កម្ពុជាប្រាប់ថៃថា គ្មានកិច្ចប្រជុំគណៈកម្មការព្រំដែនទូទៅ ក្នុងពេលនេះទេ
ទាំងនាយករដ្ឋមន្ត្រីថៃ អាប់ភីស៊ីត វេចាជីវ៉ា និងរដ្ឋមន្ត្រីការពារជាតិថៃលោកប្រាវីត វុងស៊ូវុន បានថ្លែងប្រាប់អ្នកសារព័ត៌មានអំពីបំណងរបស់ថៃដែលរង់ចាំកិច្ចប្រជុំគណៈកម្មការព្រំដែនទូទៅ នៅក្នុងខែមីនា។ កិច្ចប្រជុំគណៈកម្មការព្រំដែនទូទៅដែលថៃអត្ថាធិប្បាយនឹងក្លាយជាតុពិភាក្សាអំពីស្ថានភាពតាមព្រំដែនផង និងការទទួលយកក្រុមអ្នកសង្កេតការណ៍ឥណ្ឌូនេស៊ីផង។ អ្នកនាំពាក្យក្រសួងការពារជាតិកម្ពុជាបានបដិសេធថា មិនមានកិច្ចប្រជុំគណៈកម្មការព្រំដែនទូទៅក្នុងខែមីនានេះទេ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លាង ដឺលុចពីទីក្រុងភ្នំពេញ
នៅពេលដែលកម្ពុជាកំពុងរង់ចាំទទួលអ្នកសង្កេតការណ៍ឥណ្ឌូនេស៊ីមកឈរជើងជាមួយកងទ័ពខ្លួននៅព្រំដែន រដ្ឋាភិបាលថៃឯណោះវិញមិនបាននិយាយអំពីអ្នកសង្កេតការណ៍ឥណ្ឌូនេស៊ីនេះទៀតឡើយ។ រដ្ឋមន្ត្រីក្រសួងការពារជាតិថៃ លោកប្រាវីត វុងស៊ូវុនចង់អោយមានកិច្ចប្រជុំបន្ទាន់ របស់គណៈកម្មការព្រំដែនទូទៅ General Border Committee នៅក្នុងខែមីនានេះ។ កិច្ចប្រជុំនេះ ត្រូវធ្វើឡើងក្រោមការដឹកនាំរួមគ្នារវាងរដ្ឋមន្ត្រីការពារជាតិទាំងពីរប្រទេស។
រដ្ឋមន្ត្រីការពារជាតិថៃបានប្រាប់អ្នកកាសែតថា កិច្ចប្រជុំនេះនឹងអាចដោះស្រាយបញ្ហាយោធានៅតាមព្រំដែន និងពិភាក្សាអំពីការទទួលយកអ្នកសង្កេតការណ៍ឥណ្ឌូនេស៊ីផង។ រីឯលោកនាយករដ្ឋមន្ត្រីថៃអាប់ភីស៊ីត វេចាជីវ៉ាវិញថែមទាំងបាននិយាយថា កិច្ចប្រជុំគណៈកម្មការព្រំដែនទូទៅរវាងរដ្ឋមន្ត្រីការពារជាតិទាំងពីរ នឹងប្រព្រឹត្តទៅ នៅថ្ងៃទី៧ និងទី៨មីនានេះទៀតផង។
អ្នកនាំពាក្យក្រសួងការពារជាតិកម្ពុជា លោកឧត្តមសេនីយឯក ឈុំ សុជាតិច្រានចោលទាំងស្រុងនូវសេចក្តីថ្លែងការណ៍របស់រដ្ឋមន្ត្រីការពារជាតិ និងរបស់ប្រមុខរដ្ឋាភិបាលថៃ។ លោក ឈុំ សុជាតិបានបញ្ជាក់ នៅថ្ងៃសុក្រទី ៤មីនានេះថា ចំពោះការប្រជុំគណៈកម្មការព្រំដែនទូទៅនោះ គឺកម្ពុជាជាម្ចាស់ផ្ទះនៅក្នុងឆ្នាំនេះ។ ដូច្នេះគឺកម្ពុជាជាអ្នកសម្រេចរៀបចំ។ ប៉ុន្តែថា ក្នុងកាលៈទេសៈនេះ វាមិនមានអំណោយផលល្អសម្រាប់ការរៀបចំកិច្ចប្រជុំនេះឡើយ។ ដូច្នេះគ្មានកិច្ចប្រជុំណាមួយត្រូវបានគ្រោងទុកដូចថ្នាក់ដឹកនាំរដ្ឋាភិបាលក្រុងបាងកកនិយាយនោះឡើយ។
អ្នកនាំពាក្យក្រសួងការពារជាតិដដែលបន្តថា បើទោះជាមានកិច្ចប្រជុំគណកម្មការព្រំដែនទូទៅមែននោះ ក៏កិច្ចប្រជុំនេះមិនមានអ្វីពាក់ព័ន្ធនឹងការទទួលយកអ្នកសង្កេតការណ៍ឥណ្ឌូនេស៊ីនោះដែរ។ សម្រាប់លោកឈុំ សុជាតិ ថៃកំពុងរកលេស ចង់ឲ្យគេបំភ្លេចចោលសំណុំរឿងទទួលយកអ្នកសង្កេតការណ៍ឥណ្ឌូនេស៊ី ដោយបង្វែរខ្លួនមកនិយាយអំពីកិច្ចប្រជុំគណៈកម្មការព្រំដែនទូទៅ ដែលកម្ពុជាមិនទាន់សម្រេចអ្វីទាល់តែសោះទៅវិញ។ ថ្នាក់ដឹកនាំរដ្ឋាភិបាលក្រុងភ្នំពេញបានបង្ហាញជំហរតាំងពីដំបូងហើយថា ប្រសិនបើថៃបែរជាបដិសេធ ឬនៅរារែកក្នុងការទទួលយកអ្នកសង្កេតការណ៍ឥណ្ឌូនេស៊ីមែននោះ កម្ពុជាក៏នៅតែសម្រេចទទួលយកអ្នកសង្កេតការណ៍ឥណ្ឌូនេស៊ីជាឯកតោភាគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ