ក្រុមយុវជនអតីតCNRP នឹងធ្វើបាតុកម្មទាមទារឱ្យជប៉ុនជួយដឹងឮពីមាតុភូមិនិវត្តន៍លោកសម រង្ស៊ីនៅថ្ងៃស្អែក
នៅថ្ងៃចន្ទ ទី១២ ខែ សីហាស្អែកនេះ សកម្មជន និង អ្នកគាំទ្រអតីតគណបក្សសង្គ្រោះជាតិនៅក្នុងប្រទេសជប៉ុន នឹងជួបជុំគ្នាធ្វើបាតុកម្មនៅក្នុងទីក្រុងតូក្យូ។ បាតុកម្មនេះ ធ្វើឡើងក្នុងគោលបំណងទាមទារឱ្យរដ្ឋាភិបាលជប៉ុន និងប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសជួយដឹងឮ និង សម្របសម្រួលការធ្វើមាតុភូមិនិវត្តន៍របស់លោកសម រង្ស៊ី មកកម្ពុជា។
ចុះផ្សាយនៅថ្ងៃ៖
ស្តាប់ - ០២:១៤
បាតុកម្មជាថ្មីនៅក្នុងប្រទេសជប៉ុននេះនឹងដឹកនាំ និង រៀបចំធ្វើឡើងដោយគណៈកម្មការចលនាសង្គ្រោះជាតិប្រចាំនៅប្រទេសជប៉ុន ហើយបាតុកម្មនេះ នឹងធ្វើឡើងក្រោមវត្តមានរបស់លោកស្រីមូរ សុខហួរ ដែលជាអនុប្រធានអតីតគណបក្សសង្គ្រោះជាតិ។ គណៈកម្មការចលនាសង្គ្រោះជាតិនៅជប៉ុនគូសបញ្ជាក់ឱ្យដឹងថា បាតុកម្មនេះធ្វើឡើងក្នុងគោលបំណងទាមទារឱ្យប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសជួយសង្គ្រោះលទ្ធិប្រជាធិបតេយ្យនៅកម្ពុជា ព្រមទាំងទាមទារឲ្យប្រទេសហត្ថលេខីទាំងនោះជួយដឹងឮអំពីការធ្វើមាតុភូមិនិវត្តន៍របស់លោកសម រង្ស៊ី មកកាន់ប្រទេសកម្ពុជាវិញ។
បន្ថែមលើនេះ ក្រុមអ្នកគាំទ្រអតីតបក្សប្រឆាំងក៏នឹងយកការធ្វើបាតុកម្មនេះ ដើម្បីប្រកាសជាសាកលថា ពួកគេប្រឆាំងដាច់ខាតរាល់អំពើហិង្សារបស់លោកនាយករដ្ឋមន្ត្រីហ៊ុន សែន មកលើប្រតិភូអតីតគណបក្សសង្គ្រោះជាតិ និង ពលរដ្ឋខ្មែរដែលនឹងធ្វើមាតុភូមិនិវត្តន៍ជាមួយលោកសម រង្ស៊ី និង មិនទទួលស្គាល់រដ្ឋាភិបាលរបស់លោកនាយករដ្ឋមន្ត្រីហ៊ុន សែន។
ប៉ុន្តែ លោកសុខ ឥសាន អ្នកនាំពាក្យគណបក្សប្រជាជនកម្ពុជា បានអះអាងថា បាតុកម្មនេះនឹងគ្មានបានការអ្វីនោះទេ ព្រោះប្រទេសហត្ថលេខីទាំងនោះគ្មានហេតុផលអ្វីមកឈឺឆ្អាលនឹងរឿងលោកសម រង្ស៊ីឡើយ។លោកបន្ថែមថា បើទោះបីក្រុមយុវជនខ្មែរនៅជប៉ុនធ្វើបាតុកម្មរាប់លានដងទៀតក៏ដោយ ក៏ប្រជាជនកម្ពុជាកំពុងរស់នៅដោយសប្បាយរីករាយក្រោមម្លប់សន្តិភាពនិងការអភិវឌ្ឈន៏ប្រទេស។ ចំពោះបញ្ហាប្រជាធិបតេយ្យវិញ អ្នកនាំពាក្យបក្សកានអំណាច គូសបញ្ជាក់ថា ប្រជាធិបតេយ្យនៅកម្ពុជានៅតែរីកចម្រើនជាធម្មតា មិនត្រូវការស្តារនោះទេ ។
ប៉ុន្តែ គណៈកម្មការចលនាសង្គ្រោះជាតិនៅជប៉ុនបានបញ្ជាក់ថា ការធ្វើបាតុកម្មនៅជប៉ុននេះ នឹងជាកាតាលីករដ៏សំខាន់មួយដើម្បីឱ្យប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសធ្វើការគាបសង្កត់កាន់តែខ្លាំងឡើងមកលើរដ្ឋាភិបាលកម្ពុជាក្នុងការជំរុញឱ្យស្ដារលទ្ធិប្រជាធិបតេតយ្យឡើងវិញ។ ជាមួយគ្នានេះ គណៈកម្មការចលនាសង្គ្រោះជាតិនៅជប៉ុន ក៏នៅបន្តអំពាវនាវឱ្យប្រជាពលរដ្ឋខ្មែរទាំងនៅជប៉ុន និង ប្រទេសផ្សេងទៀតក្នុងរួមក្នុងបាតុកម្មនេះផងដែរ បើទោះបីអ្នកនាំពាក្យប្រជាជនកម្ពុជាអះអាងថា ជាបាតុកម្មអត់បានប្រយោជន៍អ្វីក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ