កម្ពុជាស្នើUNICEFជួយកុមារផ្ទុកមេរោគអេដស៍នៅភូមិរកា
លោកហោ ណាំហុងរដ្ឋមន្ត្រីក្រសួងការបរទេសកម្ពុជានៅព្រឹកថ្ងៃសុក្រនេះ បានជួបពិភាក្សាជាមួយតំណាងអង្គការUNICEF ប្រចាំនៅកម្ពុជា លោកស្រីRana Flower នៅទីស្តីការក្រសួង។ ក្នុងកិច្ចពិភាក្សានោះដែរ លោករដ្ឋមន្ត្រីក្រសួងការបរទេសកម្ពុជា បានស្នើឱ្យអង្គការយូនីហ្សេវជួយដល់កុមារដែលមានផ្ទុកមេរោគអេដស៍នៅភូមិរកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
លោកហោណាំហុង រដ្ឋមន្ត្រីក្រសួងការបរទសកម្ពុជា បានស្នើឱ្យតំណាងអង្គការUNICEF លោកស្រី Rana Flower ជួយដល់កុមារដែលកំពុងផ្ទុកមេរោគអេដស៍នៅក្នុងភូមិរកាខេត្តបាត់ដំបង។ នេះបើតាមការបញ្ជាក់ពីលោកកុយ គួងអ្នកនាំពាក្យក្រសួងការបរទេសកម្ពុជាដែលបានថ្លែងទៅកាន់អ្នកសារព័ត៌មានជំនួប។ ការស្នើឡើងនេះ គឺធ្វើឡើងនៅក្នុងជំនួបពិភាក្សាកាលពីព្រឹកថ្ងៃសុក្រទី២០ មីនានេះ ខណៈដែលកុមារកម្ពុជាក្នុងភូមិរកា ប្រមាណ៦០នាក់បានធ្លាក់ខ្លួនឆ្លងមេរោគអេដស៍។ មេរោគអេដស៍ដែលបានចម្លងដល់ប្រជាពលរដ្ឋភូមិរកាប្រមាណ២៤០នាក់ ដោយសារតែការប្រើប្រាស់ម្ជុលសារ៉ាងរួមគ្នារបស់លោកគ្រូពេទ្យភូមិយ៉ែម ជ្រិន។
ក្រៅពីសំណើរគាំពារដល់ប្រជាពលរដ្ឋភូមិរកានោះ លោក ឧបនាយករដ្ឋមន្ត្រី ក៏បានស្នើឱ្យអង្គការយូនីហ្សេវ ពិនិត្យមើលលើកុមារអណាថានៅតាមដងផ្លូវដែលកំពុងធ្វើសកម្មភាពលក់ផ្កា និងសុំទានតាមដងផ្លូវ និងបញ្ហាសុខភាពមាតា ទារក រួមទាំងការបោះបង់ការសិក្សារបស់កុមារី។ កុមារីដែលលោកប្រមុខការទូតកម្ពុជា បានបញ្ជាក់ថា បានបោះបង់ការសិក្សាច្រើន ដោយសារតែបញ្ហាកម្រិតជីវភាព និងកិច្ចការងារផ្ទះ។
លោកស្រីRana Flower បានសន្យានិងពិនិត្យរាល់សំណើររបស់ភាគីកម្ពុជាទាក់ទងនឹងបញ្ហារបស់កុមារនៅកម្ពុជានេះ។
សូមរំលឹកថា កុមារនៅភូមិរការប្រមាណ៦០នាក់ បានផ្ទុកមេរោគអេដស៍ក្នុងចំណោមប្រជាពលរដ្ឋប្រមាណ២៤០នាក់ដែលមានទាំងចាស់ប្រុសស្រី តាំងពីកុមារ ៧ខែរហូតដល់មនុស្សចាស់៧០ឆ្នាំ។ ប្រធានមជ្ឈមណ្ឌលសុខភាពភូមិរកា លោក លីប៊េងស៊ បានលើកឡើងថាសំណើររបស់រដ្ឋមន្ត្រីការបរទេសចំពោះអ្នកភូមិរកានេះ គឺមានសារសំខាន់ត្បិតអីកុមារប្រមាណ៦០នាក់ដែលកំពុងផ្ទុកមេរោគអេដស៍បានជួបប្រទះបញ្ហាសុខភាព និងជីវភាព។ ហើយវាជាការលើកទឹកចិត្តដល់កុមារឱ្យបន្តការសិក្សារបស់ពួកគេ។ កុមារដែលធ្លាប់បោះបង់ចោលការសិក្សាព្រោះតែមានការរើសអើងពីប្រជាពលរដ្ឋក្នុងភូមិ។ រហូតមកដល់ពេលនេះ ក្រសួងសុខាភិបាល បានផ្តល់ឱសថប្រឆាំងមេរោគអេដស៍បានត្រឹមតែ១៧០នាក់តែប៉ុណ្ណោះ ក្នុងចំណោមមនុស្សដែលផ្ទុកមេរោគអេដស៍ជាង២០០នាក់។
សូមបញ្ជាក់ថា រហូតមកដល់ពេលនេះ មានប្រជាពលរដ្ឋដែលមានផ្ទុកមេរោគអេដស៍ក្នុងភូមិរការ៦នាក់ហើយបានស្លាប់ ចំណែកឯមនុស្ស៦នាក់ផ្សេងទៀតកំពុងមានសភាពជំងឺដុនដាប។ នេះបើតាមការបញ្ជាក់ពីមន្ត្រីសុខាភិបាលឃុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ