ស្ថានភាពយោធានៅព្រំដែនព្រះវិហារ តានតឹងសាជាថ្មីនៅថ្ងៃនេះ
កងទ័ពកម្ពុជាបានបញ្ជូនកម្លាំង និងគ្រឿងសព្វាវុធទៅតំបន់ព្រំដែន ពិសេសព្រំដែនប្រាសាទវិហារនៅថ្ងៃនេះ ដើម្បីទប់ទល់ជាមួយទាហានថៃ ក្នុងករណីផ្ទុះអាវុធ។ ភាពតានតឹងផ្នែកយោធានៅតាមព្រំដែន ជាពិសេសនៅព្រំដែនប្រាសាទព្រះវិហារនៅថ្ងៃនេះ កើតមានឡើងនៅពេលដែលថៃទាមទារអោយកម្ពុជាដកទង់ជាតិរបស់ខ្លួនចេញពីវត្តកែវសិក្ខាគិរីស្វារៈ តែកម្ពុជាមិនបានយល់ព្រម។ រីឯយោធាថៃវិញ ចង់យកទង់ជាតិថៃរបស់គេមកដោតនៅក្នុងវត្តកែវសិក្ខាគិរីស្វារៈដែរ តែកម្ពុជាមិនអនុញ្ញាតនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
កម្លាំងយោធា និងគ្រឿងសព្វាវុធធុនធ្ងន់ត្រូវបានកម្ពុជាបញ្ជូនបន្ថែមទៀតទៅព្រំដែនកម្ពុជា ថៃ ជាពិសេសព្រំដែនប្រាសាទព្រះវិហារដែលធ្លាប់មានការផ្ទុះអាវុធជាច្រើនលើកមកហើយ។ ស្ថានភាពយោធានៅតាមតំបន់ព្រំដែនមានសភាពតានតឹង នេះបើតាមការបញ្ជាក់របស់អ្នកនាំពាក្យរដ្ឋាភិបាលកម្ពុជាលោក ខៀវ កាញារីទ្ធ នៅល្ងាចថ្ងៃសុក្រទី២៨មករានេះ។ លោក ខៀវ កាញារីទ្ធ បានថ្លែងប្រាប់វិទ្យុបារាំងអន្តរជាតិដោយលើកយកប្រសាសន៍របស់លោកនាយករដ្ឋមន្ត្រី ហ៊ុន សែន ដែលថា កម្ពុជាមិនអាចយកចំណុចណាមួយនៃប្រទេសកម្ពុជា ដើម្បីធ្វើជាការលួងចិត្តក្រុមថៃអាវលឿងនោះឡើយ។ យោងតាមការអះអាងរបស់លោក ខៀវ កាញារីទ្ធ ដដែល យោធាកម្ពុជាបានត្រៀមលក្ខណៈគ្រប់គ្រាន់ ដើម្បីការពារបូរណភាពទឹកដីរបស់ខ្លួន បើទោះជា ការផ្ទុះអាវុធអាចកើតមានឡើងនៅច្រើនកន្លែងនៅតាមបណ្តោយព្រំដែនកម្ពុជាថៃ ប្រវែងជាង៨០០គ.ម.នេះក៏ដោយ។
ស្ថានភាពក្តៅគគុកនៅតាមបណ្តោយព្រំដែនកម្ពុជាថៃ បានកើតឡើងនៅពេលដែលប្រមុខរដ្ឋាភិបាលថៃលោក អាភីស៊ីត វេចាជីវ៉ា បានប្រកាសទាមទារអោយកម្ពុជាដកទង់ជាតិរបស់ខ្លួនចេញពីវត្តកែវសិក្ខាគិរីស្វារៈ ដែលកម្ពុជាបញ្ជាក់ថាជារបស់ខ្លួនស្របតាមច្បាប់នោះ។ ប្រភពយោធាពីព្រំដែនជួរមុខនៃតំបន់ប្រាសាទព្រះវិហារបានអោយដឹងថា កងទ័ពថៃត្រូវបានបង្កើន ហើយពួកគេចង់យកទង់ជាតិថៃរបស់គេ ចូលមកដោតនៅក្នុងវត្តកែវសិក្ខាគិរីស្វារៈ។ ប៉ុន្តែកងទ័ពកម្ពុជាមិនអនុញ្ញាតឡើយ។
នៅថ្ងៃសុក្រទី២៨មករានេះ ក្រសួងការបរទេសកម្ពុជាក៏បានបញ្ចេញប្រតិកម្មខ្លាំងៗប្រឆាំងប្រមុខរដ្ឋាភិបាលថៃដែលបានស្រែកទាមទារអោយកម្ពុជាដកទង់ជាតិរបស់ខ្លួនចេញពីវត្តកែវសិក្ខាគិរីស្វារៈនោះ។ ក្រសួងការបរទេសកម្ពុជាបានលើកយកហេតុផលផ្លូវច្បាប់នានាដើម្បីអះអាងសាជាថ្មីថា វត្តកែវសិក្ខាគិរីស្វារៈ ពិតជាបានស្ថិតនៅក្នុងទឹកដីកម្ពុជា។ សេចក្តីប្រកាសរបស់ក្រសួងការបរទេសខ្មែរបានចាត់ទុកការអត្ថាធិប្បាយរបស់នាយករដ្ឋមន្ត្រីថៃ នៅក្នុងបរិបទដែលកងទ័ពថៃធ្វើសមយុទ្ធយោធាផងនោះ ថាគឺជាការញុះញង់ជំរុញអោយមានការឈា្លនពានកម្ពុជា។
ក្រសួងការបរទេសបានបញ្ជាក់ថា សេចក្តីថ្លែងការណ៍របស់នាយករដ្ឋមន្ត្រីថៃនេះ កម្ពុជាមិនអាចទទួលយកបានទេ។ ហើយកម្ពុជាសូមទាត់ចោលយ៉ាងម៉ឺងម៉ាត់នូវការទាមទារដ៏ប្រមាថនេះ។ ប្រទេសកម្ពុជាសូមរក្សាសិទ្ធិស្របច្បាប់ ដើម្បីការពារនូវបូរណភាព និងអធិបតេយ្យភាពរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ