ពលរដ្ឋខ្មែរធ្វើបាតុកម្មប្រឆាំងថៃនៅមុខតុលាការឡាអេ
ពលរដ្ឋខ្មែរដែលរស់នៅក្រៅប្រទេសបានអំពាវនាវឲ្យមានបាតុកម្មមួយនៅមុខតុលាការទីក្រុងឡាអេនៅប្រទេសហូឡង់នៅថ្ងៃទី២៨ និង៣០ឧសភានេះ ដើម្បីប្រឆាំងការឈ្លានពានទឹកដីរបស់ថៃពិសេសការប៉ុនប៉ងចង់បានប្រាសាទនានារបស់ខ្មែរ។ សេចក្តីអំពាវនាវត្រូវបានផ្សព្វផ្សាយតាមប្រពន្ធ័អ៊ិនធឺណែតទៅគ្រប់ទិសទី។ នៅឯកម្ពុជា អ្នកនាំពាក្យក្រសួងការបរទេសកម្ពុជាអះអាងថាបានទទួលព័ត៌មាននេះដែរ និងបានគាំទ្រទឹកចិត្តស្នេហាជាតិរបស់ពលរដ្ឋខ្មែរទាំងនោះ តែមន្ត្រីក្រសួងការបរទេសសំណូមពរកុំឲ្យបាតុកររំខានដល់តុលាការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
តាមរយៈសារអេឡិចត្រូនិចដែលគេអាចទទួលបាននៅកម្ពុជា អ្នករៀបចំកម្មវិធីបានអំពាវនាវឲ្យពលរដ្ឋខ្មែរនៅគ្រប់ទិសទីចំណាយពេលមួយថ្ងៃដើម្បីចូលរួមបាតុកម្មអហិង្សាមួយនៅពីមុខអគារតុលាការយុត្តិធម៌អន្តរជាតិក្រុងឡាអេ ប្រទេសហូឡង់។ បាតុកម្មនេះត្រូវបានរៀបចំធ្វើនៅថ្ងៃទី២៨ ឧសភានេះ និងនៅថ្ងៃទី៣០ឧសភាម្តងទៀត។ គោលបំណងនៃការរៀបចំបាតុកម្ម គឺដើម្បីទាមទារឲ្យប្រទេសថៃបញ្ឈប់ការឈ្លានពានមកលើកម្ពុជា ជំរុញឲ្យតុលាការយុត្តិធម៌អន្តរជាតិក្រុងឡាអេឲ្យថ្កោលទោសថៃឈ្លានពាន និងគាំទ្ររដ្ឋាភិបាលកម្ពុជាឲ្យដោះស្រាយបញ្ហាព្រំដែនជាលក្ខណៈអន្តរជាតិ។
លោក គ្រី សេនា អ្នកផ្តួចផ្តើមរៀបចំបាតុកម្មនៅក្រុងឡាអេ ប្រទេសហូឡង់
ការរៀបចំធ្វើបាតុកម្មអហិង្សានេះបានប្រព្រឹត្តទៅខណៈដែលតុលាការទីក្រុងឡាអេកំពុងរៀបចំបើកសវនាការ ស្តីពីចំណាត់ការវិធានការបន្ទាន់ដើម្បីការពារប្រាសាទព្រះវិហារចេញពីគ្រោះថ្នាក់នៃការឈ្លានពាន។ សវនាការនេះនឹងបើកធ្វើនៅថ្ងៃទី៣០និង៣១ឧសភានេះដែលមានការចូលរួមពីសំណាក់ភាគីថៃនិងកម្ពុជា។ លោក ហោ ណាំហុង រដ្ឋមន្ត្រីការបរទេសកម្ពុជាបានដឹកនាំគណៈប្រតិភូទៅចូលរួមស្តាប់សវនាការនេះ។ នៅឯកម្ពុជាឯណេះ លោក កុយ គួង អ្នកនាំពាក្យក្រសួងការបរទេសបានអះអាងថា លោកក៏បានទទួលព័ត៌មានស្តីពីបាតុកម្មនេះដែរ។ លោកបានសម្តែងការគាំទ្រចំពោះទឹកចិត្តស្នេហាជាតិរបស់ពលរដ្ឋខ្មែរទាំងនោះ ក៏ប៉ុន្តែ មន្ត្រីក្រសួងការបរទេសរូបនេះសំណូមពរថា បាតុកម្មគួរធ្វើនៅពីមុខស្ថានទូតថៃនៅទីក្រុងឡាអេដើម្បីចៀសវាងការរំខានដល់តុលាការ។
ក្រសួងការបរទេសកម្ពុជាបានដាក់ពាក្យបណ្តឹងទៅតុលាការទីក្រុងឡាអេកាលពីថ្ងៃទី២៨មេសាឆ្នាំ២០១១ដោយប្តឹងទាមទារឲ្យតុលាការចាត់ការសំណុំរឿងពីរផ្សេងគ្នាគឺ ទី១សុំឲ្យតុលាការឡាអេបកស្រាយឡើងវិញនូវសាលក្រមឆ្នាំ១៩៦២ ស្តីពីប្រាសាទព្រះវិហារ និងទី២ សុំឲ្យតុលាការនេះចាត់វិធានការបន្ទាន់ដើម្បីការពារប្រាសាទព្រះវិហារចេញពីគ្រោះថ្នាក់នៃការឈ្លានពាន។ ឥឡូវនេះ តុលាការបានលើកយកសំណើទី២នេះមកដោះស្រាយមុន។
កាលពីថ្ងៃសុក្រម្សិលមិញ អង្គការយូណេស្កូ ដែលមានទីស្នាក់ការធំនៅទីក្រុងប៉ារីសប្រទេសបារាំងទើបតែបានបិទបញ្ចប់កិច្ចប្រជុំសម្របសម្រួលរវាងកម្ពុជា ស្តីពីការខូចខាតប្រាសាទព្រះវិហារដោយសារគ្រាប់កាំភ្លើងរបស់ថៃដែរ។ ប៉ុន្តែ កិច្ចប្រជុំនេះមិនសម្រេចបានលទ្ធផលជាផ្លែផ្កាអ្វីទេដោយសារតែថៃព្យាយាមធ្វើឲ្យរាំងស្ទះ។ នេះអាចជាហេតុផលមួយទៀតដែលធ្វើឲ្យពលរដ្ឋខ្មែរនៅក្រៅប្រទេសធ្វើបាតុកម្មប្រឆាំងនឹងថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ