បក្សទាំងពីរ៖ កម្ដៅនៃជម្លោះនយោបាយរបស់ថ្នាក់ដឹកនាំមិនប៉ះពាល់ដល់ការចរចាស្តីពីគ.ជ.បទេ
បើទោះបីជាចុងក្រោយនេះ មេដឹកនាំកំពូលគណបក្សប្រជាជនកម្ពុជា និងគណបក្សសង្គ្រោះជាតិបានរិះគន់គ្នាទៅវិញទៅមកមិនសំចៃក៏ដោយ ប៉ុន្តែក្រុមចរចានៃបក្សទាំងពីរស្តីពីការរៀបចំគណៈកម្មាធិការជាតិរៀបចំការបោះឆ្នោតនោះ នៅតែបន្តដំណើរការពិភាក្សារបស់ខ្លួនជាបន្តទៀត។ មន្ត្រីនៃបក្សទាំងពីរនៅតែមានសុទិដ្ឋិនិយមចំពោះការបង្កើតគ.ជ.បនៅដើមខែកុម្ភៈដដែល។
ចុះផ្សាយនៅថ្ងៃ៖
ស្តាប់ - ០២:១៨
មិនមានឡើយការផ្អាកចរចាស្តីពីការរៀបចំគណៈកម្មាធិការជាតិរៀបចំការបោះឆ្នោតពីគណបក្សជាប់ឆ្នោតទាំងពីរ បើទោះបីជាប្រមុខដឹកនាំបក្សធំទាំងពីរ បានវាយប្រហារពាក្យសម្តីខ្លាំងៗទៅវិញទៅមកក៏ដោយ។ នេះបើតាមការបញ្ជាក់ពីមន្ត្រីជាន់ខ្ពស់នៃគណបក្សកាន់អំណាច និងគណបក្សប្រឆាំងនៅថ្ងៃព្រហស្បតិ៍ទី២២ មករា។
លោកអេង ឆៃអ៊ាង ថ្នាក់ដឹកនាំជាន់ខ្ពស់គណបក្សសង្គ្រោះជាតិ និងជាសមាសភាពនៃក្រុមចរចាស្តីពីគ.ជ.ប បានគូសបញ្ជាក់ថា ក្រុមការងារនៃបក្សទាំងពីរនៅតែបន្តកិច្ចប្រជុំរបស់ខ្លួនជាបន្តទៀត ដោយមិនបានផ្អាកឡើយខណៈដែលប្រធានបក្សទាំងពីរ គឺលោកនាយករដ្ឋមន្ត្រីហ៊ុន សែន និងលោកសម រង្ស៊ី រួមទាំងលោកកឹម សុខា បានប្រើប្រាស់វេទិកាសាធារណៈវាយប្រហារដាក់គ្នានោះ។ ពោលគឺលោកនាយករដ្ឋមន្ត្រីប្រតិកម្មខ្លាំងៗតបទៅបក្សប្រឆាំងកាលពីព្រឹកថ្ងៃចន្ទដើមសប្តាហ៍នេះ ក្រុមការងារបានប្រជុំនៅថ្ងៃដដែលពេលល្ងាច។ បើតាមសមាជិកជាន់ខ្ពស់រូបនេះ ក្រុមការងារនៃបក្សទាំងពីរបានសម្រេចច្បាប់រៀបចំស្តីពីការបោះឆ្នោតថ្មីនោះ ដល់ជំពូកទី៨ហើយក្នុងចំណោមជំពូកទាំង១២ ។
លោកស៊ិក ប៊ុនហុក សមាសភាពចរចាពីបក្សកាន់អំណាច បានបន្ថែមថាក្រុមការងារនៃបក្សទាំងពីរនៅបន្តការពិភាក្សាស្តីពីគ.ជ.ប នៅថ្ងៃសុក្រទី២៣ មករានេះ ជាបន្តដោយគ្មានការអាក់ខានអ្វីនោះទេ។ ហើយកន្លងមកក៏គ្មានការផ្អាកការប្រជុំដោយបញ្ហានយោបាយដែរ។ សម្រាប់លោកស៊ិក ប៊ុនហុក លោកមានសុទិដ្ឋិនិយមថា បក្សទាំងពីរនឹងអាចបង្កើតគណៈកម្មាធិការជាតិរៀបចំការបោះឆ្នោតថ្មីតាមការគ្រោងទុកនៅដើមខែកុម្ភៈខាងមុខ។
បើទោះបីជាបក្សទាំងពីរអះអាងថា កិច្ចចរចានៅដំណើរការបានល្អមែន ប៉ុន្តែមានចំណុចយ៉ាងណោចណាស់ចំនួន៧ចំណុចដែលនៅខ្វែងគំនិតគ្នារង់ចាំការសម្រេចពីថ្នាក់ដឹកនាំគណបក្ស។ នោះ គឺចំនួនអាសនៈក្នុងសភា របៀបនៃការចុះឈ្មោះបោះឆ្នោត ភ្នាក់ងារបោះឆ្នោត និងការប្រើប្រាស់ឯកសារជាដើម។
សូមកត់សម្គាល់ថា ក្នុងអំឡុងពេលចុងក្រោយនេះ លោកនាយករដ្ឋមន្ត្រីហ៊ុន សែន និងលោកសម រង្ស៊ីរួមទាំងលោកកឹម សុខា បានប្រើប្រាស់វេទិកាសាធារណៈរិះគន់គ្នាទៅវិញទៅមក។ ដោយបក្សប្រឆាំងបានរិះគន់ពីការដឹកនាំរបស់បក្សកាន់អំណាច ប៉ុន្តែបក្សកាន់អំណាចបានគម្រាមបក្សប្រឆាំងស្តីពីការពាក់ព័ន្ធនឹងប្រព័ន្ធតុលាការជាដើម។ យ៉ាងណាក៏ដោយ លោកអេង ឆៃអ៊ាង សមាជិកគណបក្សសង្គ្រោះជាតិ បានហៅការរិះគន់រវាងមេបក្សទាំងពីរថា ជារឿងធម្មតារបស់អ្នកនយោបាយតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ