គ្រឹះស្ថានសិក្សានឹងបិទទ្វារ៦ថ្ងៃនៅពេលកម្ពុជារៀបចំជំនួបកំពូលអាស៊ាន
ខណៈដែលកម្ពុជាធ្វើជាម្ចាស់ផ្ទះក្នុងកិច្ចប្រជុំកំពូលអាស៊ានលើកទី២១ និងកិច្ចប្រជុំពាក់ព័ន្ធជាច្រើនផ្សេងទៀតដែលនឹងធ្វើឡើងចាប់ពីថ្ងៃទី១៥ ដល់ថ្ងៃទី២០វិច្ឆិកាឆ្នាំ២០១២ ខាងមុខនេះ គ្រឹះស្ថានសិក្សាចំនួន១៩ នឹងផ្អាកការសិក្សារយៈពេល៦ថ្ងៃ។ រីឯសាលារាជធានីភ្នំពេញឯនោះវិញក៍បានប្រកាសដល់ម្ចាស់អាជីវកម្មមួយចំនួនផ្អាកអាជីវកម្មជាបណ្តោះអាសន្ន។ អាជ្ញាធរនឹងប្រមូលក្មេងៗលក់តាមដងផ្លូវនិងអ្នកសុំទានយកទៅដាក់នៅមជ្ឈមណ្ឌលសង្គមកិច្ចព្រៃស្ពឺផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
ដើម្បីលើកកិត្យានុភាពនៃព្រះរាជាណាចក្រកម្ពុជាក៍ដូចជារាជធានីភ្នំពេញក្នុងឆាកអន្តរជាតិនៅក្នុងកិច្ចប្រជុំកំពូលអាស៊ាន លើកទី២១ នៅរាជធានីភ្នំពេញ ក្រសួងអប់រំបានបញ្ជារឲ្យគ្រឹះស្ថានសិក្សាចំនួន១៩ ផ្អាកការសិក្សារយៈពេល៦ថ្ងៃ។រីឯសាលារាជធានីភ្នំពេញក៍បានប្រកាសដល់ម្ចាស់អាជីវកម្មមួយចំនួនផ្អាកអាជីវកម្មជាបណ្តោះអាសន្ន ហើយក៍ប្រមូលក្នេងៗលក់តាមដងផ្លូវនិងអ្នកសុំទានយកទៅដាក់នៅមជ្ឈមណ្ឌលសង្គមកិច្ចព្រៃស្ពឺផងដែរ។
នៅក្នុងលិខិតរបស់ក្រសួងអប់រំយុវជននិងកីឡាដែលបានផ្សាយនៅថ្ងៃសុក្រនេះ បានឲ្យដឹងថា គ្រឹះស្ថានឧត្តមសិក្សាមួយចំនួនដែលនឹងត្រូវបិទទ្វារចាប់ពីថ្ងៃទី១៦ដល់ថ្ងៃទី២១វិច្ឆិកាខាងមុខនោះ មានដូចជាសាកលវិទ្យាល័យភូមិន្ទភ្នំពេញ សាកលវិទ្យាល័យ វិទ្យាសាស្ត្រ សុខាភិបាល សាកលវិទ្យាល័យជាតិគ្រប់គ្រង វិទ្យាស្ថានជាតិអប់រំ និងសាកលវិទ្យាល័យស៊ីតិច។
រីឯសាលារៀនមួយចំនួននៅតាមបណ្តោយមហាវិថីសហព័ន្ធរុស្ស៊ីនិងវិថីសំខាន់ៗក្នុងរាជធានីភ្នំពេញក៍ត្រូវបិទទ្វាផងដែរ។ ការបិទទ្វារសាលារៀនជាបណ្តោះអាសន្ននោះ ដើម្បីកាត់បន្ថយការកកស្ទះចរាចរណ៍។
ដោយឡែក សាលារាជធានីភ្នំពេញក៍បានចេញសេចក្តីជូនដំណឹងនៅថ្ងៃទី ៨វិច្ឆិកាឆ្នាំ២០១២ ដល់ស្ថាប័នរដ្ឋនិងឯកជនដែលប្រកបអាជីវកម្ម ដឹកជញ្ជូនទំនិញ ប្រេងឥន្ធនៈ ឧស្ម័នចំហេះ គ្រប់ប្រភេទតាមយានយន្តធុនធ្ងន់ទាំងអស់អាចធ្វើចរាចរណ៍ក្នុងរាជធានីភ្នំពេញបានតែក្នុងចន្លោះម៉ោង ២៤:០០នាទីយប់ ដល់ម៉ោង ០៥:០០នាទីព្រឹក។ ចំពោះប្រជាពលរដ្ឋដែលប្រកបអាជីវកម្មលក់ដើមផ្កា ដើមឈើគ្រប់ប្រភេទ និងលក់រថយន្តនៅតាមមហាវិថីសហព័ន្ធរុស្ស៊ីនិងមហាវិថីព្រះនរោត្តមក៍ត្រូវផ្អាកអាជីវកម្មផងដែរ។ វិធានការអនុវត្តន៍នេះចាប់ពីថ្ងៃទី១៣ដល់ថ្ងៃទី២៣ ខែវិច្ឆិកា ឆ្នាំ២០១២ ដើម្បីសម្រួលដល់សណ្តាប់ធ្នាប់សុវត្ថិភាពក៏ដូចជាបញ្ចៀសការកកស្ទះចរាចរណ៍និងឧប្បទ្ទវហេតុផ្សេងៗក្នុងអំឡុងពេលកិច្ចប្រជុំកំពូលអាស៊ាន។
នៅក្នុងលិខិតដដែលនោះក៍បានបញ្ជាក់ទៀតថា សាលារាជធានីភ្នំពេញនឹងបិទជាបណ្តោះអាសន្ននូវរបាំងចែកទ្រូងផ្លូវសហព័ន្ធរុស្ស៊ី ត្រង់ចំណុចផ្លូវឆ្លងកាត់ចំនួន០៦ កន្លែងដូចជា ច្រកផ្លូវលេខ២១៥ ច្រកផ្លូវចូលវត្តទឹកថ្លា មុខស្ថានីយ៍ប្រេងឥន្ធនៈតេលាទឹកថ្លា ច្រកផ្លូវខាងលិចរោងចក្រទឹកថ្លា ច្រកចូលផ្សារកាណាឌីយ៉ាបា្លហ្សា មុខធនាគារអេស៊ីលីដា ភោជនីយដ្ឋានពោធិចិនតុង មុខធានាគារកាណាឌីយ៉ា និងផ្លូវចូលវត្តអង្គតាម៉ិញ។ ក្នុងនោះសាលារាជធានីភ្នំពេញក៍ប្រមូលក្មេងៗលក់ តាមផ្លូវ និងអ្នកសុំទាន យកទៅដាក់មជ្ឈមណ្ឌលសង្គមកិច្ចព្រៃស្ពឺ ដោយសហការជាមួយក្រសួងកិច្ចការនារីនិងក្រសួងសង្គមកិច្ច។
កិច្ចប្រជុំកំពូលអាស៊ាន លើកទី២១ និងកិច្ចប្រជុំពាក់ព័ន្ធជាច្រើនផ្សេងទៀត នឹងធ្វើឡើងចាប់ពីថ្ងៃទី១៥ ដល់ថ្ងៃទី២០ ខែវិច្ឆិកា ឆ្នាំ២០១២ នៅរាជធានីភ្នំពេញ ខណៈដែលកម្ពុជាធ្វើជាម្ចាស់ផ្ទះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ