កម្ពុជាផ្តើមចុះផ្លូវហែក្បួន ប្រឆាំងនឹងគម្រោងសាងសង់ទំនប់វារីអគ្គិសនីសាយ៉ាបូរី នៅឡាវ
ក្រោមការរៀបចំរបស់អាជ្ញាធររដ្ឋាភិបាលកម្ពុជា នាព្រឹកថ្ងៃទី២៩មិថុនានេះ ព្រះសង្ឃ និងប្រជាពលរដ្ឋមកពីតាមបណ្តាស្រុក ដែលស្ថិតតាមដងទន្លេមេគង្គ ប្រមាណ ៣០០នាក់ បានដើរហែក្បួន លើកបដា និងស្រែកមេក្រូ នៅទីរួមខេត្តកំពង់ចាម។ ការដើរហែក្បួន និងជួបជុំ នៅជិតស្ពានគីហ្ស៊ូណា ឆ្លងកាត់ទន្លេមេគង្គ នាព្រឹកមិញ ដើម្បីផ្ញើសារទៅកាន់ប្រទេសឡាវ ឲ្យលុបចោលគម្រោងសាងសង់ទំនប់វារីអគ្គិសនី សាយ៉ាបូរី ដ៏ចម្រូងចម្រាស។
ចុះផ្សាយនៅថ្ងៃ៖
ស្តាប់ - ០២:១០
ក្បួនដង្ហែតាមដងផ្លូវរបស់ព្រះសង្ឃ និងពលរដ្ឋកម្ពុជា ក្រោមការរៀបចំរបស់អាជ្ញាធររដ្ឋាភិបាល បានចេញពីវត្ត អង្គរបាជ័យ ដែលមានចម្ងាយជាង ២គីឡូម៉ែត្រ ទៅកាន់កន្លែងជួបជុំ នៅមាត់ទន្លេមេគង្គ ក្រោមស្ពានគីហ្សូណា ក្នុងទីរួមខេត្តកំពង់ចាម កាលពីព្រឹកថ្ងៃស្រុក ទី២៩ ខែមិថុនា ឆ្នាំ២០១២។
ក្បួនដង្ហែថ្មើរជើង ជាលើកដំបូងនោះ មានលើកបដា និងស្រែកមេក្រូ ដើម្បីឲ្យសុំប្រទេសឡាវ លុបចោលគម្រោងសាងសង់ទំនប់វារីអគ្គិសនី សាយ៉ាបូរី ដ៏ចម្រូងចម្រាស។ ប្រជាពលរដ្ឋ ដែលចូលរួមក្នុងពិធីជួបជុំ និងដើរហែក្បួននោះ មកពីស្រុកនានា ជាប់មាត់ទន្លេមេគង្គ។ រីឯព្រះសង្ឃ មកពីសាលាពុទ្ធិកសម្តេចសង្ឃ ជួន ណាត និងសាលាពុទ្ធិកសម្តេច ហ៊ុន សែន ក្នុងខេត្តកំពង់ចាម។
បន្ទាប់ពីដើរហែក្បួន ពិធីជួបជុំមួយត្រូវបានធ្វើឡើង។ អភិបាលក្រុងកំពង់ចាម និងអាជ្ញាធរអ្នកជំនាញ បានឡើងថ្លែងការណ៍ ដើម្បីផ្ញើសារជាមួយនឹងព្រះសង្ឃ និងប្រជាពលរដ្ឋ ដែលបានដង្ហែក្បួន នៅថ្ងៃនេះ គឺសុំឲ្យប្រទេសឡាវ លុបចោលគម្រោងសាងសង់ទំនប់វារីអគ្គិសនី សាយ៉ាបូរី ដែលគេជឿថា នឹងនាំឲ្យអន្តរាយដល់ធនធានធម្មជាតិ ក្នុងដងទន្លេមេគង្គ ផ្នែកខាងក្រោម។
កាលពីថ្ងៃទី៨ ខែធ្នូ ឆ្នាំ២០១១ កិច្ចប្រជុំគណៈកម្មការទន្លេមេគង្គ នៅខេត្តសៀមរាប ដែលមានការចូលរួមពីរដ្ឋមន្ត្រីក្រសួងបរិស្ថាន និងធនធានទឹក របស់ប្រទេសកម្ពុជា ថៃ ឡាវ និងវៀតណាម បានសម្រេចផ្អាកគម្រោងសាងសង់ទំនប់សាយ៉ាបូរី នៅប្រទេសឡាវ។ គណៈកម្មការទន្លេមេគង្គ ក៏បានតម្រូវមានការសិក្សាបន្ថែមទៀត ទៅលើគម្រោងសាងសង់ទំនប់វារីអគ្គិសនីដ៏ចម្រូងចម្រាស នៅក្នុងប្រទេសឡាវ។
ប៉ុន្តែពេលនេះ ឡាវបានសម្រេចចិត្តបន្តគម្រោងស្ថាបនាទំនប់វារីអគ្គិសនី សាយ៉ាបូរី ដែលមានកម្លាំង ១.២៨៥ មេហ្គាវ៉ាត់ សម្រាប់ផ្គត់ផ្គង់អគ្គិសនីទៅកាន់ប្រទេសថៃ ដោយត្រូវចំណាយថវិកា ៣.៥០០ លានដុល្លារ។
ក៏ប៉ុន្តែអ្នកជំនាញ បានលើកឡើងថា ការកសាងទំនប់វារីអគ្គិសនី សាយ៉ាបូរី អាចប៉ះពាល់ដល់ប្រជាជន ដែលរស់នៅតាមតំបន់ទឹកទន្លេមេគង្គ ៦០ លាននាក់ ព្រមទាំងធនធានក្នុងដងទន្លេមេគង្គ ប៉ែកខាងក្រោមជាច្រើនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ