លោកឈាង វុន៖ សភានៅតែដំណើរការ ដោយមិនរង់ចាំបេក្ខជនអនុប្រធានទី១ថ្មីនោះឡើយ
លោកកឹម សុខា អនុប្រធានគណបក្សសង្គ្រោះជាតិ បានប្រកាសកាលពីល្ងាចមិញថា គណបក្សសង្គ្រោះជាតិ មិនស្នើបេក្ខជនអនុប្រធានទី១ថ្មី នៃរដ្ឋសភានោះទេ។ ការប្រកាសនេះ ជាការឆ្លើយតបនឹងលោកហេង សំរិន ប្រធានរដ្ឋសភាដែលបានស្នើឲ្យលោកសម រង្ស៊ី ប្រធានគណបក្សសង្រ្គោះជាតិ បញ្ជូនបេក្ខជនជាអនុប្រធានទី១ នៃរដ្ឋសភា ក្រោយពីទម្លាក់លោកកឹម សុខាចេញពីតំណែង។ យ៉ាងណាក៏ដោយ លោកឈាន វុន អ្នកនាំពាក្យរដ្ឋសភាជាតិ បានបញ្ជាក់ថា បើទោះបីគណបក្សសង្រ្គោះជាតិមិនដាក់បេក្ខជនថ្មី ក៏សភានៅតែដំណើរការជាធម្មតាដោយមិនរង់ចាំនោះឡើយ។
ចុះផ្សាយនៅថ្ងៃ៖
ស្តាប់ - ០២:១២
ថ្លែងតាមខ្សែទូរស័ព្ទប្រាប់វិទ្យុបារាំងអន្តរជាតិនៅព្រឹកថ្ងៃសៅរ៍ ទី៣១ ខែតុលា លោកឈាង វុន អ្នកនាំពាក្យរដ្ឋសភាជាតិ បានគូសបញ្ជាក់ថា រដ្ឋសភាមិនរង់ចាំការបញ្ជូនបេក្ខជនអនុប្រធានទី១នៃរដ្ឋសភាពីសំណាក់ថ្នាក់ដឹកនាំគណបក្សសង្រ្គោះជាតិនោះទេ។ បើតាមអ្នកនាំពាក្យរូបនេះ ដែលជាមន្ត្រីជាន់ខ្ពស់របស់គណបក្សប្រជាជនកម្ពុជាផងនោះ បើទោះបីគណបក្សប្រឆាំងដាក់ឫមិនដាក់បេក្ខជនថ្មីក្តី ក៏មិនប៉ះពាល់ដល់រដ្ឋសភាឡើយ ពោល គឺរដ្ឋសភានៅតែដំណើរការកិច្ចប្រជុំរបស់ខ្លួនជាធម្មតា ព្រោះមានកូរ៉ុមគ្រប់គ្រាន់។
ការបញ្ចាក់របស់លោកឈាន វុន នៅពេលនេះ គឺបានធ្វើឡើងបន្ទាប់ពីលោកកឹម សុខា អនុប្រធានគណបក្សសង្រ្គោះជាតិកាលពីល្ងាចថ្ងៃសុក្របានប្រកាសថា គណបក្សប្រឆាំងនឹងមិនស្នើបេក្ខជនអនុប្រធានទី១ថ្មីនៃរដ្ឋសភានោះឡើយ។ លោកកឹម សុខា ហ៊ានប្រកាសដូចនេះ បន្ទាប់ពីលោកបានពិភាក្សា និង ឯកភាពគ្នាជាមួយលោកសម រង្ស៊ី ប្រធានគណបក្សសង្រ្គោះជាតិ។ ការប្រកាសរបស់លោកអនុប្រធានគណបក្សប្រឆាំងនេះដែរ គឺជាការឆ្លើយតបទៅនឹងលិខិតរបស់លោកហេង សំរិន ប្រធានរដ្ឋសភាទៅកាន់លោកសម រង្ស៊ី ដើម្បីស្នើបញ្ជូនបេក្ខជនជាអនុប្រធានទី១ថ្មីនៃរដ្ឋសភា នីតិកាលទី៥។
ទោះជាយ៉ាងណាក៏ដោយ លោកឈាង វុន បានសង្កត់ធ្ងន់ថា តំណែងជាអនុប្រធានទី១នេះ នៅតែរក្សាសម្រាប់កូតាមកពីគណបក្សសង្រ្គោះជាតិ ដែលជាការគោរពទៅតាមកិច្ចព្រមព្រៀងបិទបញ្ចប់ជម្លោះនយោបាយរវាងគណបក្សកាន់អំណាច និង ប្រឆាំងកាលពីថ្ងៃទី២២ កក្កដា ឆ្នាំ២០១៤។
គួរបញ្ជាក់ថា ការឆ្លងឆ្លើយគ្នាទាក់ទងនឹងបេក្ខជនតំណែងអនុប្រធានទី១ នៃរដ្ឋសភានេះ បានកើតឡើង ក្រោយពីតំណាងរាស្រ្តគណបក្សប្រជាជនកម្ពុជាចំនួន៦៨រូបកាលពីព្រឹកថ្ងៃសុក្រ បានបោះឆ្នោតទម្លាក់លោកកឹម សុខា ចេញពីតំណែង។ បើតាមលោកកឹម សុខា មូលហេតុដែលគណបក្សសង្រ្គោះជាតិមិនដាក់បេក្ខជនថ្មីនេះ ព្រោះថា ការទម្លាក់រូបលោកគឺផ្ទុយនឹងរដ្ឋធម្មនុញ្ញ និងរំលោភលើកិច្ចព្រមព្រៀងនយោបាយរវាងគណបក្សទាំងពីរ។ ក៏ប៉ុន្តែការលើកឡើងនេះ ត្រូវបានរដ្ឋសភា និង គណបក្សប្រជាជនកម្ពុជាបានច្រានចោល ដោយអះអាងថា គឺបានធ្វើឡើងស្របតាមបទបញ្ជាផ្ទៃក្នុងនៃរដ្ឋសភា និង រដ្ឋធម្មនុញ្ញផងដែរ។
ចំណែកទាក់ទងនឹងកិច្ចព្រមព្រៀងនយោបាយវិញ លោកសុខ ឥសាន អ្នកនាំពាក្យគណបក្សប្រជាជនកម្ពុជា បានបកស្រាយថា មិនបានរំលោភនោះទេ។ មិនរំលោភក៏ព្រោះថា បន្ទាប់ពីទម្លាក់លោកកឹម សុខា តំណែងអនុប្រធានទី១នៃរដ្ឋសភាគឺទុកឲ្យកូតាមកពីគណបក្សសង្រ្គោះជាតិដដែលដោយគណបក្សប្រជាជនកម្ពុជាមិនបានរំលោភយកតំណែងនេះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ