កម្ពុជាអំពាវនាវឲ្យជួយទប់ស្កាត់ភាពតានតឹងក្នុងជម្លោះនៅឧបទី្វបកូរ៉េ
រដ្ឋាភិបាលកម្ពុជាបានសម្តែងការព្រួយបារម្ភជាខ្លាំងចំពោះភាពតានតឹង នៅឧបទ្វីបកូរ៉េដែលកំពុងឈានទៅរកការផ្ទុះសង្រ្គាម។ រាជរដ្ឋាភិបាលកម្ពុជាបានអំពាវនាវឲ្យគ្រប់ភាគីទាំងអស់ចូលរួម ទប់ស្កាត់កុំឲ្យភាពតានតឹងរីករាលដាល ដែលនឹងបង្កគ្រោះថ្នាក់ដល់សន្តិភាព និងសន្តិសុខក្នុងឧបទ្វីបកូរ៉េ ក៏ដូចជាក្នុងតំបន់ទាំងមូល។ ប្រតិកម្មរបស់រដ្ឋាភិបាលក្រុងភ្នំពេញបានធ្វើឡើងខណៈពេលដែលសហរដ្ឋ អាមេរិក និងកូរ៉េខាងត្បូងគ្រោងបើកធ្វើសមយុទ្ធយោធារួមគ្នាមួយនៅក្នុង សមុទ្រលឿងនៅថ្ងៃអាទិត្យស្អែកនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ ប៉ែន បូណា ពីទីក្រុងភ្នំពេញ
ប្រទេសកម្ពុជាមិនអាចឈរអោបដៃនៅស្ងៀមបានទេចំពោះមុខភាពតានតឹងដ៏ធ្ងន់ធ្ងរនៅក្នុងជម្លោះនៅឧបទ្វីបកូរ៉េ។
នៅក្នុងសេចក្តីថ្លែងការណ៍មួយដែលចេញផ្សាយនៅល្ងាចថ្ងៃទី២៦វិច្ឆិកាម្សិលមិញ អ្នកនាំពាក្យក្រសួងការបរទេសកម្ពុជាបានថ្លែងថា កម្ពុជាមានការព្រួយបារម្ភជាខ្លាំង បន្ទាប់ពីបានទទួលព័ត៌មានស្តីពីការបាញ់កាំភ្លើងធំដាក់គ្នាទៅវិញទៅមកនៅលើកោះយ៉ុនព្យុងរបស់សាធារណរដ្ឋកូរ៉េកាលពីថ្ងៃទី២៣វិច្ឆិកា ដែលបានបណ្តាលឲ្យខូចខាតទ្រព្យសម្បត្តិ និងបាត់បង់ជីវិតមនុស្សមួយចំនួន។
សេចក្តីថ្លែងការណ៍បានបន្តទៀតថា រដ្ឋាភិបាលកម្ពុជាសូមអំពាវនាវឲ្យគ្រប់ភាគីទាំងអស់បញ្ឈប់រាល់សកម្មភាពបង្កហេតុ និងសុំឲ្យរក្សាការអត់ធ្មត់ជាអតិបរមា ដើម្បីទប់ស្កាត់ការរីករាលដាលនៃជម្លោះ។ ទន្ទឹមនឹងនោះកម្ពុជាក៏បានជំរុញឲ្យមានដំណោះស្រាយដោយសន្តិវិធីមួយចំពោះបញ្ហានៅឧបទ្វីបកូរ៉េ។
រដ្ឋាភិបាលកម្ពុជាក៏បានអំពាវនាវផងដែរឲ្យភាគីដែលពាក់ព័ន្ធក្នុងជម្លោះចាប់ផ្តើមឡើងវិញ ឲ្យបានឆាប់បំផុតនូវកិច្ចសន្ទនា៦ភាគី ដើម្បីទប់ស្កាត់មិនឲ្យភាពតានតឹងនេះរីករាលដាលដែលនឹងបង្កគ្រោះថ្នាក់ដល់សន្តិភាព និងសន្តិសុខនៅក្នុងឧបទ្វីបកូរ៉េ ក៏ដូចជានៅក្នុងតំបន់ទាំងមូល។
ប្រតិកម្មរបស់ទីក្រុងភ្នំពេញបានធ្វើឡើង បន្ទាប់ពីស្ថានភាពនៃជម្លោះរវាងបងប្អូនគូសត្រូវកូរ៉េទាំងពីរកំពុងតែវិវឌ្ឍទៅរកការផ្ទុះសង្រ្គាមដ៏គ្រោះថ្នាក់មួយ។ បញ្ហាបានកើតឡើងបន្ទាប់ពីកូរ៉េខាងជើងបានបាញ់គ្រាប់ផ្លោងទៅលើកោះមួយរបស់កូរ៉េខាងត្បូងកាលពីថ្ងៃអង្គារដែលបណ្តាលឲ្យជនស៊ីវិលពីរនាក់ និងទាហានម៉ារីនពីរនាក់បានស្លាប់ និងមនុស្ស១៨នាក់ផ្សេងទៀតរងរបួស ហើយផ្ទះជាច្រើនខ្នងត្រូវបានបំផ្លាញ។
នៅថ្ងៃសុក្រម្សិលមិញ អគ្គលេខាធិការអាស៊ាន លោក ស៊ូរិន ពិតស៊ូវ៉ាន ក៏បានអំពាវនាវឲ្យភាគីពាក់ព័ន្ធមានការអត់ធ្មត់ដោយចៀសវាងការប្រើប្រាស់កម្លាំងយោធាផងដែរ។ អគ្គលេខាធិការអាស៊ានក៏បានជំរុញឲ្យមានដំណោះស្រាយបញ្ចប់បញ្ហាដោយសន្តិវិធី។
ឥឡូវនេះនាវាចម្បាំងអាមេរិករួមជាមួយនាវាផ្ទុកយន្តហោះដ៏ទំនើបមួយផងកំពុងធ្វើដំណើរទៅកាន់សមុទ្រលឿងដើម្បីធ្វើសមយុទ្ធយោធារួមគ្នាមួយជាមួយកូរ៉េខាងត្បូង។ រីឯកូរ៉េខាងជើងវិញបានព្រមានថាសមយុទ្ធយោធានេះនឹងរុញច្រានឧបទ្វីបកូរ៉េទៅរកមាត់ជ្រោះនៃភ្លើងសង្រ្គាម។ ស្ថានភាពដ៏គ្រោះថ្នាក់នេះហើយដែលបង្ខំឲ្យកម្ពុជាអំពាវនាវឲ្យទប់ស្កាត់ភាពតានតឹងនៃជម្លោះនៅឧបទ្វីបកូរ៉េ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ