធសាស្ត្រវិបត្តិរដ្ឋធម្មនុញ្ញ តាមរយៈការធ្វើឲ្យរដ្ឋសភាខ្វះលក្ខណៈច្បាប់ ដូចដែលមានចែងក្នុងរដ្ឋធម្មនុញ្ញ មាត្រា ៧៦។ មាត្រា ៧៦ ចែងថា រដ្ឋសភាត្រូវមានសមាជិកយ៉ាងតិច ១២០រូប។ ការដាក់ចេញយុទ្ធសាស្ត្របែបនេះរបស់លោកសមរង្ស៊ី បានធ្វើឡើង ខណៈដែលរដ្ឋសភាគ្រោងនឹងបើកកិច្ចប្រជុំនា ពេលខាងមុខនេះ ដើម្បីអនុម័តលើសេចក្តីព្រាងច្បាប់ថវិកាជាតិឆ្នាំ២០១២ ដែលជាច្បាប់ដ៏សំខាន់បំផុតមួយ សម្រាប់ការគ្រប់គ្រងរបស់រដ្ឋាភិបាល។
ប៉ុន្តែ ក្រុមប្រឹក្សាធម្មនុញ្ញ ដែលជាស្ថាប័នបកស្រាយច្បាប់ បានផ្សព្វផ្សាយការបកស្រាយរបស់ខ្លួន កាលពីឆ្នាំ២០០៣ ដែលបញ្ជាក់ថា ការតម្រូវឲ្យរដ្ឋសភាមានសមាជិកយ៉ាងតិច១២០នាក់ គឺសម្រាប់តែការបើកសម័យប្រជុំដំបូងក្រោយការបោះឆ្នោត សម្រាប់អនុម័តបង្កើតរដ្ឋសភាតែប៉ុណ្ណោះ។ ចំនួននេះមិនចាំបាច់សម្រាប់ដំណើរការធម្មតារបស់រដ្ឋសភាឡើយ។ ក្នុងន័យនេះ ការលាលែងពីតំណែងរបស់តំណាងរាស្ត្រគណបក្សសម រង្ស៊ីនឹងគ្មានប្រយោជន៍អ្វីទេ។
ប៉ុន្តែ អគ្គលេខាធិការគណបក្សសម រង្ស៊ី អះអាងថា គណបក្សប្រឆាំងមិនទទួលយកការបកស្រាយនេះទេដោយចោទប្រកាន់ក្រុមប្រឹក្សាធម្មនុញ្ញថាលម្អៀងទៅរកបក្សកាន់អំណាច។លោកស្រី កែ សុវណ្ណរ័ត្ន បានអះអាងថា តំណាងរាស្ត្រមិនគ្រប់១២០នាក់ គឺជាវិបត្តិរដ្ឋសភាយ៉ាងពិតប្រាកដ ហើយគណបក្សសម រង្ស៊ីនៅតែបន្តយុទ្ធសាស្ត្ររបស់ខ្លួនដដែល។
សមាជិកសភាទាំង ៥រូប ដែលត្រូវលាលែងនោះមានលោកស្រីកែ សុវណ្ណរ័ត្ន តំណាងរាស្ត្រមណ្ឌលសៀមរាប លោក ម៉ែន សុថាវរិន្ទ្រ មណ្ឌលកំពង់ធំ លោក ហូរ វ៉ាន់ មណ្ឌលភ្នំពេញ លោក នុត រំដួល មណ្ឌលកំពង់ស្ពឺ និងលោកស្រី ថាក់ ឡានី មណ្ឌលកំពង់ចាម។
យ៉ាងណាក៏ដោយ លោកនាយករដ្ឋមន្ត្រីហ៊ុន សែន បានបញ្ជាក់កាលពីថ្ងៃទី១៤វិច្ឆិកាថា មានតែក្រុមប្រឹក្សាធម្មនុញ្ញតែមួយគត់ ដែលជាស្ថាប័នបកស្រាយច្បាប់។ រីឯការបកស្រាយរបស់បក្សប្រឆាំងនឹងគ្មានតម្លៃឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ