កម្ពុជា ប្រគល់កំណត់ទូត តវ៉ាទៅថៃ រឿងបាញ់សម្លាប់ពលរដ្ឋខ្មែរ នៅជាយដែន
នៅព្រឹកថ្ងៃអង្គារនេះ ក្រសួងការបរទេសកម្ពុជា បានប្រគល់កំណត់ទូត ទៅកាន់រដ្ឋាភិបាលថៃ តាមរយៈឯកអគ្គរាជទូតថៃ ប្រចាំកម្ពុជា ដើម្បីតវ៉ា ចំពោះករណីទាហានថៃ បាញ់សម្លាប់ប្រជាពលរដ្ឋខ្មែរ ចំនួន ៣ នាក់ កាលពីថ្ងៃទី២២ ខែកុម្ភៈ ឆ្នាំ២០១២ នៅតំបន់ព្រំដែនខេត្តឧត្តរមានជ័យ។ ទូតថៃបានស្នើឲ្យអាជ្ញាធរជាប់ព្រំដែនប្រទេសទាំងពីរ បង្កើតគណៈកម្មការរួមមួយ ហើយជួបប្រជុំដោះស្រាយលើករណីបាញ់ប្រហារនេះ។ តាមក្រសួងការបរទេស ក្នុងដើមឆ្នាំ២០១២ មានពលរដ្ឋខ្មែរ ៧ នាក់ ត្រូវបានទាហានថៃ បាញ់សម្លាប់ ខណៈដែលឆ្នាំ២០១១ យ៉ាងហោចណាស់ មានពលរដ្ឋខ្មែរ ១២ នាក់ ត្រូវបានថៃ បាញ់សម្លាប់ ដោយសារតែពលរដ្ឋខ្មែរ ឆ្លងដែនចូលទឹកដីថៃ ដើម្បីលួចកាប់ឈើ។
ចុះផ្សាយនៅថ្ងៃ៖
ស្តាប់ - ០២:៤៥
កំណត់ទូតតវ៉ាផ្លូវការមួយសន្លឹករបស់រដ្ឋាភិបាលកម្ពុជា ត្រូវបានធ្វើឡើងតាមរយៈក្រសួងការបរទេសកម្ពុជា។ លោក ឡុង វិសាលោ រដ្ឋលេខាធិការក្រសួងការបរទេស បានប្រគល់កំណត់ទូត ជូនផ្ទាល់ដៃទៅលោក សមពុង សាងហ្គាងប៊ុន ( Sampong Sanguangbun ) ឯកអគ្គរាជទូតថៃ ប្រចាំកម្ពុជា កាលពីព្រឹកថ្ងៃទី២៨ ខែកុម្ភៈ ឆ្នាំ២០១២ នៅទីស្តីការក្រសួងការបរទេស ក្នុងរាជធានីភ្នំពេញ។
កំណត់ទូតតវ៉ា បានទាមទារឲ្យរដ្ឋាភិបាលថៃ យកចិត្តទុកដាក់ចំពោះការរំលោភសិទ្ធិមនុស្ស ដែលកើតមានលើពលរដ្ឋកម្ពុជា។ នោះគឺកាលពីថ្ងៃទី២២ ខែកុម្ភៈ ឆ្នាំ២០១២ ទាហានថៃ បានបើកការបាញ់ប្រហារលើក្រុមអ្នកភូមិកម្ពុជា ដែលបានឆ្លងដែនទៅកាន់ប្រទេសថៃ នៅក្នុង ខេត្តសូរិន្ទ ជាប់ព្រំដែនកម្ពុជា ក្នុងខេត្តឧត្តរមានជ័យ។ យុវជនកម្ពុជា ៣ នាក់ ចាប់ពីអាយុ ១៩ ឆ្នាំ ដល់ ៣០ ឆ្នាំ ត្រូវទាហានថៃបាញ់ស្លាប់ ក្នុងពេលពលរដ្ឋខ្មែរមួយក្រុម ឆ្លងដែន ចូលទឹកដីថៃ ដើម្បីកាប់ឈើ។
រដ្ឋាភិបាលកម្ពុជា បានចាត់ទុកថា អំពើបាញ់សម្លាប់ពលរដ្ឋខ្មែរ ដែលធ្វើឡើងដោយទាហានថៃ នៅតំបន់ព្រំដែននោះ ថារំលោភលើគោលការណ៍សិទ្ធិមនុស្សអន្តរជាតិ និងជាការរំលោភលើកិច្ចព្រមព្រៀងកន្លងមក។
រដ្ឋាភិបាលកម្ពុជា បានទទូចស្នើឲ្យអាជ្ញាធរថៃ បញ្ឈប់នូវអំពើបាញ់ប្រហារ ហើយគួរតែចាប់នាំខ្លួនពលរដ្ឋខ្មែរ ដែលឆ្លងដែនខុសច្បាប់ ទៅកាន់តុលាការ ដើម្បីកាត់ទោស។
បន្ទាប់ជួប និងប្រគល់កំណត់ទូតតវ៉ា ដល់ឯកអគ្គរាជទូតថៃ ប្រចាំកម្ពុជា លោក ឡុង វិសាលោ រដ្ឋលេខាធិការក្រសួងការបរទេស បានថ្លែងថា កម្ពុជាចង់បញ្ជាក់ពីការមិនសប្បាយចិត្ត ចំពោះទង្វើរបស់ទាហានថៃ ដែលបានបាញ់សម្លាប់ប្រជាពលរដ្ឋខ្មែរ ពីព្រោះរឿងនេះ កើតឡើងជាញឹកញាប់ និងសឹងតែដដែលៗ។ ករណីនេះ ថៃឆ្លើយថា មកពីប្រជាពលរដ្ឋខ្មែរ ចូលកាប់ឈើខុសច្បាប់លើដីថៃ ហើយមានកាំភ្លើងបាញ់ថៃមុន។ ក៏ប៉ុន្តែលោក ឡុង វិសាលោ បានចាត់ទុកចម្លើយនេះ ជាការឆ្លើយដោះសាររបស់ថៃ។ ឯកអគ្គរាជទូតថៃ បានលើកដំណោះស្រាយមួយ ចង់ឲ្យអាជ្ញាធរជាប់ព្រំដែនប្រទេសទាំងពីរ ជួបគ្នាដោះស្រាយ និងបង្កើតគណៈកម្មការចម្រុះមួយ ដើម្បីកុំឲ្យកើតមានករណីឆ្លងដែន ចូលទឹកដីថៃ ដែលនាំដល់ការបាញ់ប្រហារ ដូចពេលកន្លងមក។
មន្ត្រីក្រសួងការបរទេស បានច្រានចោលនូវរបាយការណ៍របស់កាសែត ចំពោះព័ត៌មានផ្សព្វផ្សាយថា មានប្រជាពលរដ្ឋខ្មែរចំនួន ១១ នាក់ ត្រូវបានទាហានថៃបាញ់សម្លាប់ ចាប់តាំងពីដើមឆ្នាំ២០១២។ ក៏ប៉ុន្តែតាមមន្ត្រីក្រសួងការបរទេស នៅដើមឆ្នាំ២០១២ មានពលរដ្ឋខ្មែរ ៧ នាក់ ត្រូវទាហានថៃបាញ់សម្លាប់ នៅតំបន់ព្រំដែន។ ចំណែកនៅឆ្នាំ២០១១ មានចំនួន ១២ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ