មេដឹកនាំសហជីពកម្ពុជាគ្រោងបង្កើតគណៈកម្មាធិការសហជីពអាស៊ាន
ដោយមើលឃើញថា សមាជិកនៃសមាគមអាស៊ានគ្រោងនឹងបង្កើតសហគមន៍រួមនៅឆ្នាំ២០១៥ និងដោយសារបញ្ហាលក្ខខណ្ឌការងារនៅក្នុងតំបន់អាស៊ាននៅមានបញ្ហាច្រើននៅឡើយ មេដឹកនាំសហជីពនៅក្នុងប្រទេសកម្ពុជាមួយចំនួនទាមទារអោយបង្កើតគណៈកម្មាធិការសហជីពអាស៊ាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ដោយឆ្លៀតឱកាសប្រទេសកម្ពុជាជាប្រធានអាស៊ាននៅឆ្នាំ២០១២នេះ លោក អាត់ ធន់ ប្រធានសហភាពការងារកម្ពុជាគ្រោងនឹងបង្កើតអោយមានស្ថាប័នសហជីពអាស៊ានមួយនៅពេលខាងមុខនេះ។
ស្ថាប័នថ្មីនេះនឹងមានឈ្មោះថា គណៈកម្មាធិការសហជីពអាស៊ាន។ មេដឹកនាំសហជីពសំខាន់ៗពីប្រទេសអាស៊ានទាំង១០នឹងក្លាយទៅជាសមាជិកនៃគណៈកម្មាធិការសហជីពអាស៊ាននេះ។ នាពេលកន្លងមក មានសហជីពអន្តរជាតិជាច្រើនបាននិងកំពុងធ្វើការយ៉ាងជិតស្និទ្ធជាមួយសហជីពនៅក្នុងប្រទេសកម្ពុជានិងជាមួយសហជីពនៃប្រទេសនីមួយៗនៅក្នុងសមាគមអាស៊ាន។ ប៉ុន្តែសមាជិកនៃប្រទេសអាស៊ានខ្លួនឯងនៅមិនទាន់បានបង្កើតសហជីពរួមរបស់អាស៊ាននៅឡើយទេ។
នេះជាលើកទីមួយហើយដែលប្រទេសកម្ពុជាមានគំនិតផ្តួចផ្តើមអោយបង្កើតគណៈកម្មាធិការសហជីពអាស៊ាននេះឡើង។ លោក អាត់ ធន់ ប្រធានសហភាពការងារកម្ពុជាបានបញ្ជាក់ប្រាប់នៅថ្ងៃសៅរ៍នេះថា ការបង្កើតស្ថាប័នឯករាជ្យមួយនេះឡើង គឺមានគោលបំណងសំខាន់ៗបីយ៉ាង។ ទីមួយ ៖ តាមដាននិងដោះស្រាយបញ្ហាចំណាកស្រុករបស់ប្រជាពលរដ្ឋក្នុងតំបន់អាស៊ាន។ ទីពីរ៖តាមដាននិងជំរុញការដោះស្រាយបង្កើនប្រាក់បៀវត្សរ៍របស់កម្មករក្នុងសមាគមអាស៊ាន និង ទីបី ៖ ជំរុញអោយមេដឹកនាំអាស៊ានទទួលយកសំណើរបស់សហជីពអាស៊ានផង និយាយបែបផ្សេង មានន័យថា សំឡេងរបស់សហជីពអាស៊ានគួរត្រួវបានមេដឹកនាំអាស៊ានយកចិត្តទុកដាក់។
លោក អាត់ ធន់ បានអំពាវនាវសូមអោយមេដឹកនាំអាស៊ានទាំងអស់អនុញ្ញាតអោយសហជីពអាស៊ានអាចជជែក និងលើកឡើងបញ្ហាផ្សេងៗទាក់ទងទៅនឹងបញ្ហាកម្មករក្នុងតំបន់អាស៊ានទៅកាន់កិច្ចប្រជុំមេដឹកនាំអាស៊ានផង។ នៅថ្ងៃទី៣និងទី៤ខែមេសាខាងមុខនេះ មេដឹកនាំកំពូលនៃសមាគមអាស៊ាននឹងជួបប្រជុំគ្នានៅទីក្រុងភ្នំពេញដើម្បីជជែកគ្នាពីរឿងនយោបាយនិងសេដ្ឋកិច្ចនៅក្នុងតំបន់និងពិភពលោក។
បើយោងតាមគម្រោង តំណាងសហជីពពីបណ្តាប្រទេសអាស៊ានទាំង១០នឹងជួបប្រជុំគ្នានៅដំណាច់ខែមេសាខាងមុខនេះដើម្បីជជែកគ្នាអោយស៊ីជម្រៅពីតួនាទីរបស់គណៈកម្មាធិការសហជីពអាស៊ានដែលគ្រោងនឹងបង្កើតឡើង។
ទាក់ទងទៅនឹងការជ្រើសរើសប្រធាន ជាគោលការណ៍ ស្ថាប័នថ្មីមួយនេះគ្រោងនឹងជ្រើសរើសប្រធានប្តូរវេនដូចជាការជ្រើសរើសប្រធានអាស៊ានប្តូរវេនដូច្នោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ