ចិនកាត់ទោសនិស្សិតអ៊ុយហ្គួររបស់បញ្ញវ័ន្តអ៊ីលហាម តូទី ដោយសម្ងាត់បំផុត
និស្សិតសកលវិទ្យាល័យ អ៊ុយហ្គួរ៧រូប ត្រូវបានតុលាការចិន-កាត់ទោសដោយសម្ងាត់បំផុត ពីបទប៉ុនប៉ងទាមទារផ្តាច់ទឹកដី។ការចោទប្រកាន់នេះគឺ ដូចគ្នាទៅនឹង ការ ចោទ ប្រកាន់ លោកអ៊ីលហាម តូទីដែលត្រូវជាគ្រូបង្រៀនរបស់ពួកគេនៅសកលវិទ្យាល័យនិង ដែលកំពុងជាប់ពន្ធនាគារ។ សវនាការកាត់ទោសនេះ ត្រូវបានប្រព្រឹត្តទៅកាលពីម្សិលមិញគឺ៤ថ្ងៃក្រោយពីតុលាការចិន បានចេញសាលក្រមដាក់ទោសសាស្ត្រាចារ្យអ៊ីលហាម តូទីឲ្យជាប់ពន្ធនាគារអស់មួយជីវិត។
ចុះផ្សាយនៅថ្ងៃ៖
ស្តាប់ - ០២:១៧
និស្សិតអ៊ុយហ្គួរទាំង៧នាក់របស់លោកសាស្ត្រាចារ អ៊ីលហាម តូទី បានចូលខ្លួននៅមុខតុលាការ អ៊ុយរុំជីនៅតំបន់ស៊ីនជាំង តំបន់ដែលមានជនជាតិភាគតិចអ៊ុយហ្គួរអ្នកកាន់សាសនាអ៊ីស្លាមរស់នៅ។ ក្នុងចំណោមនិស្សិតទាំងអស់នោះ ៦នាក់ជាជនជាតិអ៊ុយហ្គួរនិងម្នាក់ទៀតជាជនជាតិភាគតិចក្នុងសហគមន៍យី។
យោងតាមទិន្នានុប្បវត្តិចិនឈ្មោះ Global Times និស្សិតទាំង៧រូបបានឆ្លើយសារភាពថា ពួកគេគ្មានកំហុសអ្វីក្រៅតែពីការជួយលោកគ្រូគេក្នុងការរៀបចំដាក់គេហទំព័រឲ្យមានពីរភាសាប៉ុណ្ណោះ គឺភាសាចិននិងភាសាអ៊ុយហ្គួរ។ហើយ ការរៀបចំឲ្យមានពីរភាសានៅលើប្រព័ន្ធអ៊ីនធ័នែត ក៏ដើម្បីលើកស្ទួយដល់ទំនាក់ទំនងរវាងសហគមន៍ជនជាតិភាគតិចអ៊ុយហ្គួរនិងសហគមន៍ហានភាគច្រើននៅក្នុងប្រទេស។
ក៏ប៉ុន្តែ អាជ្ញាធរចិននៅតែចោទពួកគេ ថាគ្រូនិងសិស្សសុទ្ធតែមានគំនិតមិនល្អដោយរៀបចំគេហទំព័រនេះ គឹដើម្បីចង់បំផុសបំផុលឲ្យមានការស្អប់ខ្ពើមសហគមន៍ហាននិងជំរុញឲ្យមានការទាមទារឯករាជ្យនៅតំបន់សីនជាំងដែរ។ ការវិនិច្ឆ័យទោសរបស់ក្រុមនិសិត្សទាំង៧រូបនេះ នៅមិនទាន់ប្រកាសនៅឡើយទេ។
គួររំលឹកថា លោកស្តា្រចារ្យ អ៊ីលហាម តូទី ដែលជាសេដ្ឋកិច្ចវិទូបង្រៀននៅសកលវិទ្យាល័យសំរាប់សហគមន៍ជនជាតិភាគតិចនៅប៉េកាំង មានអាយុ៤៤ឆ្នាំនិងត្រូវបានគេគោរពស្រឡាញ់ខ្លាំង។ម្យ៉ាងទៀត ជាយូយារមកហើយ គាត់តែងតែបរិហារអំពីការគៀបសង្កត់របស់អាជ្ញាធរចិនទៅលើសហគមន៍អ៊ុយហ្គួរនៅតំបន់ស៊ីនជាំង តែគាត់ក៏ពុំដែលបានទាមទារឯករាជ្យនៅតំបន់ស៊ីនជាំងនោះឡើយ។ នៅក្នុងពេលសវនាការកាត់ទោសគាត់នៅ Urumqi កន្លងមក ក្រោមកិច្ចការពារសន្តិសុខដ៏មត្យ័តបំផុត លោកអ៊ីលហាម តូទី-បានបដិសេធយ៉ាងដាច់អហង្កាការចោទប្រកាន់របស់អាជ្ញាធរចិនមកលើរូបគាត់ពីបទប៉ុនប៉ងទាមទារផ្តាច់ទឹកដី ដោយលោកបានគូសបញ្ជាក់ ថាលោកជាគ្រូមានតួនាទីត្រឹមតែបង្ហាត់សិស្សនិងបញ្ចេញយោបល់របស់គាត់តែប៉ុណ្ណោះ។
រីឯសហភាពអឺរ៉ុបនិងសហរដ្ឋអាមេរិក រួមទាំងអង្គការការពារសិទ្ធមនុស្សនានា បានទិះតៀនយ៉ាងខ្លាំងក្លាសនវការកាត់ទោសសាស្ត្រាចារ្យអ៊ុយហ្គួរនេះ ដោយទាមទារសុំឲ្យដោះលែងរូបគាត់តែជាអសារឥតការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ