តុលាការកម្ពុជាចោទជនជាតិថៃទាំង៧នាក់ពីបទឆ្លងដែនខុសច្បាប់
តុលាការរាជធានីភ្នំពេញបានសម្រេចចោទប្រកាន់ជនជាតិថៃទាំង៧នាក់ នៅថ្ងៃព្រហស្បតិ៍នេះ។ ទន្ទឹមគ្នានេះ ប្រមុខការទូតថៃលោកកាស៊ីត ភិរម្យបានមកដល់ប្រទេសកម្ពុជា កាលពីរសៀលថ្ងៃព្រហស្បតិ៍ ហើយបានជួបលោកហោ ណាំហុង រដ្ឋមន្ត្រីការបរទេសកម្ពុជា ដើម្បីស្តាប់អំពីដំណើរដើមទងនៃការចាប់ខ្លួនជនជាតិថៃទាំង៧នាក់ដែលក្នុងនោះមានសមាជិករដ្ឋសភា២រូបផង។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់លាង ដឺលុចពីទីក្រុងភ្នំពេញ
ជនជាតិថៃទាំង៧នាក់ត្រូវបានបញ្ជូនមកដល់តុលាការរាជធានីតាំងពីព្រឹក ដើម្បីសាកសួរតាមនីតិវិធីច្បាប់។ រហូតដល់ម៉ោងជិត៥ល្ងាចទើបបានព្រះរាជអាជ្ញាសម្រេចចោទប្រកាន់ជនជាតិថៃទាំង៧នាក់ ក្នុងបទចោទចំនួន២គឺ ទី១ ការឆ្លងដែនខុសច្បាប់ចូលទឹកដីកម្ពុជា និងបទចោទទី២នោះគឺ ការលួចចូលក្នុងទីលានយោធាដោយខុសច្បាប់ក្នុងបំណងទុច្ចរិត។ ក្រោយពីត្រូវបានចោទប្រកាន់ហើយនោះ ជនជាតិថៃទាំង៧នាក់ត្រូវបានបញ្ជូនទៅមន្ទីរឃុំឃាំងបណ្តោះអាសន្នព្រៃ ស។
លោកកាស៊ីត ភិរម្យ ដែលជាប្រមុខការទូតថៃបានមកដល់កម្ពុជា កាលពីរសៀលថ្ងៃព្រហស្បតិ៍នេះដែរ។ នៅប្រទេសកម្ពុជា លោកកាស៊ីត មកជួបតែរដ្ឋមន្ត្រីការបរទេសខ្មែរ លោកហោ ណាំហុងតែម្នាក់ប៉ុណ្ណោះ កាលពីម៉ោង៤រសៀលថ្ងៃនេះ។ ក្រោយពីជំនួបជិតមួយម៉ោង នៅក្នុងក្រសួងការបរទេស លោកកាស៊ីតបានថ្លែងប្រាប់អ្នកកាសែតថា លោកមកស្តាប់រឿងហេតុការណ៍ពិតពីកម្ពុជា ជុំវិញការចាប់ខ្លួនជនជាតិថៃទាំង៧នាក់នោះ។ ហើយលោកសង្ឃឹមថា បញ្ហានឹងត្រូវដោះស្រាយបានឆាប់រហ័ស។
បើតាមការអះអាងរបស់លោកហោ ណាំហុង ដែលជាប្រមុខការទូតកម្ពុជានោះ គឺថាភាគីទាំងពីរមិនបាននិយាយអំពីការស្នើដោះលែងអ្វីនោះទេ។ ជាងនេះទៅទៀតគឺថា លោកហោ ណាំហុងបានប្រាប់ទៅលោកកាស៊ីតថែមទៀតថា សំណុំរឿងបានធ្លាក់ដល់ដៃតុលាការ ហើយ ខាងរដ្ឋាភិបាលមិនអាចលូកដៃចូលក្នុងកិច្ចការតុលាការនោះទេ។
នៅក្នុងសន្និសីទកាសែត ក្រោយជំនួបនៃប្រមុខការទូតទាំងពីរ លោកហោ ណាំហុង ដែលឈរនៅចំពោះមុខលោកកាស៊ីតផងនោះ បានថ្លែងថា តាមពិតនេះមិនមែនជាលើកដំបូងទេដែលជនជាតិថៃបានចូលមកលើទឹកដីកម្ពុជា។ គឺលើកទី៣ហើយ។ ប៉ុន្តែកាលពីលើកទី១ ក្នុងខែកក្កដា និងលើកទី២ក្នុងខែកញ្ញានោះ ពូកគេបានចូលមកលើដីខ្មែរតែបន្តិច ដូច្នេះអាជ្ញាធរខ្មែរក៏បានចាប់ខ្លួនពួកគេ ហើយបញ្ជូនពួកគេចេញទៅវិញ។
ប៉ុន្តែ លើកទី៣នេះ ពួកគេបានចូលជ្រៅមកដល់ភូមិខ្មែរ គឺភូមិជោគជ័យ ដែលមានចំងាយជាង១គម ពីបង្គោលព្រំដែនលេខ៤៦។ លោកហោ ណាំហុងបន្តថា ដូច្នេះ ជនជាតិថៃទាំង៧នាក់នោះ មិនមែនដើរវង្វេងផ្លូវទេ គឺមានចេតនាចូលមកក្នុងទឹកដីកម្ពុជាតែម្តង។ ហើយបើយោងតាមការបញ្ជាក់របស់រដ្ឋមន្ត្រីការបរទេសកម្ពុជាដដែល លោកកាស៊ីតក្រោយពីបានស្តាប់ការរៀបរាប់របស់លោកហោ ណាំហុង លោកកាស៊ីតក៏បាននិយាយថា លោកមិនបានដឹងថា ជនជាតិថៃទាំងនោះបានចូលជ្រៅមកក្នុងទឹកដីកម្ពុជាអ៊ីចឹងដែរ។
តាំងពីថ្ងៃទី ២៩ធ្នូ ក្រោយការចាប់ខ្លួនជនជាតិថៃទាំងនោះ លោកនាយករដ្ឋមន្ត្រីខ្មែរហ៊ុន សែនបានថ្លែងសារប្រាប់រដ្ឋាភិបាលទីក្រុងបាងកករួចហើយ ថា កម្ពុជាសង្ឃឹមថាបញ្ហានេះនឹងមិនធ្វើអោយទំនាក់ទំនងកម្ពុជាប្រែក្លាយជាតានតឹងសាជាថ្មីនោះទេ។ ព្រោះថានេះ គឺជាទិដ្ឋភាពច្បាប់របស់កម្ពុជាសុទ្ធសាធ។
ហើយនៅថ្ងៃនេះទៀត បើតាមប្រសាសន៍របស់លោកហោ ណាំហុង ប្រមុខការទូតទាំងពីរបានឯកភាពគ្នាថា មិនអោយបញ្ហានេះរាលដាល ឬធ្វើអោយប៉ះពាល់ដល់ទំនាក់ទំនងទ្វេភាគីនៅលើវិស័យផ្សេងៗទៀតនោះឡើយ។
ទោះយ៉ាងណាក៏ដោយ វានៅតែពិបាកនឹងវាយតម្លៃ ឬសន្មតជាមុនអំពីការវិវឌ្ឍន៍នៃស្ថានការណ៍។ ពីព្រោះថា បញ្ហាទំនាក់ទំនង ពាក់ព័ន្ធនឹងមនុស្សពីរនាក់។ ដូច្នេះ បើទោះណាជាកម្ពុជា សំដែងថាមិនចង់អោយមានភាពតានតឹងលើទំនាក់ទំនងការទូតនៃប្រទេសទាំងពីរក៏ដោយ ហើយផ្ទុយទៅវិញថៃគឺជាអ្នកចាប់ផ្តើមមុននោះ ដូច្នេះរឿងដដែលច្បាស់ជានឹងកើតមានឡើងវិញ។ ហើយកម្ពុជានឹងដើរតាមក្រោយប្រទេសថៃសាជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ