ក្រសួងសុខាភិបាលអំពាវនាវឲ្យពលរដ្ឋប្រុងប្រយ័ត្នជំងឺគ្រុនឈាម
មន្ត្រីសុខាភិបាល បានអំពាវនាវនៅថ្ងៃនេះឲ្យពលរដ្ឋខ្មែរ និងស្ថាប័នពាក់ព័ន្ធនានាប្រុងប្រយ័ត្នចំពោះការរីករាលដាលនៃជំងឺគ្រុនឈាម ខណៈរដូវវស្សាបានចាប់ផ្តើមឡើងហើយ។ ជំងឺគ្រុនឈាមដែលរយៈពេលជិត៥ខែមកនេះ បានសម្លាប់កុមារចំនួន ៨ នាក់ ក្នុងចំណោមកុមារអ្នកជំងឺ ៨៤៥ នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
មន្ត្រីកម្មវីធីជាតិប្រយុទ្ធនឹងជំងឺគ្រុនឈាម បានអំពាវនាវនៅថ្ងៃនេះទៅតាមបណ្តាខេត្តក្នុងទូទាំងប្រទេស ឲ្យប្រុងប្រយ័ត្នខ្ពស់ក្នុងការទប់ស្កាត់នឹងជំងឺគ្រុនឈាម។ លោក ង៉ាន់ ចន្ទថា ប្រធានកម្មវិធីជាតិប្រយុទ្ធនឹងជំងឺគ្រុនឈាម បានចេញសេចក្តីជូនដំណឹងមួយទៅគ្រប់មន្ទីរសុខាភិបាលទាំង ២៤ ខេត្ត- រាជធានី ដើម្បីឲ្យពលរដ្ឋ និងស្ថាប័នពាក់ព័ន្ធយកចិត្តទុកដាក់ប្រុងប្រយ័ត្នបន្ថែមទៀត ក្នុងការត្រួតពិនិត្យមើលស្ថានភាពផ្ទុះជំងឺគ្រុនឈាម ខណៈដែលជំងឺនេះទើបបានសម្លាប់កុមារចំនួន ៨ នាក់រួចមកហើយនោះ។
បើតាមលោក ង៉ាន់ ច័ន្ទថា រយៈពេលជិត ៥ ខែនៃដើមឆ្នាំ ២០១១ នេះ មានកុមារចំនួន ៨៤៥ នាក់ បានចូលសម្រាកព្យាបាលនៅមន្ទីរពេទ្យ ក្នុងនោះមានកុមារចំនួន ៨ នាក់បានស្លាប់ ដោយសារជំងឺគ្រុនឈាម។ បើធៀបនឹងរយៈពេលដូចគ្នា អត្រាគ្រុនឈាមឆ្នាំនេះមានការកើនឡើងជាងឆ្នាំ២០១០ ដែលមានត្រឹមតែ ៧៣១ករណី និងស្លាប់ត្រឹមតែ ៤ នាក់ក្នុងរយៈពេលដូចគ្នា។
លោក ង៉ាន់ ចន្ទ័ថា បានបញ្ជាក់ថា មូលហេតុដែលនាំឲ្យករណីស្លាប់មានការកើនឡើងជាងឆ្នាំមុនក៏ព្រោះតែស្ថានភាពជំងឺគ្រុនឈាមមានការប្រែប្រួលពីមួយឆ្នាំទៅមួយឆ្នាំ និងផ្ទុះខ្លាំងក្នុងរយៈពេលពី ៣-៥ ឆ្នាំ ដែលនេះជាហេតុធ្វើឲ្យកម្មវិធីជាតិមិនទាន់អាចធ្វើការគ្រប់គ្រងបាន។ ម្យ៉ាងទៀតភាគច្រើនអាណាព្យាបាលកុមារតែងតែនិយមប្រើប្រាស់ឱសថដែលមានតម្លៃថោក ជាជាងយកកូនមកមន្ទីរពេទ្យ និងខ្វះការប្រុងប្រយ័ត្ន ពេលកុមារសម្រាក និងខ្លះខ្វះអនាម័យ។ លោកបានថ្លែងថា មកដល់ចុងខែឧសភានេះ ខេត្តដែលមានករណីផ្ទុះជំងឺគ្រុនឈាមខ្លាំងជាងគេ មានរាជធានីភ្នំពេញ ខេត្តកំពង់ធំសៀមរាប កណ្តាល តាកែវ កំពង់ស្ពឺ ព្រៃវែង បន្ទាយមានជ័យ និងជាតំបន់ដែលត្រូវប្រុងប្រយ័ត្នខ្ពស់។
ប្រធានកម្មវិធីប្រយុទ្ធនឹងជំងឺគ្រុនឈាម បានអំពាវនាវដល់អាណាព្យាបាលកុមារថា បើសិនជាមានករណីសង្ស័យថាមានជំងឺគ្រុនឈាមត្រូវយកកុមារនោះទៅព្យាបាលនៅមន្ទីរពេទ្យ ចៀសវាងការរកសេវាព្យាបាលដែលគ្មានវិជ្ជាជីវៈត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ