កម្ពុជាបន្តចលនាថ្កោលទោសថៃលើការបំផ្លាញសម្បត្តិបេតិកភណ្ឌ
កម្ពុជាកំពុងបន្តចលនាជាអន្តរជាតិដើម្បីថ្កោលទោសសកម្មភាពឈ្លានពាន របស់កងទ័ពថៃមកលើទឹកដីកម្ពុជា និងសម្បត្តិបេតិកភណ្ឌមនុស្សជាតិ។ យោងតាមសេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រីនៅថ្ងៃ សុក្រនេះ នៅឯទីក្រុងប៉ារីស ទីដែលមានកិច្ចប្រជុំគណៈកម្មាធិការបេតិកភណ្ឌពិភពលោកលើកទី៣៥ គណៈប្រតិភូថៃបានព្យាយាមប្រាប់អង្គការយូណេស្កូថា ប្រាសាទព្រះវិហារគ្មានការខូចខាតនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
សារព័ត៌មានថៃបានផ្សព្វផ្សាយច្រើន ក្នុងប៉ុន្មានថ្ងៃចុងក្រោយនេះ អំពីការពន្យាពេលនៃការពិចារណាលើគម្រោងអភិវឌ្ឍន៍តំបន់ទ្រនាប់ប្រាសាទព្រះវិហារ ហើយដែលព័ត៌មានទាំងនេះត្រូវបានកម្ពុជាច្រានចោលដោយចាត់ទុកថា ជាព័ត៌មានប្រឌិតរបស់ថៃ។
ទីស្តីការគណៈរដ្ឋមន្ត្រីកម្ពុជាបានធ្វើរបាយការណ៍សង្ខេបមួយស្តីពីដំណើរការការងាររបស់ប្រតិភូកម្ពុជានៅទីក្រុងប៉ារីស ដែលរបាយការណ៍អាចជាការឆ្លើយតប និងការបង្ហាញប្រាប់ពលរដ្ឋខ្មែរអំពីព្រឹត្តិការណ៍ និងព័ត៌មានពិតប្រាកដដែលបានកើតមាន នៅក្នុងកិច្ចប្រជុំ នៅទីក្រុងប៉ារីសនោះ។
សេចក្តីប្រកាសព័ត៌មានសរសេរថា តំណាងអង្គការយូណេស្កូបានរៀបចំកិច្ចប្រជុំដោយឡែក ជាមួយកម្ពុជាផង និងជាមួយថៃផង ដើម្បីផ្តល់លទ្ធភាពអោយភាគីទាំងពីរអាចបញ្ចេញទស្សនៈរបស់ខ្លួនលើខ្លឹមសារនៃសេចក្តីព្រាងសេចក្តីសម្រេចលើកទី៣៥របស់គណៈកម្មាធិការបេតិកភណ្ឌពិភពលោកចំពោះប្រាសាទព្រះវិហារ។
យោងតាមសេចក្តីប្រកាសព័ត៌មានដដែល ភាគីថៃបានបដិសេធប្រាប់យូណេស្កូថា ប្រាសាទព្រះវិហារមិនមានការខូចខាតបាក់បែកនោះឡើយ។ ចំពោះកម្ពុជាវិញ គណៈប្រតិភូខ្លួនបានធ្វើបទបង្ហាញអំពីការឈ្លានពាន និងការវាយប្រហាររបស់ទ័ពថៃមកលើប្រាសាទព្រះវិហារ ដោយមានភស្តុតាងរូបភាពជាក់ស្តែងជាច្រើន។
លើសពីនេះ ប្រតិភូតំណាងប្រទេសកម្ពុជាបានកំពុងបន្តអំពាវនាវអោយមានបេសកកម្មរបស់អ្នកជំនាញការដើម្បីវាយតម្លៃលើការខូចខាត និងរៀបចំជួសជុលប្រាសាទព្រះវិហារ ព្រមទាំងការទប់ស្កាត់មិនអោយមានការបំផ្លាញ នាពេលខាងមុខទៀត។
នៅក្នុងកិច្ចប្រជុំគណៈរដ្ឋមន្ត្រីកាលពីព្រឹកថ្ងៃសុក្រនេះដែរ លោកនាយករដ្ឋមន្ត្រីហ៊ុន សែនបានថ្លែងបញ្ជាដល់មេបញ្ជាការ និងពលទាហាននៅសមរភូមិព្រំដែនកម្ពុជាថៃ អោយរក្សាភាពស្ងៀមស្ងាត់ និងមិនត្រូវបង្កសកម្មភាពណាមួយដែលអាចនាំអោយមានអសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ