គណបក្សប្រជាជនប្រារព្ធថ្ងៃ៧មករា ក្រោមបរិយាកាសទំនាស់នយោបាយ
គណបក្សប្រជាជនកម្ពុជាដែលកំពុងដឹកនាំរដ្ឋាភិបាល ហើយដែលជំទាស់ដោយគណបក្សសង្គ្រោះជាតិ នឹងរៀបចំប្រារព្ធទិវាជ័យជម្នះ៧មករាលើកទី៣៥នៅមជ្ឈមណ្ឌលសន្និសីទកោះពេជ្រនៅថ្ងៃស្អែកនេះ។ ថ្នាក់ដឹកនាំកំពូលទាំង៣រូបនឹងមានវត្តមាននៅក្នុងពិធី ដែលមានអ្នកចូលរួម២ម៉ឺននាក់។ ការប្រារព្ធខួបឆ្នាំទី៣៥នៃថ្ងៃ៧មករារបស់គណបក្សប្រជាជនកម្ពុជា ត្រូវប្រព្រឹត្តិទៅ តែប៉ុន្មានថ្ងៃក្រោយការបំបែកក្រុមបាតុកររបស់គណបក្សប្រឆាំង និងបាតុករទាមទារប្រាក់ខែកម្មករ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
គណបក្សប្រជាជនកម្ពុជានឹងរៀបចំទិវាជ័យជម្នៈ៧មករាលើកទី៣៥នៅមជ្ឈមណ្ឌលកោះពេជ្រ នៅថ្ងៃអង្គារនេះ ជាមួយអ្នកចូលរួម២ម៉ឺននាក់ ក្រោមវត្តមានរបស់ប្រធានគណបក្ស លោក ជា ស៊ីម អនុប្រធានគណបក្សគឺលោក ហ៊ុន សែន និងប្រធានកិត្តិយសគឺលោកហេង សំរិន។ ថ្នាក់ដឹកនាំកំពូលទាំងបីរបស់គណបក្សប្រជាជនកម្ពុជាក៏កំពុងដឹកនាំស្ថាប័នជាតិកំពូលក្នុងនីតិកាលទី៥នេះ ដែលគណបក្សប្រឆាំង កំពុងជំទាស់។
ទិវា៧មករានៅថ្ងៃអង្គារនេះ ត្រូវប្រារព្ធឡើងតែប៉ុន្មានថ្ងៃ ក្រោយពីសមត្ថកិច្ចរបស់រដ្ឋាភិបាលដែលដឹកនាំដោយគណបក្សប្រជាជនកម្ពុជា បំបែកការតវ៉ារបស់គណបក្សសង្គ្រោះជាតិ និងក្រុមបាតុករដែលទាមទារដំឡើងប្រាក់ខែគោល១៦០ដុល្លារ។ ការបំបែកដែលបានបង្កអោយមានអ្នកស្លាប់៥នាក់ និងរបួសទាំងបាតុករ និងកំលាំងសមត្ថកិច្ចរាប់សិបនាក់។
លោកផៃ ស៊ីផានដែលជាអ្នកនាំពាក្យទីស្តីការគណៈរដ្ឋមន្ត្រី និងជាសមាជិកគណបក្សប្រជាជនកម្ពុជា បានបដិសេធចោល ការអត្ថាធិប្បាយណាដែលនិយាយថា ការប្រារព្ធទិវាជ័យជម្នៈ៧មករា២០១៤នេះ ប្រព្រឹត្តិទៅក្រោមទិដ្ឋភាពនយោបាយតានតឹង។ ចំពោះមន្ត្រីគណបក្សប្រជាជនកម្ពុជារូបនេះ អ្វីៗមានសភាពធម្មតានៅពេលនេះ។
លោកបញ្ជាក់ថា ផ្លូវថ្នល់បានក្លាយជាប្រយោជន៍របស់សាធារណៈ រោងចក្របានក្លាយជារបស់ថៅកែវិញ និងភូមិករដែលស្ថិតនៅក្បែរតំបន់ឧស្សាហកម្មកាត់ដេរ ក៏បានក្លាយជារបស់ពលរដ្ឋជាធម្មតាវិញដែរ។ មន្ត្រីរដ្ឋាភិបាលដដែលទំនងជាកំពុងតែនិយាយអំពី ប្រតិបត្តិការបោសសម្អាតការតវ៉ារបស់គណបក្សសង្គ្រោះជាតិ កាលពីចុងសប្តាហ៍កន្លងទៅ។
ក៏ដូចរៀងរាល់ឆ្នាំដែរ គណបក្សប្រជាជនកម្ពុជាប្រារព្ធនឹងរៀបចំទិវារម្លឹកខួប៧មករានៅតាមខេត្តរាជធានីរៀងៗខ្លួន។ លោក ញ៉ែម ថ្ថាវី អ្នកតំណាងរាស្ត្រគណបក្សប្រជាជនកម្ពុជាមណ្ឌលកំពង់ធំ ដែលនឹងចូលរួមទិវា៧មករានៅក្នុងខេត្តកំពង់ធំនោះ មិនបានភ្លេចខ្លឹមសារនៃព្រឹត្តិការណ៍ប្រវត្តិសាស្ត្រ៧មករាឡើយ។
ចំពោះលោកញ៉ែម ថ្ថាវី ៧មករា១៩៧៩ គឺជាថ្ងៃចាប់ផ្តើមនៃការបង្រួបបង្រួមជាតិ អោយរស់ឡើងវិញ មុននឹងមានព្រឹត្តិការណ៍ប្រវត្តិសាស្ត្រក្រោយៗទៀត ដូចជាការជួបគ្នារវាងសម្តេចនរោត្តម សីហនុ ព្រះបរមរតនកោដ្ឋ និងលោកហ៊ុន សែនជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ