Amnesty International ចោទពួកឧទ្ទាមនៅភាគខាងត្បូងពីបទប្រព្រឹត្តឧក្រិដ្ឋកម្មសង្គ្រាម
ក្រោមលេសបះបោរទាមទារចង់ផ្តាច់ទឹកដី ពួកឧទ្ទាមអ៊ីស្លាមនិយមជ្រុល នៅភាគខាងត្បូងប្រទេសថៃ បានធ្វើការវាយប្រហារ ប្រព្រឹត្តអំពើភេរវកម្ម យ៉ាងហិង្សា។ សម្រាប់អង្គការការពារសិទ្ធិមនុស្សអន្តរជាតិ Amnesty International ការវាយប្រហារ ដែលជាទូទៅ និងកាន់តែច្រើនឡើងៗ សំដៅលើប្រជាជនស៊ីវិលនេះ អាចចាត់ទុកបានថាជា “ឧក្រិដ្ឋកម្មសង្គ្រាម” !
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
ការវាយប្រហារ និងភេរវកម្មនៅភាគខាងត្បូងប្រទេសថៃ ធ្វើឡើងក្នុងបំណងសាបព្រោះការភ័យខ្លាច ! នេះជាសេចក្តីសន្និដ្ឋានរបស់អង្គការការពារសិទ្ធិមនុស្សអន្តរជាតិ ដែលបានអំពាវនាវឲ្យពួកឧទ្ទាមបញ្ឈប់ ជាបន្ទាន់ សកម្មភាពហិង្សា និងការវាយប្រហារទាំងងងឹតងងល់ សំដៅជនស៊ីវិល។ ព្រោះទង្វើបែបនេះ ត្រូវបានគេចាត់ទុកថា ឧក្រិដ្ឋកម្មសង្គ្រាម។
អំពើភេរវកម្មវាយប្រហារ របស់ពួកឧទ្ទាមអ៊ីស្លាមជ្រុលនិយមចង់ផ្តាច់ទឹកដី នៅភាគខាងត្បូង ប្រទេសថៃ ដែលមានប្រជាជនភាគច្រើនមានឈាមជ័រជាជនជាតិម៉ាឡេស៊ី និងជាអ្នកកាន់សាសនាអ៊ីស្លាម គិតចាប់ពីខែមករា ឆ្នាំ ២០០៤មក បានសម្លាប់ជីវិតមនុស្សអស់ជាង៤៨០០នាក់ ក្នុងនោះពីរភាគបី ជាជនស៊ីវិល ជាកសិករ ជាអ្នកកាន់ព្រះពុទ្ធសាសនា ជាអ្នកអ៊ីស្លាម ជាគ្រូបង្រៀន ឬជាអ្នករាជការ។
របាយការណ៍របស់Amnesty International បានគូសបញ្ជាក់ផងដែរថា អំពើរំលោភសិទ្ធិមនុស្សរបស់កងកម្លាំងសន្តិសុខថៃ ក៏ជាចំណែកមួយ បង្កឲ្យមានអសន្តិសុខ នៅភាគខាងត្បូងបំផុតនៃប្រទេស។
អាជ្ញាធរក្រុងបាងកកបានបង្កើនកម្លាំងការពារ នៅតាមភូមិជាជនស៊ីវិលស្ម័គ្រចិត្ត និងជាកងទ័ពស្វ័យត្រាណ យ៉ាងសន្ធឹកសន្ធាប់ តាមរូបភាពដាក់ខេត្តទាំងបី (ណារ៉ាធីវ៉ាត់ យ៉ាឡា និងប៉ាតានី) ក្នុងភាពអាសន្ន ប៉ុន្តែនៅតែមិនអាចគ្រប់គ្រងខេត្តទាំងបីបានដោយសមស្របទេ។ ផ្ទុយទៅវិញ ការនេះបានបង្កឲ្យមានចរាចរណ៍អាវុធធុនស្រាលកាន់តែទូលំទូលាយ។ នេះបើតាមការកត់សម្គាល់របស់អង្គការការពារសិទ្ធិមនុស្សដដែលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ