កម្ពុជា ឡាវ វៀតណាម និងភូមា ពង្រឹងទំនាក់ទំនងសេដ្ឋកិច្ច
កិច្ចប្រជុំកំពូល កម្ពុជា ឡាវ និងវៀតណាម ឬហៅកាត់ថា CLV និងកិច្ចប្រជុំកំពូលដាច់ដោយឡែកមួយទៀត រវាង កម្ពុជា ឡាវ ភូមា និងវៀតណាម ហៅកាត់ថា CLMV បានធ្វើឡើង នៅថ្ងៃអង្គារ ទី១៦វិច្ឆិកានេះ នៅទីក្រុងភ្នំពេញ។ ប្រមុខដឹកនាំរដ្ឋាភិបាលកម្ពុជា ឡាវ ភូមា និងវៀតណាម បានលើកឡើងពីកិច្ចសហប្រតិបត្តិការអភិវឌ្ឍន៍តំបន់ព្រំដែន និងការសម្រួលពាណិជ្ជកម្មឆ្លងដែន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លី ម៉េងហួរពីទីក្រុងភ្នំពេញ
នាយករដ្ឋមន្ត្រីកម្ពុជា ឡាវ និងវៀតណាម បានចូលរួមក្នុងកិច្ចប្រជុំកំពូល CLV លើកទី៦ នៅវិមានសន្តិភាព ក្នុងទីក្រុងភ្នំពេញ នាព្រឹកថ្ងៃអង្គារនេះ ដើម្បីពង្រឹងសហប្រតិបត្តិការ ពិសេស នៅតំបន់ត្រីកោណអភិវឌ្ឍន៍ ក្នុងខេត្តចំនួន ១៣ ជាប់ព្រំដែន ប្រទេសទាំងបី។
តំបន់ត្រីកោណអភិវឌ្ឍន៍កម្ពុជា វៀតណាម ឡាវ បានផ្តោតសំខាន់លើកិច្ចសហការលើផែនការអភិវឌ្ឍន៍ហេដ្ឋារចនាសម្ព័ន្ធសំរាប់ប្រទេសទាំងបី សំរាប់សកម្មភាពសេដ្ឋកិច្ច ក្នុងតំបន់ត្រីកោណអភិវឌ្ឍន៍ ដូចជា ការអភិវឌ្ឍន៍កសិកម្ម និងដំណើរការរោងចក្រឧស្សាហកម្ម ថាមពល ទេសចរណ៍ និងពាណិជ្ជកម្ម ជាដើម។
កិច្ចប្រជុំកំពូលរវាងប្រមុខរដ្ឋាភិបាលកម្ពុជា ឡាវ និងវៀតណាម ក៏លើកឡើងពីកិច្ចសម្របសម្រួលលំហូរទំនិញឆ្លងកាត់ព្រំដែន ទំនាក់ទំនងប្រជាជន និងទុនវិនិយោគ នៅក្នុងតំបន់អភិវឌ្ឍន៍ត្រីកោណ។ នាយករដ្ឋមន្ត្រីទាំងបី ក៏បានលើកឡើងពីការធ្វើពាណិជ្ជកម្ម និងការបង្កើតទីផ្សារតាមព្រំដែន ជាដើម។
នាយករដ្ឋមន្ត្រីកម្ពុជា វៀតណាម និងឡាវ បានចុះហត្ថលេខាលើសេចក្តីថ្លែងការណ៍ក្រុងភ្នំពេញ ស្តីពីការធ្វើឲ្យកាន់តែស៊ីជម្រៅ នូវកិច្ចអភិវឌ្ឍន៍តំបន់ត្រីកោណ CLV ដែលមាន ១១ ចំនុច។ ចំណែករដ្ឋមន្ត្រីពាណិជ្ជកម្ម និងវិនិយោគកម្ពុជា ឡាវ និងវៀតណាម ក៏បានចុះហត្ថលេខាលើឯកសារស្តីពីវិសោធនកម្មទៅលើអនុស្សរណៈយោគយល់គ្នា MOU ឆ្ពោះទៅរកការអនុវត្តន៍ និងផែនការអនុគ្រោះ សម្រាប់ការអភិវឌ្ឍន៍តំបន់ត្រីកោណកម្ពុជា ឡាវ និងវៀតណាម។
នៅល្ងាចនេះ កិច្ចប្រជុំកំពូល នៃកិច្ចសហប្រតិបត្តិការរវាងកម្ពុជា ឡាវ ភូមា និងវៀតណាម CLMV លើកទី៥ ក៏បានប្រារព្ធឡើង ដោយមានការចូលរួមពីនាយករដ្ឋមន្ត្រីកម្ពុជា នាយករដ្ឋមន្ត្រីឡាវ, ភូមា និងនាយករដ្ឋមន្ត្រីវៀតណាម។
បង្កើតឡើង នៅឆ្នាំ២០០៤ កិច្ចសហប្រតិបត្តិការរវាងកម្ពុជា ឡាវ ភូមា និងវៀតណាម បាន ផ្តោតសំខាន់លើកិច្ចសម្របសម្រួលគោលនយោបាយ សមាហរ័ណកម្មសេដ្ឋកិច្ច ការជម្រុញ និងការសម្របសម្រួល ការវិនិយោគ ពាណិជ្ជកម្ម កសិកម្ម ឧស្សាហកម្ម ថាមពល ការដឹកជញ្ជូន បច្ចេកវិទ្យាព័ត៌មានវិជ្ជា ទូរគមនាគមន៍ ទេសចរណ៍ អភិវឌ្ឍន៍ធនធានមនុស្ស និងវិស័យសុខាភិបាល។
កិច្ចសហប្រតិបត្តិការ CLV និង CLMV បានបង្កើតឡើង ដើម្បីពង្រឹង និងពន្លឿនសមាហរ័ណកម្ម រវាងប្រទេសកម្ពុជា ឡាវ ភូមា និងវៀតណាម ជាមួយសមាជិកអាស៊ាន ៦ ទៀត ដើម្បីកាត់បន្ថយគម្លាតអភិវឌ្ឍន៍នៅក្នុងតំបន់។
ហិរញ្ញប្បទាន នៅតែជាឧបសគ្គដ៏ចំបង សម្រាប់បណ្តាប្រទេស CLV និង CLMV ដែលត្រូវស្វែងរកការទាក់ទាញដៃគូសន្ទនារបស់អាស៊ាន និងដៃគូអភិវឌ្ឍន៍ដទៃទៀត ដើម្បីដាក់ទុនវិនិយោគ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ