មេភេរវជនដ៏ល្បីល្បាញរបស់ឥណ្ឌូណេស៊ី ទទួលទោសជាប់ពន្ធនាគារ១៥ឆ្នាំ
១៥ឆ្នាំក្នុងពន្ធនាគារ នេះ ជាសាលក្រម ដែលតុលាការក្រុងហ្សាការតា សម្រេចផ្តន្ទាទោសលើរូប Abu Bakar Bachir មេភេរវជនអ៊ីស្លាមជ្រុលនិយម នៅឥណ្ឌូណេស៊ី ក្នុងថ្ងៃព្រហស្បតិ៍ទី ១៦មិថុនានេះ ពីបទបានជួយឧបត្ថម្ភហិរញ្ញវត្ថុដល់ពួកអាល់-កៃដា នៅខេត្តAceh។ តើ Abu Bakar Bachir ជាអ្នកណា បានជាក្នុងថ្ងៃប្រកាសសាលក្រមនេះ អាជ្ញាធរឥណ្ឌូណេស៊ី បានប្រើមធ្យោបាយការពារសន្តិសុខ និងសុវត្ថិភាពយ៉ាងសន្ធឹកសន្ធាប់ ដោយមានពង្រាយកម្លាំងប៉ូលិសនិងទាហានដល់ទៅប្រមាណជិត បីពាន់នាក់ ?!
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
អាយុ ៧២ឆ្នាំ Abu Bakar Bashir ត្រូវបានពួកអ៊ីស្លាមជ្រុលនិយមចាត់ទុកថាជាប្រមុខដឹកនាំសាសនាកំពូលម្នាក់របស់ចលនាភេរវនិយម Jemaah Islamiah។ ក្រុមភេរវនិយមដ៏សកម្មនៅតំបន់អាស៊ីភាគអាគ្នេយ៍ ដែលបានបង្កអំពើភេរវកម្មជាបន្តបន្ទាប់នៅក្នុងប្រទេសឥណ្ឌូណេស៊ី កាលពីឆ្នាំ២០០២ និង២០០៥។
Abu Bakar Bashir ធ្លាប់បានជាប់ចោទ និងបានឡើងតុលាការម្តងជាពីរដង ពីបទបានប្រព្រឹត្តអំពើភេរវកម្ម បទជួញដូរអាវុធ ជួយឧបត្ថម្ភហិរញ្ញវត្ថុ និងផ្តល់ការហ្វឹកហ្វឺនយោធាពួកឧទ្ទាមព្រៃប្រដាប់អាវុធនៅខេត្តAceh ក្នុងការប៉ុនប៉ងធ្វើភេរវកម្មប្រឆាំងប្រធានាធិបតីបច្ចុប្បន្នលោក Susilo Bambang Yudhoyono ប៉ុន្តែរាល់លើក Abu Bakar Bashirតែងបានរួចខ្លួនពីការចោទប្រកាន់ទាំងនោះ។
នៅឆ្នាំ២០០៨ Abu Bakar Bachirបានបង្កើតចលនាជាតិនិយមថ្មីមួយឈ្មោះថា Jema'ah Ansharut Tauhid (JAT) ដោយឈរលើគោលការណ៍ដើម្បីឥណ្ឌូណេស៊ីជារដ្ឋអ៊ីស្លាម។ ក្រុមអ៊ីស្លាមជាតិនិយមនេះ បានផ្គត់ផ្គង់ និងផ្តល់ជម្រកដល់សមាជិករបស់ចលនាJemaah Islamiah។
ក្នុងការកាត់ក្តីជាលើកទីបី ពីបទពាក់ព័ន្ធនឹងអំពើភេរវកម្មនេះ Abu Bakar Bashir បានបដិសេធរាល់ការចោទប្រកាន់ទាំងឡាយនោះ ដោយចាត់ទុកថាខ្លួនជាជនរងគ្រោះនៃល្បិចកលអាមេរិក និងប្រកាសធ្វើឧទ្ធរណ៍។ នៅមុខតុលាការសកម្មជនជាច្រើនរយនាក់បានមកស្រែកគាំទ្រ Abu Bakar Bashir មុននឹងបំបែកគ្នាដោយស្ងប់ស្ងាត់វិញ។
ប៉ុន្តែសកម្មជនក្រុមនេះអាចនឹងធ្វើការសងសឹក ! នេះបើតាមអ្នកវិភាគ។ ហើយជាក់ស្តែង ក្នុងពេលដំណើរការកាត់ក្តី និងចេញសាលក្រមនេះ ប៉ូលិស ទាហានប្រមាណជិតបីពាន់នាក់ត្រូវបានដាក់ពង្រាយពង្រឹងសុវត្ថិភាព ព្រោះមានសារអេឡិចត្រូនិចគំរាមពីការប៉ុនប៉ងដាក់គ្រាប់បែកបំផ្ទុះ៣៦គ្រាប់នៅថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ