ឯកអគ្គរដ្ឋទូតអាមេរិកប្រចាំកម្ពុជាបង្កើនទំនាក់ទំនងជាមួយខ្មែរអ៊ីស្លាម
ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក វីលៀម ថូដ (William E. Todd) បានសម្តែងការចាប់អារម្មណ៍យ៉ាងខ្លាំងចំពោះក្រុមអ្នកកាន់សាសនា អ៊ីស្លាម នៅកម្ពុជា។ លោកបានអះអាងថា ស្ថានទូតអាមេរិកប្រចាំកម្ពុជាមានសំណាងដោយបានបង្កើតទំនាក់ទំនងជិតស្និទ្ធជាមួយអ្នកកាន់សាសនា អ៊ីស្លាម ក្នុងប្រទេសនេះ។ ចំណាប់អារម្មណ៍បែបនេះបានធ្វើឡើងបន្ទាប់ពីស្ថានទូតអាមេរិកបានរៀបចំពិធីស្រាយបួសជាមួយ អ៊ីស្លាម សាសនិកនៅទីក្រុងភ្នំពេញកាលពីថ្ងៃទី២ខែសីហា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
នៅក្នុងសារអេឡិចត្រូនិក ឬនៅលើទំព័រកាសែតក្នុងស្រុកដែលលោកតែងបញ្ចេញទស្សនៈ លោក William E. Toddឯកអគ្គរដ្ឋទូតអាមេរិកប្រចាំកម្ពុជា បានងាកមកបង្ហាញចំណាប់អារម្មណ៍ទៅលើសហគមន៍ អ៊ីស្លាម នៅកម្ពុជា។ នេះមិនមែនជារឿងចៃដន្យទេ ដែលអ្នកកាទូតអាមេរិករូបនេះបង្ហាញពីទំនាក់ទំនងដ៏ល្អរវាងស្ថានទូតអាមេរិកជាមួយសហគមន៍ អ៊ីស្លាម នៅកម្ពុជា ប៉ុន្តែ វាគឺជារដូវ រ៉ាម៉ាដាន (Ramadan) របស់អ្នកកាន់សាសនាអ៊ីស្លាម។
លោក William E. Todd បានអះអាងថាស្ថានទូតអាមេរិកមានសំណាងដោយបានបង្កើតទំនាក់ទំនងជិតស្និទ្ធជាមួយក្រុមអ្នកកាន់សាសនា អ៊ីស្លាម នៅកម្ពុជា និងបានជួយពួកគេតាមដែលអាចធ្វើទៅបាន។ បើយោងតាមលោកឯកអគ្គរដ្ឋទូត អ្នកកាន់សាសនា អ៊ីស្លាម នៅកម្ពុជាបានរស់ឆ្លងកាត់ប្រវត្តិសាស្ត្រដ៏ឃោរឃៅក្នុងរបបខ្មែរក្រហម តែសព្វថ្ងៃនេះពួកគេកំពុងប្រតិបត្តិសាសនាអ៊ិស្លាមដោយចំហ និងដោយគ្មានការភ័យខ្លាច។ សហគមន៍ អ៊ីស្លាម កំពុងតែរីកធំធាត់ ហើយកំពុងតែរួមចំណែកក្នុងការកសាងប្រទេសកម្ពុជាឲ្យមានភាពប្រសើរឡើង។ សាសនាអ៊ីស្លាមក៏ទទួលបានការអត់ឱនដែលនេះបង្ហាញពីការអភិវឌ្ឍន៍លទ្ធិប្រជាធិបតេយ្យនៅកម្ពុជា។
កាលពីថ្ងៃទី២ខែសីហា ស្ថាននទូតអាមេរិកនៅភ្នំពេញបានរៀបចំពិធីស្រាយបួសជាមួយសហគមន៍ អ៊ីស្លាម កម្ពុជានៅទីក្រុងភ្នំពេញបន្ទាប់ពីរដូវរ៉ាម៉ាដានបានបិទបញ្ចប់។ លោកឯកអគ្គរដ្ឋទូតបានកត់សម្គាល់ថា វាជាការប្រសើរណាស់ដែលបានឃើញដោយផ្ទាល់នូវការឧទ្ទិស និងចិត្តសប្បុរសនៅរដូវបុណ្យរ៉ាម៉ាដាននេះ។ លោកអះអាងថា នៅសហរដ្ឋអាមេរិកក៏មានជនជាតិអាមេរិកាំងរាប់លាននាក់កាន់សាសនា អ៊ីស្លាម ដែរ។
គួរកត់សម្គាល់ថា ការបង្កើនទំនាក់ទំនងរបស់សហរដ្ឋអាមេរិកជាមួយសហគមន៍ អ៊ីស្លាម មិនមែនជារឿងចៃដន្យទេ ប៉ុន្តែ សកម្មភាពនេះត្រូវគេមើលឃើញថាមានគោលដៅលុបបំបាត់រូបភាពជាសត្រូវរបស់សហរដ្ឋអាមេរិកជាមួយសាសនា អ៊ីស្លាម។ មហាអំណាចអាមេរិកត្រូវបានក្រុម អ៊ីស្លាម ជ្រុលនិយមប្រកាសថា ជាសត្រូវរបស់សាសនា អ៊ីស្លាម បន្ទាប់ពីប្រទេសនេះបានបើកយុទ្ធនាការប្រឆាំងក្រុមភេរវជន អាលកៃដា នៅទូទាំងពិភពលោកដែលកាន់សាសនា អ៊ីស្លាម ជ្រុលនិយម។
នៅកម្ពុជា ស្ថានទូតសហរដ្ឋអាមេរិកបានចូលរួមអបអរបុណ្យ រ៉ាម៉ាដាន តាំងពីឆ្នាំ ២០០៣ មក ហើយក្នុងរយៈពេល ៥ ឆ្នាំចុងក្រោយនេះ ស្ថានទូតអាមេរិកថែមទាំងបានរៀបចំពិធីអបអរបុណ្យរ៉ាម៉ាដានដោយផ្ទាល់ទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ