លោក រ៉ុង ឈុន ៖ សាលារៀនរដ្ឋមិនត្រូវបិទទ្វារនៅក្នុងពិធីបុណ្យចូលឆ្នាំចិនឡើយ
សមាគមគ្រូបង្រៀនឯករាជ្យកម្ពុជាជំរុញអោយក្រសួងអប់រំចាត់វិធានការ ទប់ស្កាត់ការបិទសាលារៀនរដ្ឋ នៅក្នុងពិធីបុណ្យចូលឆ្នាំចិន។ សេចក្តីអំពាវនាវនេះបានធ្វើឡើងបន្ទាប់ពីសមាគមគ្រូបង្រៀនឯករាជ្យ កម្ពុជាកត់សម្គាល់ឃើញថា សាលារដ្ឋកាន់តែច្រើនឡើងៗពីមួយឆ្នាំទៅមួយឆ្នាំបានបិទទ្វារនៅ ពេលបុណ្យចូលឆ្នាំចិន។ ជាការឆ្លើយតប ក្រសួងអប់រំសន្យាកែលម្អស្ថានភាពសម្រាប់ឆ្នាំក្រោយៗ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ គី សុខលីម ពីទីក្រុងភ្នំពេញ
លោក រ៉ុង ឈុន ប្រធានសមាគមគ្រូបង្រៀនឯករាជ្យកម្ពុជាអំពាវនាវនៅថ្ងៃអាទិត្យនេះសូមអោយក្រសួងអប់រំចាត់វិធានការធ្វើយ៉ាងណាកុំឲ្យសាលារដ្ឋបិទទ្វារក្នុងពេលបុណ្យចូលឆ្នាំចិនសម្រាប់ឆ្នាំខាងមុខៗទៀត។ ការអំពាវនាវនេះបានធ្វើឡើងបន្ទាប់ពីសមាគមគ្រូបង្រៀនឯករាជ្យកម្ពុជាកត់សម្គាល់ឃើញថា សាលារដ្ឋកាន់តែច្រើនឡើងៗពីមួយឆ្នាំទៅមួយឆ្នាំបានបិទទ្វារនៅពេលបុណ្យចូលឆ្នាំចិនម្តងៗ។
សូមរឭកថា កាលពី៥ឆ្នាំមុន មានតែសាលារដ្ឋនៅតាមទីប្រជុំជនទេ ដែលបិទទ្វារដោយឯកឯងនោះ ប៉ុន្តែសម្រាប់ពេលនេះ សាលានៅតាមតំបន់ដាច់ស្រយាលក៏បានបិទទ្វារដែរ។ បើយោងតាមច្បាប់របស់កម្ពុជា ចូលឆ្នាំចិនមិនមែនជាថ្ងៃឈប់សម្រាករបស់កូនសិស្ស និងបុគ្គលិករដ្ឋនោះទេ។
ចូលឆ្នាំចិនមិនមែនជាថ្ងៃឈប់សម្រាកមែន ប៉ុន្តែសម្ពាធសង្គមពីមួយឆ្នាំទៅមួយឆ្នាំបានបង្ខំចិត្តឲ្យមនុស្សគ្រប់រូបសម្រេចចិត្តដោយខ្លួនឯងមិនទៅសាលារៀន ឬមិនទៅធ្វើការ។ ទង្វើនេះកំពុងក្លាយទៅជាទម្លាប់ប្រចាំឆ្នាំទៅហើយ ហើយនៅថ្ងៃអនាគតទម្លាប់នេះនឹងអាចក្លាយទៅជាប្រពៃណីតែម្តង ប្រសិនបើគ្មានវិធានការទប់ស្កាត់ណាមួយទេនោះ។
លោក រ៉ុង ឈុន ប្រធានសមាគមគ្រូបង្រៀនឯករាជ្យកម្ពុជាបានបញ្ជាក់នៅថ្ងៃអាទិត្យនេះថា លោកនឹងលើកបញ្ហាបិទសាលារដ្ឋនៅពេលចូលឆ្នាំចិននេះជាមួយក្រសួងអប់រំនៅពេលឆាប់ៗខាងមុខនេះ។ លោក ឈុន បានបន្តទៀតថា ប្រទេសកម្ពុជាមានបុណ្យជាតិ និងអន្តរជាតិផ្លូវការច្រើនរួចទៅហើយ ដូច្នេះប្រសិនបើគេឈប់ក្នុងថ្ងៃបុណ្យចូលឆ្នាំចិនដែលមិនមែនជាបុណ្យផ្លូវការទៀតនោះពេលនោះ ការសិក្សារបស់កូនសិក្សានឹងប៉ះពាល់ជាក់ជាពុំខាន។ លទ្ធផលអាក្រក់នៃការឈប់សម្រាកមិនផ្លូវការច្រើន គឺជះឥទ្ធិពលដល់កម្មវិធីសិក្សាជាពិសេសសម្រាប់សិស្សថ្នាក់ប្រឡងតែម្តង។
ជាការឆ្លើយតបទៅនឹងការលើកឡើងរបស់សមាគមគ្រូបង្រៀនឯករាជ្យកម្ពុជា លោក ជ័យ ចាប រដ្ឋលេខាធិការនៃក្រសួងអប់រំបានបញ្ជាក់នៅថ្ងៃអាទិត្យនេះថា ក្រសួងអប់រំមិនបានចេញច្បាប់ឲ្យគ្រឹះស្ថានអប់រំឈប់នៅពេលបុណ្យចូលឆ្នាំចិនទេ ប៉ុន្តែកូនកាត់ចិនឈប់សម្រាកដោយខ្លួនឯង ហើយនេះជាការលំបាកក្នុងការហាមឃាត់ពួកគេ ពីព្រោះវាទាក់ទងទៅនឹងជំនឿប្រពៃណីរបស់ពួកគេ។
ប៉ុន្តែបើទោះបីជាយ៉ាងនេះក្តី លោក ជ័យ ចាប សន្យាថា ក្រសួងនឹងធ្វើសេចក្តីណែនាំទៅកាន់គ្រឹះស្ថានអប់រំរបស់រដ្ឋ ដើម្បីធ្វើយ៉ាងណាឲ្យកូនសិស្សចូលរៀនអោយបានច្រើននៅឆ្នាំក្រោយ ពោលគឺចៀសវាងកុំអោយស្ថានភាពបិទសាលាកើតមានឡើងដូចឆ្នាំនេះទៀត។
សូមបញ្ជាក់ថា មិនមែនមានតែសាលារដ្ឋទេដែលបិទទ្វារនោះ តាមពិតសាលារៀនឯកជន ហាងធំៗ ផ្សារមួយចំនួនក៏បិទទ្វារដែរ។ លើសពីនេះទៅទៀត នៅតាមក្រសួងមន្ទីរវិញ គេឃើញមានមន្ត្រីរាជការតិចតួចបំផុតបានទៅធ្វើការនៅក្នុងថ្ងៃបុណ្យចូលឆ្នាំចិននាពេលកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ